Kalate 4

1Ko leinei, e kau toe fakasa : Ko le vosa mau tofiga, i le temi katoa leia e nofo toe ai, e leaise kesekese a ia mo se tagata popula, logo ai ko le pule a ia o nea fuli ; 2talie e fakalogo a ia ki le kau tagata fai sekola mo le kau tagata taupau koloa, o kaku ki le temi leia kua fakatuutuu e lona tamana. 3Ko tatou foki, e tou tatau, i le temi leia na koi tou liliki ai, na tou popula ki makeke fakalaumalie o le malama nei ;

Kua oki le kilisiteano i le totogi mei le lao

4kae i le kaku mai o le temi leia na fakatuutuu ki ai, na kakau mai loa e le Atua lona Alo, leia na tupu mei se fafine, leia na tupu i le lao, 5o tupu ke totogi e ia latou ala na nonofo i le lao, ti ke tou tali le fufui.

E fakamaoki le Laumalie kua liliu leia e tui ko le vosa o le Atua

6Tie talie ko vosa koutou, kua kakau mai e le Atua ki otou loto le Laumalie o lona Alo, leia e kalaga : Apa ! Tamana ! 7Koia e leaise koi ke popula ai, kae ko se vosa a koe ; ti kapau ko se vosa a koe, e ke mau tofiga foki i le kalasia o le Atua.

Ko le tausi fakalao ko se lotu noa

8I mua, na leaise kotou iloa le Atua, ti na kotou tausi ki ni atua ala na leaise ko ni atua maoki ; 9kae i le temi nei kua kotou iloa ai le Atua, ti kua iloa foki koutou e le Atua, kolea e kotou toe liliu ai o tausi ki taulaatua gagae mo mativa ana e kotou loto ke kotou toe popula ki ai ? 10E kotou tausi a aso, mo masina, mo temi, ti mo fetuu ! 11E kau i na ano noa laku gaoi kia koutou.

12Fetaina, e kau kole atu kia koutou : kotou faipe au, talie ko au foki e kau faipe koutou. Na leaise kotou fai fuai se nea leia e veli kiate au. 13E kotou iloa na kau fakasa kia koutou le Evaselio i le kamataaga o tupu ko se masaki fakatino.

14Ti i lokotou asiasii e loku tino masaki, na leaise kotou vesia pe fakalialia kiate au ; kae na kotou tali au ofaipe se aselo a le Atua, ofaipe Sesu-Kilisito.

Ko le tausi fakalao na fakamamao ia le tapuakina o le kalasia i le kau Kalate

15Kofea loa le manuia leia na kotou fakasa ia ? Talie e kau fakamaoki atu kia koutou, kapau na kotou mafai ia, na kotou kape loa okoutou mata o soli mai kiate au. 16Pe kua kau liliu ko lokoutou fili i laku fakasa atu kia koutou le maoki ? 17Ko le alofa leia e lotou maua kia koutou e leaise mea, kae e lotou loto ke tatala koutou meia matou, o tupu ke kotou alofa kia latou. 18E malie le maua o le alofa ki le nea leia e malie i temi fuli ai, kae aua na gato fua mo ka kau nofo mo koutou.

E leaise feala ai ke mauli fakatasi le lao mo le kalasia

19Ei aku fanau, ala kua kau toe logoi ki ai a mamae o le fanauga, o kaku ki le katoa o Kilisito ia koutou, 20e kau fakaamu loa ke kau nofo i le lakaga nei i okoutou tafa, ti ke fetogi laku masau, talie e kau nofo i le tuania kia koutou.

Fakatata o sai e lua : Akale mo Sala

21Kotou fakasa mai kiate au, e koutou ala e loto ke fakalogo ki le lao, pe leaise kotou logo ki le nea leia e fakasa e le lao ? 22Talie kua tosi na maua e Apalaamo ni vosa e lua, ko se tasi i le fafine popula, ti ko se tasi i le fafine lauatea. 23Kae ko leia o le fafine popula na tupu a ia mei le kanofi, ti ko leia o le fafine lauatea na tupu a ia mei le fakapapau. 24Ko nea ana ko fakatata ; talie ko fafine ana ko fakapapau laua e lua. Ko le tasi o le mauga ko Sinai, leia na fanau ki le popula, ko Akale, 25talie ko Akale, ko le mauga a ia o Sinai i Alapia, ti e fai a ia pe le Selusalemi o le temi nei, leia e nofo i le popula mo ana fanau. 26Kae ko le Selusalemi mei aluga e lauatea, ko lotatou tinana a ia ;

27koia e tosi ai :

Ke ke fiafia, a koe leia e paa, a koe leia e leaise fanaunau !

Ke ke siki lou leo o kalaga fakafiafia, a koe leia na leaise iloa ia a mamae o le fanauga !

Talie ko fanau o le fafine tiakina e toka api ake loa

Ifanau o le fafine leia na avaga.

28Kia koutou, fetaina, ofaipe Isaake, ko fanau koutou o le fakapapau ; 29ti ofaipe mua, na fakavelivelii e leia na tupu i le kanofi leia na tupu i le Laumalie, e toe tatau foki i le temi nei. 30Kae kolea le pati a le Tosi ? Kapu le fafine popula mo lona vosa, talie e leaise mau tofiga fakatasi loa le vosa o le fafine popula mo le vosa o le fafine lauatea. 31Koia, fetaina, e leaise ko fanau tatou a le fafine popula, kae a le fafine lauatea.

Currently Selected:

Kalate 4: FB2000

Highlight

Copy

Compare