Efeso 4

Pipiki tasi o le tino o Kilisito

1Koia e kau kole ai kia koutou, e au, ko le tagata pilisoni i le Aliki, ke kotou saele i se saele leia e gali mo le kalaga leia kua fai atu kia koutou, 2i le loto fakataulalo mo le agamalu katoa, mo le kataki fualoa, o kotou fekatakiaki i le alofa, 3mo kotou faiga ke kotou taupau le pipiki tasi o le Laumalie i le sai o le tokamalie. 4E i ai se tino e tasi, mo se Laumalie e tasi, ofai foki pe koutou ala na kalagai ki se amanaki malie e tasi i lokoutou vokasio ; 5e i ai se Aliki e tasi, mo se tui e tasi, mo se papitema e tasi, 6mo se Atua e tasi ko le Tamana o tagata fuli, leia e nofo i aluga o tagata fuli, ti mo tagata fuli, ti i tagata fuli.

7Kae kua soli mai kia tatou taki toka tasi le kalasia o mulimuli ki le lasi o le nea alofa o Kilisito.

8Koia e pati ai :

I lana pale ki potu taualuga, na ave e ia ni kau popula,

Ti na fai e ia ni nea alofa ki tagata.

9Kae kolea lona uiga : Na pale a ia, mo kapau na leaise ifo mua a ia ki potu taulalo o le kele ! 10Ko leia na ifo, ko ia foki leia na pale ki aluga o le atu lagi fuli, o tupu ke fakaapele e ia a nea fuli. 11Ti na soli e ia ni iki ko le kau apositolo, mo ni iki ko le kau polofeta, mo ni iki ko le kau evaselisita, mo ni iki ko le kau tausi ovi mo le kau toketa, 12ki le teuteui o le kau sagato ke malie tukupau, ti mo le fai o le gaoi o le fakasausau ti mo le faufau o le tino o Kilisito, 13o kaku ki le temi leia e tou soko fuli ai ki le pipiki tasi o le tui, ti mo le iloa o le Alo o le Atua, ki le tagata kua katoa, ki le fuafua o le lasi o le apele o Kilisito : 14Talie ke aua na tou toe fai loa pe ni toe liliki, ala e fetaaki mo feaveaki e matagi o akonaki fuli ala e fakamafola e ni tagata kaka ke fakasese ai ni iki ki alatou puleaki kaka. 15Kae i le fakasa o le maoki i le alofa, e tou tupu loa o lalasi i nea fuli i leia ko le Pule, a Kilisito. 16Ko ia leia e fakasokosoko ia a koga kesekese fuli o le tino, ti mo fakapipiki ia latou ki ni sai makeke ko se tino e tasi ; ti ko ia leia e fakatupu ia le tino o lasi o mulimuli ki le makeke leia e aoga ki le koga tino taki tasi, ti e faufau toka tasi e le tino a ia totonu i le alofa.

Mauli afea, mo le mauli foou

17Ko leinei loa le nea leia e kau fakasa mo fakamaoki i le Aliki : E leaise koi tonu ai ke kotou saele ofaipe le kau pagani, ala e saele o mulimuli ki le vaiga o olatou manatu. 18E lotou maua se atamai fakapouli, e lotou matapule ki le mauli o le Atua, o tupu ko le fakapouli leia e maua ia latou, o tupu ko le fakafefeka o olatou loto. 19Kua puli ia latou le luma, kua lotou tuku latou ki le fakavalevale, o fai a nea fakakelekele kesekese i le faifaitalisa. 20Kae ko koutou, na leaise fenaaki lakotou ako ia Kilisito, 21mo kapau foki kua kotou logo kiate ia, ti mo kapau foki kua akoi koutou iate ia, o mulimuli ki le maoki leia e maua ia Sesu. 22Koia e tonu ai ke kotou tiaki lokoutou natula mago leia e pala i oli veveli kaka, 23kae ke kotou fakafoou i le laumalie o lokoutou atamai, 24ti ke kotou kofu le tagata foou, leia na fakatupu ke tatau mo le Atua i se faitotonu mo se maokioki ala e au mei le maoki.

25Koia ke kotou tiaki le loi, kae kotou tasi masau i le maoki ki lona oloi ; talie ko koga tino koutou o le tino e tasi. 26Kapau e kotou ita, ke aua na kotou agasala ; ti ke aua na galo le laa i aluga o lokoutou ita, 27talie ke aua na kotou tuku se uluaga ki le Tiapolo. 28Ko leia na kaia ke aua na toe kaia a ia ; kae ke gaoi a ia, o fai ki ona lima le nea leia e malie, ke maua se nea leia ke soli ki leia e mativa. 29Ke aua na vilo fua mei lokoutou gutu se masau veli, kae, mo kapau e soko, se masau malie leia e aoga ki le faufau ti mo ave ia se kalasia kia latou ala e logo ki ai. 30Aua na kotou fakamamae le Laumalie Maokioki o le Atua leia na fakamailoga ia koutou ki le aso o le letamisio.

31Ke puli ia koutou a manatu kona fuli, mo loto veli, mo itaita, mo kalaga, mo fatituu, ti mo agaveli fuli. 32Ke kotou feagamalieaki ia koutou, o manavaalofa, mo fefakamolemoleaki ofaipe le fakamolemole a le Atua kia koutou ia Kilisito.

Currently Selected:

Efeso 4: FB2000

Highlight

Copy

Compare