Oseo 12
12
Ko le loto noa o Iselaele
1E takatakai au e Efalaimi ki ni loi,
Ti mo le fale o Iselaele ki ni kaka ;
Koi tuu makeke a Suta ki le Atua,
Ki le Maokioki agatonu.
2E kai e Efalaimi le matagi, ti e tuli e ia le matagi o le potu Esite.
I aso fuli e liuliuga e ia le loi mo le agaitaita ;
E fai e ia se sai mo Asilia,
Ti e fetuku e ia se lolo ki Esipito.
3E valoki foki e le Eteleno a Suta,
Ti e tautea loa e ia Sakopo o fakatatau ki lana aga,
E totogi loa e ia kiate ia o mulimuli ki ana gaoi.
4I le manava o le tinana na kukumi loa e Sakopo le mulivae o lona taina,
Ti na poko loa a ia mo le Atua i le temi o lona makeke.
5Na poko loa a ia mo se aselo, ti na malo loa a ia,
Na tagi loa a ia, ti na fai loa e ia kiate ia ni kole.
I Petele na maua loa e Sakopo le Eteleno,
Ti ko lena le ganea na folafola ai a ia kia tatou.
6Ko le Eteleno ko le Atua o kau tau ;
Ko lona suafa ko le Eteleno.
7Ti ko koe, toe liliu mai ki lou Atua ;
Taupau le alofa ki le Atua mo le faitotonu,
Ti fanaki tuumau ki lou Atua.
8Ko Efalaimi ko se tagata faikoloa e too ia i lona lima ni fua salasala,
Ti e alofa a ia ki le kaka.
9Ti e pati Efalaimi : Kua kau soko maoki o mou koloa,
Kua kau maua se koloa lasi ;
Ti ko le fua katoa a ia o laku gaoi.
E leaise maua loa iate au se agaveli, pe ko se nea fua e sala.
10Kae ko au, ko le Eteleno au, ko lou Atua, talu mei le fenua o Esipito ;
E kau toe fakanofo loa a koe i ni falela, ofaipe aso o lafeti.
11Na kau masau ki le kau polofeta,
Na kau liuliuga a tio,
Ti na kau tuku ki le kau polofeta ni folafola fakatata.
12Ko le kakai o Kalaate ko se kakai kaia i le temi mua, kua lotou puli noa i le temi nei.
Na lotou momoli ni pipi i Kilikale :
Kae kua fai olatou aletale pe ni tuuga fatu
I ganea popoko o faisaga.
13Na sola loa Sakopo ki le fenua o Alame,
Na fakasausau loa Iselaele ke mau sona avaga,
Ti na taupau loa e ia a kau manu ke maua sona avaga.
14I se polofeta na fakamavae loa e le Eteleno Iselaele i Esipito,
Ti na taupau loa Iselaele e se polofeta.
15Na fakatupu e Efalaimi le ita mamae o le Eteleno :
E tuku loa e lona Aliki ke vilo kiate ia le toto na liligi e ia,
E fakavilo ai loa e ia kiate ia le luma o ana gaoi fakalialia.
Currently Selected:
Oseo 12: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
