Oseo 13
13
Ko le fakafefeka o Iselaele
1Ka masau Efalaimi, ko se nea fakaii ai.
Na malaga a ia ki aluga i Iselaele.
Kae na agasala a ia ia Paale, ti na mate a ia.
2I le aso nei e soko atu lalatou agasala,
E lotou fai ki lalatou paaga ni fakatata ukamea saka,
Mo ni taulaatua o mulimuli ki alatou fakakaukau ;
Ko nea fuli ko le gaoiaga a ni kau tufuga. E lotou pati o uiga mo latou :
E tonu ke momoli kia latou ni sakilifisio, ti ke sogi ki uviki pipi tagata !
3Koia e lotou fai ai loa pe le kokofu o le usu,
Pe le sasau leia e puli vave,
Pe le penu leia e ave e le matagi i sasaaga fulumeto,
Pe le afu leia e ulu mei se katupa.
4Kae ko au, ko le Eteleno au, lou Atua, talu mei le fenua o Esipito.
E leaise ke iloa se tasi ake Atua kese iate au,
Ti e leai se tasi ake fakamauli kese iate au.
5Na kau iloa a koe i le toafa,
I se kele malo.
6Na lotou kai makona i ni faisaga sesega ;
Na lotou kai makona, ti na makita loa olatou loto i le fia nealasi ;
Koia na lotou galoi ai au.
7E kau liliu loa kia latou ofaipe se laione ;
E kau lama loa latou i le ala ofaipe se taika.
8E kau osoi loa latou, ofaipe se uluso fafine leia na too ona uviki,
Ti e kau saei loa le kili o lolatou mafu ;
E kau kai loa latou, ofaipe se laione fafine ;
E sae loa latou e manu o faisaga.
9Ko le nea leia e tupu ai lou maumau, Iselaele,
Ko lau agatuu kiate au, ki leia na feala ke saofaki ia a koe.
10Kofea loa lou sau ?
Ke saofaki e ia a koe i ou kolo fuli !
Kofea loa ou tui fakamaau, ala na ke pati ki ai :
Soli mai se sau mo ni pule ?
11Na kau soli atu kiate koe se sau i loku ita,
E kau toe too loa a ia iate koe i loku sausau lasi.
12Kua tosi le agaveli a Efalaimi ke taupau,
Kua tuku lana agasala ki se ganea fakapulipuli.
13E soko loa kiate ia a mamae o le fafine leia e fanau ;
Ko se toe valea a ia,
Leia e leaise vilo i le manava o le tinana i le temi na tonu ke fanaui ai a ia.
14E kau totogi loa latou mei le makeke o le nofoaga o le kau mate,
E kau saofaki loa latou mei le mate.
Ei mate, kofea au masafu ?
Nofoaga o le kau mate, kofea lau pule ki le mate ?
Kae kua sola le fakasemala i oku mata !
15E logo ai le lasi o fua o Efalaimi i loto malie o ona fetaina,
E au loa le matagi o le potu Esite, e malaga ake loa le matagi o le Eteleno i le toafa,
O fakamalo ia loa ona matapuna, ti mo fakamasa ia loa ona tanakiaga vai.
E kaia loa a fale koloa fuli ala e tanaki ai au nea mauiga.
16E tautea loa Samalia, talie na agatuu a ia ki lona Atua.
E lotou mamate loa i le seleta ;
E laliki loa olatou toe liliki,
Ti e paipaisi loa a manava o olatou fafine tinanae.
Currently Selected:
Oseo 13: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
