Soele 3
3
Fakamaau o atu puleaga
1Talie ko leinei, i aso ana, i le temi lena,
Mo ka kau toe aumai loa le kau popula o Suta mo Selusalemi,
2E kau fakatasi loa a atu puleaga fuli,
Ti e kau fakaifo loa latou ki le vaivailiua o Sosafate ;
I ai, e kau fakamaau loa latou,
O tupu ko loku kakai, o tupu ko Iselaele, loku tofiga,
Leia na lotou fakamavetevete i atu puleaga,
O tupu ko loku fenua leia na lotou vae ia latou.
3Na lotou toso loku kakai ;
Na lotou soli le tama tupulaga ki se fafine faiaga,
Na lotou fakatau le taine ki se vino, ti na lotou inu.
4Kolea le nea e kotou loto ki ai, Tile mo Sitone,
Ti mo koutou fuli, fenua o le kau Filisitini ?
Pe kotou loto ke kotou lagavaka mai kiate au ?
Kapau e kotou fia lagavaka mai kiate au,
E leaise tuvai loa laku fakavilo lakoutou lagavaka ki okoutou ulu.
5Na kotou too laku siliva mo laku aulo ;
Ti ko le nea leia na kau maua e mauiga kese mo fulumalie,
Na kotou ave latou ki okoutou fale tapu.
6Na kotou fakatau a fanau o Suta mo Selusalemi ki le kau Keleka
O tupu ke fakamamao latou i lolatou fenua.
7Ko leinei, e kau toe aumai loa latou mei le ganea lena na kotou fakatau latou ki ai ;
Ti e kau toe fakavilo loa ki okoutou ulu lakoutou lagavaka.
8E kau fakatau loa okoutou vosa mo okoutou taineliki ki fanau o Suta ;
Ti e lotou toe fakatau loa latou ki le kau Sapea, puleaga mamao.
Talie kua masau le Eteleno.
9Kotou fakasa a nea ana i lotolotoga o atu puleaga !
Kotou teuteu ki le tau !
Kotou fafagu a tagata toa !
Ke lotou fakafeofi mai, ke lotou pale mai,
Tagata tau fuli !
10Kotou fau ni seleta ki sele o akoutou saliote !
Ti mo ni tao ki akoutou sele tuuti fulumeto.
Ke pati leia e manava veli : E kau makeke !
11Kotou vavevave o au, koutou fuli, puleaga o tafatafa ;
Ti kotou fakatasi fuli !
I lena, ei Eteleno, fakaifo mai lau kau toa !
12Ke alaala a atu puleaga, ti ke lotou pale
Ki le vaivailiua o Sosafate !
Talie i lena e kau ekeeke loa o fakamaau a puleaga fuli o tafatafa.
13Kotou too le sele tuuti fulumeto,
Talie kua matua le taukai fulumeto ! Kotou au, kotou takatakafi,
Talie kua apele le tatauaga vite,
Kua apele pipi a tane vino !
Talie kua lasi ai lalatou agaveli.
14Ko se kakai toka api, ko se kakai toka api,
I le vaivailiua o le fakamaau.
Talie kua ofi le aso o le Eteleno,
I le vaivailiua o le fakamaau.
15Kua fakapouli le laa mo le masina,
Ti kua puli le gigila o fetuu.
16Mei Sione e gugulu le Eteleno,
Mei Selusalemi e logo lona leo ;
Kua galulu le lagi mo le kele.
Kae ko le Eteleno ko se mumuniaga ki lona kakai,
Se puipuiaga ki fanau a Iselaele.
17Ti e kotou iloa loa ko au ko le Eteleno, lokoutou Atua,
Leia e nofo i Sione, loku mauga maokioki.
E maokioki loa Selusalemi,
Ti e leaise toe fakalaka loa i ai a matapule.
Fakapapau ki Iselaele
18I le temi lena, e tafe loa le vino mei mauga,
E sali loa le sua u mei mauga liliki,
Ti e i ai loa se vai i liua fuli o Suta ;
E mapuna loa se matapuna vai mei le fale o le Eteleno,
O fakavai loa le vaivailiua o Sitime.
19E maumau loa Esipito,
E liliu loa Etome o toafa,
O tupu ko agamakeke ki fanau o Suta,
Ala na lotou liligi le toto saosaoa i lolatou fenua.
20Kae e nofoi loa Suta o lee gato,
Ti mo Selusalemi i tautupu mo tautupu.
21E kau totogi loa lolatou toto
Leia na leaise totogi.
Ti e nofo loa le Eteleno i Sione.
Currently Selected:
Soele 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
