Efeso 6
6
Fanau mo matua
1Fanau, kotou fakalogo ki okoutou matua i le Aliki, talie e totonu le nea lena. 2Fakaapaapa ki lou tamana mo lou tinana (ko le uluaki fakatotonu a ia, ti e muli i ai se fakapapau), 3o tupu ke ke manuia mo mauli fualoa i le malama nei.
4Ti ko koutou, tamana, aua na kotou fakatupu itaita ki akoutou fanau, kae ke kotou taupau latou, o fakatonutonu latou ti mo ako latou ke popoto i le Aliki.
Pule mo tagata fakasausau
5Tagata fakasausau, kotou patigaofie ki okoutou pule fakamalama, i le i mo le lulu, i le loto faigaofie, ofaipe kia Kilisito, 6o leaise gato fua i olatou mua, o sakinake ke mata malie ki tagata, kae ofaipe ni tagata fakasausau a Kilisito, ala e fai ia i le loto katoa le finegalo o le Atua. 7Kotou tausi latou i le loto malie, o sakinake e kotou tausi le Aliki kae leai ni tagata, 8o kotou iloa e tali loa e le tagata taki toka tasi, pe popula, pe lauatea, mei le Aliki o mulimuli ki le malie leia na fai loa e ia.
9Ti ko koutou, kau pule, kotou fai fenaaki kia latou, ti aua na kotou fakaii kia latou, ke kotou iloa e nofo i le lagi lolatou pule mo lokoutou, ti e leaise kese se tasi i ona mua.
Masafu a le kilisiteano
10Fakaoki, kotou fakamakeke i le Aliki, ti kotou fakamakeke ki lona makeke mafimafi. 11Kotou kofu a masafu tau fuli o le Atua, o tupu ke mafai lakotou tuu makeke ki pikoi kaka a le Tiapolo. 12Talie e leaise tou fepoko mo le kanofi mo le toto, kae mo le kau pule, mo le kau makeke, mo le kau pule lalasi o le fakapouli, mo le kau laumalie veli i potu fakalagi. 13Koia, ke kotou too a masafu tau fuli a le Atua, o tupu ke mafai lakotou tuu i le aso veli, ti mo lakotou tuu makeke mo ka oki lakotou malo i nea fuli. 14Koia, kotou tuu makeke : kotou toi i okoutou vakavaka le kilipipi o le maoki, ti kotou tui ki le fatafata le kofu tau o le maokioki, 15ti kotou sa taka i okoutou vae ki le mafi o le Evaselio o le tokamalie ; 16ti kotou too i aluga o nea fuli le paletau o le tui, leia e kotou mafai ai loa ke tamate a gasau ulaula fuli a le tagata veli ; 17ti kotou too foki le puloga tau o le fakamauli, mo le seleta a le Laumalie, leia ko le folafola a le Atua. 18Kotou fai i temi fuli i le Laumalie a kole kesekese fuli ti mo ni tagi. Kotou tokaga ki le nea lena mo se kataki fualoa katoa, ti kotou ulufaki le kau sagato fuli. 19Kotou ulufaki au, o tupu ke soli mai kiate au, mo ka kau fakamavaa loku gutu, ke kau fakasa i le loto toa ti mo le lauatea le misitelio o le Evaselio, 20leia kua sai ai au ki ni tini ko lona fakafofoga, ti ke kau masau makeke ki ai, talie tonu ke kau masau fenaaki ki ai.
Fakaalofa
21O tupu ke kotou iloa foki le nea o uiga mo au, mo le nea e kau fai, ko Tisike, le taina alofaina mo le tagata fakasausau agatonu a le Aliki, e fakasa ia atu loa kia koutou a nea fuli. 22Kua kau kakau tafito atu a ia kia koutou, o tupu ke kotou iloa lomatou anoaga, ti ke fakafimalie e ia o okoutou loto.
23Ke soli le tokamalie, mo le alofa, ti mo le tui ki fetaina e le Atua ko le Tamana ti mo le Aliki ko Sesu-Kilisito !
24Ke nofo le kalasia ia latou fuli ala e alofa ki lotatou Aliki ko Sesu-Kilisito i se alofa lee popo.
Currently Selected:
Efeso 6: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
