Tetelonome 5
5
Folafola e kau agafulu
1Na fakatasii loa e Moisese a fanau fuli o Iselaele, o pati kia latou : Fakalogo mai, Iselaele, ki lao mo lekula ala e kau fakasa i le aso nei ki lou taliga. Ke kotou ako latou, ti ke kotou tausi latou.
2Na fai e le Eteleno, lotatou Atua, se fakapapau mo tatou i Olepe. 3Na leaise fai e ia le fakapapau lena mo otatou tamana, kae mo tatou, ala e nonofo i leinei i le aso nei, koi mauuli fuli. 4Na masau le Eteleno kia koutou, a mata ki mata i le mauga, mei loto malie o le afi. 5Ti na kau tuu loa i le vasa o le Eteleno mo koutou, o fakasa kia koutou le folafola a le Eteleno, talie na kotou i ki le afi, ti na leaise kotou pale loa ki le mauga. Na pati loa a ia :
6Ko au ko le Eteleno, lou Atua, leia na fakamavae ia a koe mei le fenua o Esipito, leia na ke popula ai.
7Ke aua na ke maua loa ni atua kese iate au.
8Ke aua na ke fai ia loa se fakatata, pe ko se paaki o se nea fua e tasi i nea ala e maua i aluga i le lagi, mo aluga o le kele, mo le vai o taulalo ake i le kele.
9Ke aua na ke punou loa i mua o nea ana, ti aua na ke tausi loa kia latou ; talie ko au ko le Eteleno, lou Atua, ko au ko se Atua finenonofo, leia e tautea ia le agasala a tamana ki vosa o kaku ki le tolu mo le fa o tautupu o latou ala e vesia kiate au, 10kae e fakasa ia lona manava alofa o kaku ki le afe o tautupu kia latou ala e alofa kiate au ti mo tausi aku folafola.
11Ke aua na ke too fakafuanoa loa le suafa o le Eteleno, lou Atua ; talie e leaise tuku loa e le Eteleno ke sala tautea leia e takua noa ki lona suafa.
12Ke ke tausi loa le aso o le sapato, o fakatapui a ia, ofaipe le fakatotonu atu kiate koe e le Eteleno, lou Atua. 13Ke ke gaoi loa i aso e ono, ti ke ke fai loa i ai au gaoi fuli. 14Kae ko le fitu o aso ko le sapato loa a ia a le Eteleno, lou Atua : Ke aua na ke fai loa se gaoi, e koe, mo lou vosa, mo lou taine, mo lau tagata fakasausau, mo lau fafine fakasausau, mo lau pipi tagata, mo lau asino tagata, mo lau kau manu katoa, mo le matapule leia e nofo i lou fale, o tupu ke malolo lau tagata fakasausau mo lau fafine fakasausau ofaipe koe. 15Ke ke manatui loa na ke popula i le fenua o Esipito, ti na fakamavae a koe mei ai e le Eteleno, lou Atua, ki lona lima makeke : koia na fakatotonu ai kiate koe e le Eteleno, lou Atua, ke ke tausi le aso o le malolo.
16Ke ke fakaapaapa ki lou tamana mo lou tinana, o fai ki le fakatotonu atu kiate koe e le Eteleno, lou Atua, o tupu ke tologa ou aso, ti mo ke manuia i le fenua leia e soli atu kiate koe e le Eteleno, lou Atua.
17Ke aua na ke tukipo loa.
18Ke aua na ke tono loa.
19Ke aua na ke kaia loa.
20Ke aua na ke fakamaoki loi loa ki lou oloi.
21Ke aua na ke oli loa ki le avaga o lou oloi ; ke aua na ke manumanu loa ki le fale o lou oloi, pe ko lana faisaga, pe ko lana tagata fakasausau, pe ko lana fafine fakasausau, pe ko lana pipi tagata, pe ko lana asino tagata, pe ko se nea fua o lona fale.
Moisese, le fakasoko pati
22Ko na folafola ala na fakasa e le Eteleno ki le fakatasi katoa o fanau a Iselaele, i se leo makeke, mei loto malie o le afi, mo le afu, mo le ao matotolu. Na leaise toe tuku loa e ia se tasi ake folafola. Na tosi loa e ia latou i ni fatu e lua ti na tuku mai loa e ia laua kiate au.
23I le temi leia na kotou logo ai ki le leo mei loto malie o le fakapouli, kae na ulaula katoa loa le mauga, na fakafeofi mai loa kiate au a pule mo fakamatuatua fuli o okoutou faasiga, 24ti na kotou pati loa : Ko leinei kua fakatio matou e le Eteleno, lomatou Atua, ki lona kololia mo lona lasi, ti kua motou logo ki lona leo mei loto malie o le afi. I le aso nei, kua motou tio na masau le Atua ki le tagata, ti na lotou mauli. 25Kae kolea e tuku ai loa matou ke mamate i le aso nei ? E tutu loa matou e le afi lasi lena. Kapau e motou toe logo loa ki le leo o le Eteleno, lomatou Atua, ti e motou mamate loa. 26Talie ko ai leia kua logo i se aso, ofaipe matou, ki le leo o le Atua mauli leia e masau mei loto malie o le afi, ti na toe mauli ? 27Fakafeofi a koe, o fakalogo ki nea fuli ala e fakasa loa e le Eteleno, lotatou Atua ; ti ke toe fakasa mai loa kia matou a nea fuli ala e fakasa atu loa e le Eteleno kiate koe. E motou fakalogo loa ki ana folafola ti e motou fai loa latou.
28Na logo loa le Eteleno ki akoutou masau i le temi leia na kotou masau mai ai kiate au, ti na pati mai loa le Eteleno kiate au : Kua kau logo ki masau ala na fai atu e le kakai lena kiate koe : e malie a nea fuli ala kua lotou masau ki ai. 29Amusia ake ke lotou maua tuumau le loto malie lena, o i kiate au, mo fia tausi aku folafola, o tupu ke lotou manuia o lee gato, latou mo alatou fanau ! 30Ano, o pati kia latou : ke kotou toe liliu ki okoutou falela. 31Kae ko koe, nofo i leinei mo au, ti e kau fakasa loa kiate koe a folafola fuli, mo lao, mo lekula, ala ke ke ako loa kia latou ke lotou fai latou i le fenua leia e kau soli kia latou mo tofiga. 32Koia ke kotou tokaga ai o fai le nea leia na fakatotonu kia koutou e le Eteleno, lokoutou Atua. Ke aua na kotou maliu loa ki le fetuu atamai pe ko le fetuu sema. 33Ke kotou mulimuli katoa i le ala leia na fakatotonu atu kia koutou e le Eteleno, lokoutou Atua, o tupu ke kotou mauli loa ti ke kotou manuia loa, o tupu ke kotou fakatologa loa okoutou aso i le fenua leia ka kotou maua tofiga loa.
Currently Selected:
Tetelonome 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
