Kalate 5
5
Taupau ai lokoutou lauatea
1Koia, kua fakalauatea tatou e Kilisito ke tou lauatea maoki, kotou tuu mau i ai, ti aua na kotou toe tuku ke taomi koutou e le amoga o le popula.
2Ko au Paulo, leinei e pati atu kia koutou, kapau e silikosisio koutou, e leaise aoga loa Kilisito kia koutou. 3Ti e kau toe fakasa atu ki le tagata fuli leia e fia silikosisio, e maua a ia ke fai ia a nea fuli o le lao. 4Kua kotou mavae ia Kilisito, koutou fuli ala e afa ia le fakamatatonu i le lao ; kua fakaifo koutou mei le kalasia. 5Kia tatou, e tou talitali i le Laumalie ki le amanaki malie o le faitotonu leia e maua i le tui. 6Talie, ia Sesu-Kilisito, e leaise aoga le silikosisio pe ko le lee silikosisio, kae ko le tui leia e gaoi i le alofa.
7Na kotou makape malie : Ko ai leia na taofi ia koutou ke aua na kotou fakalogo ki le maoki ? 8E leaise au le nea lena mei leia e kalaga atu kia koutou : 9Ko se ga momoi fakatupu e fakatupu ia le falina katoa kua lusi. 10E kau maua le fanaki leinei kia koutou i le Aliki, e leaise kotou toe maua loa se tasi ake manatu kese. Kae ko leia e fakamaveuveu ia koutou, e tautea loa a ia e le Atua, logo ai pe ko ai a ia. 11Kae kiate au, fetaina, kapau koi kau akonaki ki le silikosisio, kolea koi fakavelivelii ai au ? Kapau koia, ti kua tiaki le akonaki o Sesu leia na tutuki i le koluse, leia ko se nea fakatupu siga kia latou ! 12Amusia ake ke tuuti latou ala e fakatupu maveuveu ia koutou !
Kanofi mo le Laumalie
13Fetaina, kua kalagai koutou ki le lauatea ; kae ke aua fua na kotou fakaliliu le lauatea lena ko se faigamalie ke kotou mauli ai i le kanofi ; kae ke kotou liliu, i le alofa, ko ni tagata fakasausau a la ki la. 14Talie e fakasoko le lao katoa i se folafola e tasi, leinei : E ke alofa loa ki lou oloi ofaipe lou alofa kiate koe totonu. 15Kae kapau e kotou feutiutiaki mo fekaiaki, kotou tokaga ke aua na kotou maumaui koutou.
Saele i le Laumalie Maokioki kae leai i le lao
16Koia e kau pati atu ai : Kotou saele i le Laumalie, ti e leaise kotou fakasoko ia loa a oli o le kanofi. 17Talie e fakafesagai a oli o le kanofi ki oli o le Laumalie, ti e fakafesagai a oli o le Laumalie ki oli o le kanofi ; e lotou fefakafesagaiaki ia latou, o tupu ke aua na kotou fai le nea leia e kotou loto ki ai. 18Kae kapau e taki koutou e le Laumalie, ti e leaise kotou fakalogo loa ki le lao.
19E mailoga malie a gaoi o le kanofi ; ko le fai feauaki, mo le kelekele, mo le fakavalevale ; 20mo le tausi taulaatua, mo le fai nea fakatemonio, mo vesia, mo fefele, mo finenonofo, mo itaita, mo vaevaega, mo magai lotu ; 21mo le manumanu, mo le inu fakavale, mo le kai fakavale, mo nea fuli ala e tatau mo nea ana. E kau fakasa fakatomua atu kia koutou, ofaipe laku fakasa atu i mua, ko latou ala e fai ia a nea ana e leaise maua ia loa le Puleaga o le Atua.
Fua o le Laumalie Maokioki
22Kae ko le fua o le Laumalie, ko le alofa, mo le fiafia, mo le tokamalie, mo le kataki fualoa, mo le agamalie, mo le fakataulalo, mo le agatonu, mo le agamalu, mo le loto lolomi ; 23e leaise fakafesagai le lao ki nea ana.
24Ko latou ala e nonofo ia Sesu-Kilisito, kua lotou tutuki ki le koluse le kanofi mo ona alofa ti mo ona oli. 25Kapau e tou mauli i le Laumalie, tou saele foki i le Laumalie.
26Aua na tou afa se kololia vaiga, o tou felotoveliaki mo tou fefinenonofoaki.
Currently Selected:
Kalate 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
