Tetelonome 20
20
Lao o le tau
1Ka ke ano loa o tau ki ou fili, ti ke tio loa ki ni osi, mo ni saliote mo se kakai leia e api ake iate koe, ke aua na ke i loa kia latou ; talie ko le Eteleno, lou Atua, leia na fakamavae ia a koe mei Esipito, e kau loa mo koe.
2I le ofi ki le tau, e au loa le tagata faisakilifisio ki mua o le kakai, o masau kiate ia. 3E pati loa a ia : Fakalogo mai, Iselaele ! I le aso nei e kotou ano loa o taui okoutou fili. Ke aua na kotou loto gaegae ; ke aua na kotou i, ke aua na kotou lulu, ke aua na kotou liliko i olatou mua. 4Talie e saele le Eteleno, lokoutou Atua, mo koutou, o tau mo koutou ki okoutou fili, o tupu ke fakamauli koutou.
5Ti e masau loa le kau ofisa ki le kakai, o lotou pati loa : Ko ai leia na fakatuu ia se fale foou, kae e leikiaise nofo a ia i ai ? Ke mavae a ia, ti ke toe liliu a ia ki lona kaiga, na mate loa a ia i le tau, kae nofoi loa lona fale e se tasi ake. 6Ko ai leia na to ia se vite, kae e leikiaise kai a ia ki uluaki fua o lana vite ? Ke mavae a ia, ti ke toe liliu a ia ki lona kaiga, na mate loa a ia i le tau, kae kai loa e se tasi ake a uluaki fua o lona vite. 7Ko ai leia kua feauaki mo se taine kae e leikiaise too e ia a ia ? Ke mavae a ia ti ke toe liliu a ia ki lona kaiga, na mate loa a ia i le tau kae too loa lona avaga e se tasi ake. 8E toe masau loa le kau ofisa ki le kakai, o pati : Ko ai leia e i ti mo loto gaegae ? Ke mavae a ia ti ke toe liliu a ia ki lona kaiga, o tupu ke aua na toe loto gaegae foki ona fetaina ofaipe ia. 9Ka oki loa le masau a le kau ofisa ki le kakai, e lotou fakanofo loa ni pule ke taki ia a kau tau.
Tau o kolo
10Ka ke fakafeofi loa ki se kolo ke taui a ia, e ke fakasa loa kiate ia le tokamalie. 11Ti kapau e tali atu a ia kiate koe ki le tokamalie ti e fakamavaa atu loa e ia ona matapa kiate koe, ko le kakai katoa leia e nofo loa i loto o le kolo e fakalogo loa kiate koe ti e fakasausau loa kiate koe. 12Kae kapau e leaise tali e ia le tokamalie mo koe, kae tau atu loa a ia kiate koe, ti e ke taui loa le kolo lena. 13E tuku atu loa a ia e le Eteleno, lou Atua, ki ou lima, ti e ke tamate loa ki le seleta a tagata fuli. 14Kae e ke too loa kiate koe a fafine, mo toe, mo manu, mo nea fuli ala e maua loa i le kolo, io le koloa katoa o le tau, ti e ke kai loa le koloa o ou fili ala e tuku atu loa e le Eteleno lou Atua kiate koe. 15Ko lena le nea leia e ke fai loa ki kolo fuli ala e mamao meiate koe, ti e leaise kau ki kolo o puleaga anei. 16Kae ki kolo o puleaga ala e soli atu loa kiate koe e le Eteleno, lokoutou Atua, ke ke maua tofiga lolatou fenua, ke aua na ke tuku loa le mauli ki se nea leia e tukumanava. 17Talie e ke maumaui katoa loa a puleaga ana, le kau Iti, mo le kau Amole, mo le kau Kanaane, mo le kau Pelesi, mo le kau Evi, mo le kau Sepusi, o mulimuli ki le fakatotonu leia na tuku kiate koe e le Eteleno, lou Atua, 18o tupu ke aua na lotou ako ia loa kia koutou ke fakatautau o nea fakalialia fuli ala e lotou fai ki olatou atua, ti ke aua na kotou agasala ai loa ki le Eteleno, lokotou Atua.
19Kapau e ke fai loa se tau ki se kolo o fualoa i mua o lau maua a ia, aua na ke maumaui loa a laakau kai ki le toki, e ke kai loa olatou fua, kae e leaise ke sele loa latou ki le kele ; talie e leaise ko se tagata le laakau o le faisaga ke ke taui a ia. 20Kae e feala loa ke ke maumaui mo ke sele a laakau fuli ala e ke iloa e leaise kai ia a fua, o ke fakaaoga loa latou ki le fau palepale ke taui ai le kolo, o kaku ki lona vilo.
Currently Selected:
Tetelonome 20: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
