Oseo 10
10
Fakamaau o Iselaele
1Ko Iselaele ko se vite fua,
Leia na soli ia ni fua lasi ai.
Kae na lasi ona fua ;
Ti na lasi lana liuliuga a aletale ;
Kae na lasi le mou koloa o lona fenua,
Ti na lasi lana fakafulumalie a fakatata.
2Kua vaelua olatou loto : e lotou amo loa lona veli.
E soloi loa e le Eteleno olatou aletale, ti e maumaui loa e ia olatou fakatata.
3Ti e leaise tuvai loa ti lotou pati loa : E leaise tou maua ia se sau,
O tupu na leaise tou i ki le Eteleno ;
Ti kolea e mafai loa e le sau kia tatou ?
4E lotou fai ni masau vaiga, mo ni fakapapau loi,
Mo ka lotou fai se sai :
Koia e somo ai loa le tautea, ofaipe se laakau kona
I se faisaga kua fakamaluu.
5E mamae loa le kakai o Samalia o tupu ko uviki pipi o Pete-Aveni ;
E tagi loa le kakai ki le taulaatua,
Ti e lulu loa ona kau pelepitelo kiate ia,
Ki lona kololia, leia ka puli loa ia latou.
6E ave loa le taulaatua ki Asilia,
Ke fai ai se moliga ki le sau ko Salepe.
E luma loa Efalaimi,
Ti e luma loa Iselaele i ana fakatuutuu.
7Kua oki Samalia, kua oki lona sau,
Ofaipe le piau i aluga o le tai.
8Ko ganea tapu o Pete-Aveni, ala na agasala ai Iselaele, e maumaui loa ;
E sosomo loa le vao talatala mo le vao sukisuki i olatou aletale.
E lotou pati loa ki mauga : Kotou uufi matou !
Ki mauga liliki : Kotou sosolo mai kia matou !
9Iselaele, na ke agasala talu mei aso o Kipea !
I ai na lotou tutuu loa i aluga.
Na leaise kaku loa kia latou le tau ki le kau agaveli i Kipea.
10E kau tautea loa latou o mulimuli ki loku loto,
Ti e fakatasi loa ni kakai kia latou,
Mo ka sai loa latou ki tini o tupu ko lalatou agaveli kua liuga lua.
11Ko Efalaimi ko se uviki pipi fafine na fakalalata, kae e oli ke takatakafi ia le fulumeto,
Kae e kau fakafeofi loa ki lona ua fulumalie ;
E kau sai loa le saliote kia Efalaimi, e fakamaluu loa e Suta le kele, e fakatokatoka loa e Sakopo le kele.
12Kotou muluki le fakaili o mulimuli ki le faitotonu,
Kotou tuuti le fulumeto o mulimuli ki le manava alofa,
Kotou faala sokoutou faisaga foou !
Ko le temi leinei ke afa ai le Eteleno,
O kaku ki lana saele mai, o liligi kia koutou le faitotonu.
13Na kotou to le veli, na kotou utu le agaveli,
Na kotou kai le fua o le loi ;
Talie na ke fanaki ki lou ala,
Ki le api o au tagata toa.
14E malaga loa se maveuveu i lou kakai,
Ti e maumaui loa ou kolo tau fuli,
Ofaipe le maumaui e Salemane a Pete-Alepele,
I le aso o le tau,
Leia na takatakafi ai le tinana mo ana fanau.
15Ko lena le nea e aumai loa e Petele kia koutou,
O tupu ko le lasi o lakoutou agaveli.
I le au o le ao, ti e oki ai le sau o Iselaele.
Currently Selected:
Oseo 10: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
