Tetelonome 7

E tonu ke maumaui le kau Kanaane

mo olatou taulaatua

1Ka fakaulu loa a koe e le Eteleno, lou Atua, ki le fenua leia ka ke maua tofiga loa, ti ka kapu loa e ia i ou mua ni puleaga api : le kau Iti, mo le kau Kilikasi, mo le kau Amole, mo le kau Kanaane, mo le kau Pelesi, mo le kau Evi, mo le kau Sepusi, ko puleaga e fitu ala e lalasi ake mo makeke ake iate koe, 2E tuku atu loa e ia latou kiate koe, ke ke pule kia latou, ti e ke malo loa ia latou, ti e ke tamate loa latou. Ke aua na ke fai loa se sai mo latou, ti ke aua na ke maua ia loa se ga alofa fakaikiiki fua kia latou. 3Ke aua na ke fai ia loa se avaga mo puleaga ana : ke aua na ke soli loa ou taineliki ki olatou vosa, ti ke aua na ke too ia loa olatou taineliki ki ou vosa ; 4talie e lotou fakamaliu ia loa ou vosa meiate au, o lotou tausi loa ki ni atua kese, ti e mu loa le sausau o le Eteleno kia koutou : Ti e maumaui loa e ia koutou fakafokifa.

5Kae ko leinei le nea leia e kotou fai loa kia latou : Ke kotou maumaui loa olatou aletale, ti ke kotou fatifatii loa olatou fakatata fatu, ti ke kotou tutuuti loa olatou pou tapu, ti ke kotou tutu loa i le afi olatou taulaatua.

6Talie ko se kakai a koe leia kua fakatapui ki le Eteleno, lou Atua. Ti kua filifili a koe e le Eteleno, lou Atua, ke ke liliu ko se kakai alofaina kiate ia, i kakai fuli ala e maua i aluga o le kele. 7Na leaise tuku e le Eteleno lona alofa mo lana filifili kia koutou, o tupu e kotou api ake i puleaga fuli ; talie koutou ikiiki oki i kakai fuli o le kele. 8Kae na alofa le Eteleno kia koutou, ti na fakasoko e ia le fakapapau leia na fai e ia ki okoutou tamana. Koia na fakamavae ai koutou e le Eteleno ki lona lima makeke, ti na fakalauatea ai koutou e ia mei le popula, meia Falaone, sau o Esipito. 9Koia, ke ke iloa ko le Eteleno ko lou Atua, ko le Atua a ia e tasi, ko le Atua agatonu : E taupau e ia lana sai mo lona manava alofa o kaku ki le afe o tautupu kia latou ala e alofa kiate ia, mo tausi ia ana folafola. 10Kae fakatuaa loa e ia latou ala e vesia kiate ia, ti e tamate e ia latou ; e leaise toe fai fakatuvai e ia ki leia e vesia kiate ia : E tuku fakasako e ia kiate ia lona tua.

11Koia ke ke tausi ai loa a folafola, mo lao, mo lekula ala e kau soli kiate koe i le aso nei, o fai latou.

12Kapau e kotou fakalogo loa ki lekula ana, ti mo kotou tausi loa latou, ti mo kotou fai loa latou, ti e taupau loa e le Eteleno, lou Atua, lana sai mo lona manava alofa kiate koe, ala na fai e ia ki ou tamana. 13E alofa loa a ia kiate koe, ti e tapuaki loa a ia kiate koe, ti e liuliuga loa e ia a koe. E tapuaki loa a ia ki fua o lou manava mo fua o lou kele, ki lau fulumeto, mo lau vino foou, mo lau lolo, ki le fua o lau kau pipi fafine, mo le fua o lau kau ovi fafine, i le fenua leia na fakapapau e ia ki ou tamana ke soli atu kiate koe. 14E tapuaki loa a ia kiate koe o lasi ake i kakai fuli ; e leaise maua loa iate koe se tagata pe ko se fafine paa, pe ko se manu paa i au kau manu. 15E fakamamao loa e le Eteleno iate koe a masaki fuli ; e leaise tuku loa e ia kiate koe a masaki veveli ala na ke iloa i Esipito, kae tuku loa e ia latou kia latou fuli ala e vesia kiate koe.

16Ke ke tamate loa a kakai fuli ala e tuku atu loa kiate koe e le Eteleno, lou Atua. Ke aua na maua loa e lou mata se alofa kia latou, ti ke aua na ke tausi loa ki olatou atua, talie ko se masele loa a ia kiate koe. 17Kapau e ke pati loa i lou loto : e api ake a puleaga anei iate au, pe feaki loa laku kapu latou ? 18Ke aua na ke i kia latou. Kae ke ke manatui le nea leia na fai e le Eteleno, lou Atua, kia Falaone mo Esipito katoa, 19a asiasi lalasi ala na tio ki ai ou mata, mo milakulo, mo nea fakaofolele, mo le lima makeke mo le lima falo, i le aso leia na fakamavae ai a koe e le Eteleno, lou Atua. Ko lena le nea leia e fai loa e le Eteleno, lou Atua, ki kakai fuli ala e ke i ki ai. 20E kakau foki e le Eteleno, lou Atua, ni lago utiuti kia latou, o kaku ki le maumaui o latou ala na sao loa ti na mumuni loa i ou mua. 21Ke aua na ke i o tupu ko latou ; talie e nofo le Eteleno, lou Atua, i loto malie o ou, le Atua lasi mo fakaii. 22E kapu mamalie loa e le Eteleno, lou Atua, a puleaga ana o mamao mei ou mata. E leaise feala loa ke ke tamate latou i se temi e tasi, ke aua na tupu loa o lasi a manu o le vao kiate koe. 23E tuku loa latou kiate koe e le Eteleno, lou Atua ; ti e kapu loa e ia latou o kaku ki lolatou maumaui fuli. 24E tuku loa e ia olatou sau ki ou lima, ti e ke fakapuli loa olatou igoa i lalo o le lagi : e leaise toe tuu loa se tasi i ou mua, o kaku ki lau maumaui latou fuli. 25Ke kotou tutu loa i le afi a fakatata o olatou atua. Ke aua na ke manumanu loa ki le paaga, mo le aulo o puleaga ana, ti ke aua na ke too loa a nea ana ma au, o tupu na liliu loa a nea ana kiate koe ko se masele ; talie e fakalialia ki ai le Eteleno, lou Atua. 26Ke aua na ke fakaulu loa ki lou fale se nea fakalialia, o tupu ke aua na ke liliu loa o fakalialia pe ia ; kae ke ke tio loa ki le nea lena ofaipe se nea fakalialia mo fuluveli, talie ko se nea fakamalaia ai a ia.

Currently Selected:

Tetelonome 7: FB2000

Highlight

Copy

Compare