Efeso 5

Mauli i le malama

1Koia kotou faifaitaki ki le Atua, ofaipe ni fanau alofaina ;

2ti kotou saele i le alofa, o faifaitaki kia Kilisito, leia na alofa kia tatou, ti na soli a ia totonu ki le Atua o tupu ko tatou, ofaipe se moliga mo se sakilifisio manogi ki le Atua.

3Ke aua na masau fua ia koutou ki le fai feauaki, mo nea fakakelekele fuli, mo le manumanu, talie e leaise gali a ia mo le kau sagato. 4Ke aua na logo ia koutou ki ni pati veveli, mo ni masau fakavale, mo ni fakasuasua, talie e leaise gali a nea ana mo le fakapoipoi ; kae ke logo tafito ki ni fakafetai. 5Talie, ke kotou iloa, e leaise tagata fai feauaki, mo se tagata fakakelekele, mo se tagata manumanu, (ko lona uiga e tausi taulaatua) e maua ia le puleaga o Kilisito mo le Atua. 6Ke aua na kakai koutou e se tasi ki ni masau vaiga ; talie ko nea ana na tupu ai le ifo o le sausau o le Atua ki fanau patigataa. 7Koia ke aua na kotou fakatasi fua i se nea mo latou,

8talie i mua na kotou fakapouli, kae i le temi nei kua kotou malama i le Aliki. Kotou saele ofaipe ni fanau o le malama ! 9Talie ko le fua o le malama ko agamalie fuli, mo faitotonu fuli, ti mo maoki. 10Kotou afa le nea leia e malie ki le Aliki ; 11kae aua na kotou kau ki gaoi lee fua a le fakapouli, kae kotou aumai latou ki le malama. 12(Talie e fakalumaluma le pati ki le nea leia e lotou fai fakafufu) 13kae kapau e fakasa a nea fuli ana ki le malama, e sa loa lolatou natula totonu, talie ko nea fuli ala e fakasa fenaaki e liliu o malama.

14Koia e pati ai :

Ke ke alaala, a koe leia e moe,

Ke ke tuu mei le kau mate,

Ti e fakamalama loa a koe e Kilisito.

15Koia kotou tokaga ai ki lakoutou saele, ke aua na kotou faipe se kau vale, kae ke kotou faipe se kau poto ; 16kotou totogi le temi, talie kua veveli a aso. 17Koia ke aua na kotou sala atamai, kae ke kotou matala ki le finegalo o le Aliki. 18Aua na kotou kona i le vino, ko le mauli fakavale a ia ; kae ke kotou apele i le Laumalie. 19Kotou fefakalotomakekeaki ki ni pesalemo, mo ni imi, ti mo ni katiko fakalaumalie, o kotou sua mo fakavikiviki ki le Aliki i lokoutou loto katoa. 20Kotou fakafetai tuumau ki le Atua le Tamana i nea fuli, i le suafa o lotatou Aliki ko Sesu-Kilisito. 21Kotou fefakataulaloaki ia koutou i le fakaapaapa kia Kilisito.

Le famili fakakilisiteano

22Fafine avaga, ke kotou tasi fakataulalo ki lona avaga, o fakatatau ki le Aliki ; 23talie ko le tagata ko le pule a ia o le fafine, ofaipe Kilisito ko le Pule a ia o le Ekelesia, leia ko lona tino, ti ko ia foki ko lona fakamauli. 24Kae, ofaipe le Ekelesia leia e fakataulalo kia Kilisito, ke fakataulalo foki le fafine ki lona avaga i nea fuli.

25Tagata avaga, kotou tasi alofa ki lona avaga, ofaipe Kilisito leia na alofa ki le Ekelesia, o soli a ia totonu o tupu ko ia, 26o tupu ke fakatapui a ia, mo fakamea a ia, ti mo fufulu a ia ki le vai o le folafola, 27talie ke fakatuu i ona mua le Ekelesia lena i lona kololia, sala ila, sala mafetufetu, sala maimoa, kae maokioki mo lee mele. 28E tonu ke alofa fenaaki le tagata ki lona avaga ofaipe lona tino totonu. Ko le tagata leia e alofa ki lana avaga e alofa kiate ia totonu. 29Talie e leikiaise tagata kua vesia ki lona tino totonu, kae e fagai e ia a ia mo tokaga ki ai, ofaipe Kilisito ki le Ekelesia, 30talie ko koga tino tatou o lona tino, o lona kanofi, mo ona ivi. 31Koia ke mavae loa le tagata mei lona tamana mo lona tinana, o pipiki loa ki lana avaga, ti e la liliu loa ko se kanofi e tasi. 32E lasi ai le misitelio lena ; e kau fakasa le nea lena o uiga mo Kilisito ti mo le Ekelesia. 33E kau fakaoki atu loa : ke tasi alofa le tagata ki lana avaga ofaipe kiate ia totonu, ti ke fakaapaapa le fafine ki lona avaga.

Currently Selected:

Efeso 5: FB2000

Highlight

Copy

Compare