Soele 2
2
Ko le solia mei le potu noleto
1Kotou pupusi le fakatagi pupusi i Sione !
Kotou fakagugulu le fakatagi pupusi i loku mauga tapu !
Ke lulu kakai fuli o le fenua !
Talie kua au le aso o le Eteleno, talie kua ofi mai a ia,
2Aso o fakapouli mo le pouli loloto,
Aso o ao mo kokofu,
E au a ia ofaipe le mafola o le pouli i aluga o mauga.
Ko leinei se kakai toka api mo makeke,
Leia e leai sona tatau,
Ti e leaise toe maua sona tatau i temi ki muli.
3E ano se afi kaka i ona mua ;
Ti e muli iate ia se ula vevela ;
Na fai le fenua i mua pe se oloto o Eteni,
Kae talu mei ai, ko se toafa fakaii a ia :
E leaise sao se nea iate ia !
4I le tio kia latou, e lotou faipe ni osi,
Ti e lotou makape ofaipe ni tagata ekeosi.
5I le logo kia latou, e faipe se logoa o ni saliote tau
I le tumutumu o ni mauga ala e lotou soposopo ai,
E faipe se mafitifiti o le ulai afi,
Mo ka tutu e ia se mutie malo.
E faipe se kau tau makeke
Leia e teuteu ki le tau.
6I olatou mua e lulu a kakai,
E fakalaulautetea a mata fuli.
7E lotou oso ofaipe ni tagata tau,
E lotou kava i kaua ofaipe ni tagata tau ;
E tasi ano le tagata i lona ala,
E leaise toe maliu kese a ia i lona ala.
8E leaise lotou fetekeaki le tasi ki le tasi,
Kae e lotou tasi saele i lona atu ;
E lotou oso ki faigataa fuli,
E leaise toe fakatuu latou e se nea.
9E lotou mavetevete i le kolo,
Makape i aluga o kaua,
Kava ki aluga o fale,
Ulu i katupa ofaipe se tagata kaia.
10I olatou mua e lulu le kele,
E galulu le atu lagi,
E fakapouli le laa mo le masina,
Ti e puli le gigila o fetuu.
11E fakagugulu e le Eteleno lona leo i mua o lana kau tau ;
Talie e lasi ai lona nofolaga solia,
Ti e makeke leia e fakasoko ia lana folafola ;
Talie e lasi le aso o le Eteleno, e fakaii a ia :
Ko ai e feala loa ke tuu i ai ?
Kalaga ki le fakasemala
12I le aso nei foki, e pati le Eteleno,
Kotou toe liliu mai kiate au i lokoutou loto katoa,
Mo ni sesunio, mo ni tagi, ti mo ni tagi laulau !
13Kotou sae okoutou loto kae aua okoutou kofu,
Ti kotou toe liliu mai ki le Eteleno, lokoutou Atua ;
Talie e agamalie a ia mo manava alofa,
E kataki fualoa a ia mo apele i le agamalie,
Ti e fakasemala a ia ki tautea ala e tuku e ia.
14Ko ai e iloa ia pe leaise toe tafoki loa a ia ti e fakasemala loa a ia,
Pe leaise tuku loa e ia le tapuakina i ona muli ?
Ti e feala loa ke kotou momoli ni failaulau mo ni lipasio ki le Eteleno, lokoutou Atua.
15Kotou pupusi le fakatagi pupusi i Sione !
Kotou logologo se sesunio, mo se fakatasi mamalu !
16Kotou fakatasi le kakai, kotou fai se fono tapu !
Kotou fakatasi a matua,
Kotou fakatasi a toe,
Tatau foki mo toe koi u !
Ke mavae le tagata avaga i lona fale,
Ti mo le fafine avaga i lona kogafale !
17I le vasa o le matapa ulu mo le aletale
Ke fetagisi tagata faisakilifisio,
Ti ko tagata fakasausau a le Eteleno,
Ke lotou pati : Eteleno, fakamauli lou kakai !
Aua na ke tuku lou tofiga ki le luma,
Ki nukinuki a atu puleaga !
Kolea e pati ai loa i lotolotoga o kakai : Kofea lolatou Atua ?
Fakapapau o le tapuakina
18E finenonofo lasi le Eteleno ki lona fenua,
Ti e fakamauli e ia lona kakai.
19E tali le Eteleno, ti e pati a ia ki lona kakai :
Ko leinei, e kau soli atu loa kia koutou se fulumeto,
Mo se vino, mo se lolo,
Ti e kotou makona loa ;
Ti e leaise kau toe tuku loa koutou ki le luma i lotolotoga o atu puleaga.
20E kau fakamamao loa ia koutou le fili o le noleto,
E kau kapu loa a ia ki se kele malo mo toafa,
E kau ti loa lona atu mua ki le tai mate,
Mo lona atu muli ki le tai metitelanea.
Ti e mafola loa lona pala,
E malaga ake loa lona namuku i le aele,
O tupu na fai e ia ni nea veveli lalasi.
21Kele, aua na ke i,
Kae ke ke fiafia mo ke nekenekea,
Talie e fai le Eteleno ni nea lalasi !
22Manu o le vao, aua na kotou i,
Talie e toe sesega loa a toafa,
Ti e toe fua loa a laakau,
Ti e toe soli loa e le fiki mo le vite ola koloa.
23Ti ko koutou, fanau o Sione, kotou fiafia ti kotou nekenekea
I le Eteleno, lokoutou Atua,
Talie e tuku atu loa e ia kia koutou le ua i lona temi,
E kakau atu loa e ia kia koutou a ua o le temi momoko mo ua o le temi mafana,
Ofaipe le temi mago.
24E apele loa a sasaaga fulumeto i le fulumeto,
Ti e apele loa a tane vino i le vino mo le lolo.
25E kau fetogi atu loa kia koutou a fetuu
Ala na kai e le seseivaka,
Mo le lauka, mo le asile, mo le kasame,
Laku solia lasi leia na kau kakau atu kia koutou.
26E kotou kakai loa ti e kotou makokona loa,
Ti e kotou fakavikiviki loa ki le suafa o le Eteleno, lokoutou Atua,
Leia na fai ia kia koutou ni nea fakamanamana ;
Ti e leaise toe luma loa loku kakai.
27Ti e kotou iloa loa e kau nofo i loto malie o Iselaele,
Ti ko au ko le Eteleno, lokoutou Atua, ti e leai se tasi ake atua kese iate au,
Ti e leaise toe nofo loa loku kakai i le luma.
28I le oki o le nea lena, e kau liligi loa loku Laumalie ki kanofi fuli ;
E kikite loa okoutou vosa mo okoutou taineliki,
E fai loa e okoutou matua ni moe miti,
Ti mo okoutou tagata tupulaga ni tio.
29Ti e tatau foki ki tagata fakasausau mo fafine fakasausau,
I aso ana, e kau liligi loa loku Laumalie.
30E kau fakasa loa ni nea fakamanamana i le lagi mo le kele,
Se toto, mo se afi, ti mo ni pou afu.
31E fetogi loa le laa o fakapouli,
Ti mo le masina o toto,
I mua o le soko mai o le aso o le Eteleno,
O le aso lasi lena mo fakaii.
32Ti ko leia e fetapa loa ki le suafa o le Eteleno e mauli loa ;
E nofo loa le fakamauli i le mauga o Sione mo Selusalemi,
Ofaipe le pati a le Eteleno,
Ti mo lotolotoga o latou ala na saofaki, latou ala e kalagai loa e le Eteleno.
Currently Selected:
Soele 2: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
