Sonasi 3
3
Akonaki a Sonasi i Ninive
1Na fakasa loa le foafola a le Eteleno kia Sonasi, ko lona tua lua a ia, o pati :
2Tuu ki aluga, ano ki Ninive, le kolo lasi, ti ke fakasa i ai le nea leia e kau fakatotonu atu loa kiate koe ! 3Ti na tuu ake loa Sonasi, o ano ki Ninive, o mulimuli ki le foafola a le Eteleno. Kae ko Ninive ko se kolo lasi ai a ia, na aso tolu le saele i ai. 4Na fai mua e Sonasi se aso saele i le kolo ; ti na kalaga a ia, o pati : Koi toe fai ni aso e kau fa, ti e maumaui loa Ninive !
5Ti na tui loa le kakai o Ninive ki le Atua, ti na lotou fakasa loa se sesunio, ti na lotou kofu loa ni taga, mei le kau lalasi o kaku kia latou ala e liliki oki. 6Na kaku loa le nea ki le sau o Ninive ; ti na tuu ake loa a ia i lona ekeekeaga fakasau, o tatala lona taupulupulu, kae tui loa e ia se taga, ti na tonatona loa a ia i le mugalafu. 7Ti na fakatotonu loa e ia ke logologo mo fakasa i Ninive le nea leinei kua fono e le sau mo lana kau lalasi : Aua na asiasii se nea kai, pe kai se luna, pe inu se vai, e tagata mo manu, mo pipi, mo ovi ! 8Ke kofu e tagata mo manu ni taga, ti ke lotou tagi ki le Atua i lolatou makeke katoa, ti ke lotou tafoki fuli mei olatou ala veveli mo alatou gaoi fakamakeke ala na agasala ai olatou lima ! 9Ko ai e iloa ia, pe leaise toe tafoki loa le Atua o fakasemala, ti mo fakafiti loa a ia ki lona sausau lasi, ti e feala loa ke aua na tou mamate ?
10Ti na tio loa le Atua kua lotou fai felaaki, ti kua lotou tafoki mei olatou ala veveli. Ti na fakasemala loa le Atua ki le veli leia na fakatotonu e ia ke fai kia latou, ti na leaise fakasoko loa e ia a ia.
Currently Selected:
Sonasi 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
