Soele 1
1
Ko seseivaka, fakatata o le kau Asilia
1Na fakasa le folafola a le Eteleno kia Soele, le vosa o Petuele.
2Kau matua, kotou fakalogo mai ki le nea leinei !
Kotou fakalogo mai okoutou taliga, koutou fuli, ko kakai o le fenua !
Pe kua soko se nea feneeki i lokoutou temi,
Pe ko le temi o okoutou tamana ?
3Kotou fakamatala a ia ki akoutou fanau,
Ti ke fakamatala a ia e akoutou fanau ki alatou fanau,
Ti ke fakamatala e alatou fanau ki le tautupu leia e muli mai loa !
4Ko le nea leia na tuku e le lauka, na kai a ia e le seseivaka ;
Ko le nea leia na tuku e le seseivaka, na kai a ia e le seleki ;
Ko le nea leia na tuku e le seleki, na kai a ia e le asile.
5Kotou alaala, kau konana, ti kotou fetagisi !
Koutou fuli, kau inu vino, kotou tagi laulau,
Talie kua too le vino mei okoutou gutu !
6Talie kua au se kakai ki loku fenua,
Leia e makeke ti e toka api.
E maua e ia a nifo o se laione,
Ti mo kaugutu o se laione fafine.
7Kua maumaui e ia laku vite ;
Kua fatifatii e ia laku fiki,
Kua talai e ia ona laa, ti kua sele e ia a ia ki lalo.
Kua tetea a taulu o le vite.
8Ke ke tagi laulau, ofaipe le taine taupoou leia e tui ia le taga,
O tagi ki le alofaaga o lona temi tupulaga !
9Kua pupuli moliga mo lipasio i le fale o le Eteleno ;
Kua mamae a tagata faisakilifisio, tagata fakasausau a le Eteleno.
10Kua maumau a faisaga,
Kua tagi le kele ;
Talie kua maumau le fulumeto,
Kua masa le vino, kua malo le lolo.
11Kua luma le kau gaoi kele, kua lauga le kau gaoi vite,
O tupu ko le fulumeto mo le olese ;
Talie kua maumau a fua o faisaga.
12Kua luma le vite,
Kua gini le fiki,
Ko le kelenati, mo le palemie, mo le pome,
Kua gae a laakau fuli o faisaga…
Kua puli le fiafia i vosa o le tagata !
13Tagata faisakilifisio, kotou tui okoutou kofu fakamamae ti kotou fetagisi !
Kotou tagi laulau, tagata fakasausau o le aletale !
Kotou au, kotou alaala i le po katoa mo okoutou taga,
Tagata fakasausau o le fale o loku Atua !
Talie kua puli a moliga mo lipasio i le fale o lokoutou Atua.
14Kotou logologo se sesunio, se fakatasi mamalu !
Kotou fakatasi a matua, mo kakai fuli o le fenua
I le fale o le Eteleno, lokoutou Atua,
Ti kotou tagi ki le Eteleno !
15Oi, se aso fakaii !
Talie kua ofi mai le aso o le Eteleno :
E au a ia ofaipe se maumau mei le Mafimafi.
16Pe leaise kua too le nea kai i otatou mata ?
Pe leaise kua puli le fiafia mo le nekenekea i le fale o lotatou Atua ?
17Kua malo a pulapula i le kele ;
Kua lavaki a tanakiaga magiti ;
Kua maumau a fale koloa,
Talie e leaise koi maua se fulumeto.
18Oi, kua fetagisi a manu !
Kua gagae a kau pipi
Talie e leaise koi maua se mutie ;
Ti kua fakaaloalofa foki a kau ovi.
19Oi Eteleno, ko koe leia e kau tagi ki ai !
Talie kua tutu e le afi le mutie o le toafa,
Ti kua tutu e le ula a laakau fuli o le vao.
20Kua tagi foki a manu o faisaga kiate koe ;
Talie kua malo a liua,
Ti kua tutu e le afi a mutie o le toafa.
Currently Selected:
Soele 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
