Tetelonome 6

Koga tafito o le lao

1Ko nei a folafola, mo lao, mo lekula ala na fakatotonu e le Eteleno, lokoutou Atua ke ako atu kia koutou, o tupu ke kotou tausi latou i le fenua leia ka kotou ulu loa ki ai o maua tofiga, 2o tupu ke ke i ki le Eteleno, lou Atua, o tausi i aso fuli o lou mauli, e koe, mo lou vosa, mo le vosa o lou vosa, ana lao fuli mo ana lekula fuli ala e kau tuku kiate koe, o tupu foki ke ke fakatologa ou aso. 3Koia ke ke fakalogo loa kia latou, Iselaele, ti ke ke fai loa latou, o tupu ke ke manuia ti mo ke liuliuga o api, ofaipe lona fakasa e le Eteleno, le Atua o ou tamana, o fakapapau atu kiate koe se fenua leia e sali ai le sua manu mo le sua meli.

4Ke ke fakalogo, Iselaele ! Ko le Eteleno, lotatou Atua, ko le Eteleno a ia e tasi.

5Ke ke alofa loa ki le Eteleno, lou Atua, i lou loto katoa, mo lou laumalie katoa, mo lou makeke katoa. 6Ti ke nofo loa i lou loto a folafola anei ala e kau tuku atu kiate koe i le aso nei. 7Ke ke ako loa latou ki au fanau, ti ke ke masau loa kia latou mo ka ke nofo loa i lou fale, mo ka ke fanoga loa, mo ka ke moe loa, ti mo ka ke ala ake loa i lau moe. 8Ke ke nonoa loa latou ki ou lima ofaipe se fakamailoga, ti ke lotou fai loa pe se palaa i lou lae.

9Ke ke tosi loa latou ki pou o lou fale mo ou matapa.

10I le aso leia e fakaulu ai loa a koe e le Eteleno ki le fenua leia na fakapapau e ia ki ou tamana, ko Apalaamo, mo Isaake, mo Sakopo, ke soli atu kiate koe, e ke maua loa i ai ni kolo lalasi mo fulumalilie ala na leaise ke fakatuu ia, 11mo ni fale ala kua apelepele i koloa kesekese ala na leaise ke tanaki ia, mo ni sosoni ala na leaise ke kenu ia, mo ni faisaga vite, mo ni faisaga olive ala na leaise ke to ia. 12Ka ke kai loa lau nea kai o ke makona, ke ke tokaga ai na galo le Eteleno, leia na fakamavae ia a koe mei le fenua o Esipito, leia na ke popula ai. 13Ke ke fakaapaapa loa ki le Eteleno, lou Atua, ti mo ke atolasio loa kiate ia toka tasi, ti mo ke fai loa au fakapapau i lona suafa. 14Ke aua na kotou ano loa ki ni iki ake atua kese, ki atua o puleaga ala e nonofo i okoutou tafatafa ; 15Talie ko le Eteleno, lou Atua, ko se Atua finenonofo a ia i loto malie o ou. Talie e mu loa le sausau o le Eteleno kiate koe, ti e maumaui loa e ia a koe i aluga o le kele. 16Ke aua na kotou asiasii loa le Eteleno, lokoutou Atua, ofaipe lakoutou asiasii a ia i Masa. 17Kae ke kotou tausi malie loa a folafola a le Eteleno, lokoutou Atua, mo lao mo lekula ala na fakatotonu atu e ia kia koutou. 18Ke ke fai loa le nea leia e totonu mo le nea leia e malie ki mata o le Eteleno, o tupu ke ke manuia loa, ti mo ke ulu loa o maua tofiga le fenua malie leia na fakapapau e le Eteleno ki ou tamana ke soli atu kiate koe, 19mo ka oki loa lana kapu ou fili i ou mua, ofaipe lona fakasa e le Eteleno. 20Ka vesili atu loa i se aso lou vosa kiate koe : Kolea na tuku atu ai e le Eteleno kia koutou a folafola, mo lao, mo lekula ana ? 21Ke ke tali loa ki lou vosa : Na motou popula kia Falaone i Esipito, ti na fakamavae loa matou e le Eteleno mei Esipito ki lona lima makeke. 22Na fai loa e le Eteleno, i omatou mata, ni milakulo, mo ni nea fakaofolele lalasi mo fakaii, ki Esipito, mo Falaone, mo lona fale katoa. 23Ti na fakamavae loa e ia matou mei ai, o aumai matou ki le fenua leia na fakapapau e ia ki omatou tamana ke soli kia matou. 24Na fakatotonu loa e le Eteleno kia matou ke motou fai a lao mo lekula fuli ana, ti ke motou i ki le Eteleno, lomatou Atua, o tupu ke motou manuia tuumau, ti ke tausi e ia omatou mauli, ofaipe lana fai i le aso nei. 25E motou maua loa le maokioki mo ka e motou tokaga loa o fai a lao fuli ana i mua o le Eteleno, lomatou Atua, o mulimuli ki lana fakatotonu mai kia matou.

Currently Selected:

Tetelonome 6: FB2000

Highlight

Copy

Compare