Levitiko 18
18
Lao o uiga mo le mauli
1Na masau loa le Eteleno kia Moisese, o pati : 2Masau ki le kakai o Iselaele, o pati loa kia latou : ko au ko le Eteleno, ko lokoutou Atua. 3Ke aua na kotou fai loa le nea leia e fai i le fenua o Esipito, leia na kotou nofo ai, ti ke aua na kotou fai loa le nea leia e fai i le fenua o Kanaane leia e kau ave koutou ki ai : Ke aua na kotou mulimuli loa ki alatou aga fakafenua. 4Kotou fai loa aku fakatotonu, ti kotou tausi loa aku lao, ti kotou mulimuli loa ia latou. Ko au ko le Eteleno, ko lokoutou Atua. 5Kotou tausi loa aku lao mo aku fakatotonu : ko le tagata leia e fai ia loa latou e mauli loa ia latou. Ko au ko le Eteleno.
6Aua na fakafeofi loa se tasi o koutou ki lona kaiga totonu, ke sufegi lona telefua. Ko au ko le Eteleno.
7Aua na ke sufegi loa le telefua o lou tamana, pe ko le telefua o lou tinana. Ko lou tinana a ia : aua na ke sufegi loa lona telefua.
8Aua na ke sufegi loa le telefua o le avaga o lou tamana. Ko le telefua a ia o lou tamana.
9Aua na ke sufegi loa le telefua o lou tuagaane, taine o lou tamana pe taine o lou tinana, leia na tupu i le fale pe i fafo o le fale.
10Aua na ke sufegi loa le telefua o le taine o lou vosa pe ko le taine o lou taine. Talie ko lou telefua a ia.
11Aua na ke sufegi loa le telefua o le taine o le avaga o lou tamana, leia na tupu mei lou tamana. Ko lou tuagaane a ia.
12Aua na ke sufegi loa le telefua o le tuagaane o lou tamana. Ko le famili totonu a ia o lou tamana.
13Aua na ke sufegi loa le telefua o le taina o lou tinana. Ko le kaiga totonu a ia o lou tinana.
14Aua na ke sufegi loa le telefua o le taina o lou tamana. Aua na ke fakafeofi loa ki lona avaga. Ko lou tinana a ia.
15Aua na ke sufegi loa le telefua o lou fugao. Ko le avaga a ia o lou vosa : aua na ke sufegi loa lona telefua.
16Aua na ke sufegi loa le telefua o le avaga o lou taina. Ko le telefua a ia o lou taina.
17Aua na ke sufegi loa le telefua o se fafine mo lona taine. Aua na ke too loa le taine o lona vosa, pe ko le taine o lona taine, ke sufegi ola telefua. Ko ou kaiga totonu laua : ko se nea veli a ia.
18Aua na ke sufegi loa le telefua o le taina o lou avaga, i le temi leia e mauli ai lou avaga. Ko le nea lena e fakatupu veli.
19Aua na ke sufegi loa le telefua o se fafine i lona menise, talie e kelekele a ia.
20Aua na ke sufegi loa le telefua o le avaga o lou oloi, talie ko le nea lena e fakakelekele ia a koe.
21Aua na ke tuku loa ke momoli i le afi se tasi o au fanau kia Moloke, ti aua na lau veli loa ki le suafa o lou Atua : ko Au ko le Eteleno.
22Aua na ke momoe loa mo se tagata ofaipe le momoe mo se fafine ; ko se nea fakalialia a ia.
23Aua na ke momoe loa mo se manu, ke fakakelekele ai a koe. Ti aua na fakafeofi loa se fafine ki se manu, ke momoe mo ia : ko se nea fakalialia a ia.
24Ke aua na fakakelekele loa koutou e se nea fua e tasi o nea ana. Talie ko nea fuli ana ala na fakakelekele ia a puleaga ala e kau kapu loa i okoutou mua. 25Kua kelekele le fenua ia latou ; e tautea loa lana agaveli, ti e luluai loa e le fenua lona kakai. 26Koia, kotou tausi loa aku lao mo aku fakatotonu, ti e leaise kotou fai loa se nea fakalialia e tasi i nea ana, e leia o le fenua mo le matapule leia e nofo i loto malie o koutou. 27Talie na fai a nea fakalialia fuli ana e tagata o le fenua, ala na nofo i ai i mua o koutou ; ti na kelekele i ai le fenua. 28Kotou tokaga na luluai loa koutou e le fenua, mo kapau e kotou fakakelekele loa a ia, ofaipe lana luluai latou ala na nonofo i ai i mua o koutou. 29Talie ko latou fuli ala e fai ia loa se nea fakalialia i nea fuli ana, e tuuti loa mei lolatou kakai. 30Kotou tausi loa aku fakatotonu ; ti aua na kotou fai loa se aga fakalialia e tasi i nea fakalialia ala na fai i mua o koutou, ti e leaise kotou kelekele loa. Ko au ko le Eteleno, ko lokoutou Atua.
Currently Selected:
Levitiko 18: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
