Tetelonome 21
21
Le afa o se tagata tukipo
1Kapau, i le fenua leia e soli atu loa kiate koe e le Eteleno, lou Atua, ke ke maua tofiga, e maua loa i se faisaga se tagata leia kua mate na tamate, kae e leaise iloa pe ko ai leia na tamate ia a ia, 2E ano loa ou tagata fakamatuatua mo ou tui fakamaau o fua a vasa mei le tagata mate ki kolo ala e takatakai ia a ia. 3Ka maua loa le kolo leia e ofi ake ki le mate, e too loa e tagata fakamatuatua o le kolo lena se pipi fafine muli leia e leikiaise fakagaoi ti e leikiaise amo ia se laakau taki. 4E fakaifo loa le pipi fafine muli ki se liua leia e sali tuumau ti e leaise tuu ai se faisaga i ona kauvai ; ti e lotou tamate loa le pipi fafine muli, i tafa o le liua. 5E fakafeofi ake loa a tagata faisakilifisio, vosa o Levi ; talie ko latou ala na filifili e le Eteleno, lou Atua, ke tausi kiate ia, ti ke tuku ia le tapuaki i le suafa o le Eteleno, ti ke fakatokatoka ia a visi fuli mo lavea fuli. 6Ti e fanofano loa a tagata fakamatuatua fuli o le kolo leia na ofi ki le mate, olatou lima i aluga o le pipi fafine muli leia na tamate. 7Ti e lotou fakasa loa o feneeki : na leaise liligi e omatou lima le toto lena, ti na leaise tio omatou mata ki lona liligi. 8Eteleno, fakamolemole ki lou kakai ko Iselaele, leia na ke totogi. Aua na ke tuku le toto mea ki lou kakai ko Iselaele, ti e leaise tuku loa kiate ia le toto lena. 9Koia e tonu ai ke ke fakapuli mei loto malie o ou a toto mea fuli ala na liligi, o fai le nea leia e totonu ki mata o le Eteleno.
Ko fafine pilisoni i le tau
10Ka ke ano loa o tau ki ou fili, ti kapau e tuku atu loa latou ki ou lima e le Eteleno, o ke fai loa ni kau pilisoni, 11e feala loa ke ke tio i le kau fafine pilisoni ki se fafine tupulaga, ti ke mamana loa ki ai, o ke fia avaga loa mo ia. 12Koia e ke ave loa a ia ki lou loto fale. E tele loa lona ulu ti e tuuti loa ona matininia, 13E sau loa e ia ona teu pilisoni, ti e nofo loa a ia i lou loto fale, ti e tagi loa a ia ki lona tamana mo lona tinana i se masina katoa. I le oki o le nea lena, e ke ano loa kiate ia, ti e ke too loa a ia ma au, ti e liliu loa a ia ko lou avaga. 14Kapau ki muli, e gato loa lona malie kiate koe, e ke tuku loa a ia ke ano ki le ganea leia e loto loa a ia ki ai, e leaise feala loa ke ke fakatau a ia ki se paaga, pe ke fai kiate ia ofaipe se fafine popula, talie kua ke fakamamae a ia.
Ko le vosa uluaki
15Kapau e maua loa e se tagata ni avaga e lua, ti e alofa loa a ia ki se tasi fafine o lasi ake i leia ake fafine, ti kapau e maua loa e ia ni vosa, ti ko le uluaki ko le vosa a ia o le fafine leia e leaise alofa a ia ki ai, 16e leaise feala loa, i le aso leia e vae ai loa e ia le tofiga ki ona vosa, ke soli loa e ia le pule o le uluaki ki le vosa o le fafine leia e alofa a ia ki ai, o fakamuamua loa a ia i le vosa o le fafine leia e leaise alofa a ia ki ai, kae ko le uluaki a ia. 17Kae e fakamaoki loa e ia ko le uluaki ko le vosa o le fafine leia e leaise alofa a ia ki ai, ti e soli loa e ia kiate ia ni vaega e lua i ana nea fuli ala e maua e ia. Talie ko le vosa lena ko le uluaki fua a ia o lona makeke, ti ko ia leia e tonu ke maua ia loa le pule o le uluaki.
Ko le vosa patigataa
18Kapau e maua loa e se tagata se vosa patigataa mo fakatutuu, leia e leaise fakalogo loa ki le leo o lona tamana mo lona tinana, ti kapau e la tautea loa a ia kae e leaise fakalogo loa a ia kia laua, 19e too loa a ia e le tamana mo le tinana, o ave ki le kau fakamatuatua o lona kolo, i le matapa o le ganea leia e nofo ai a ia. 20E la fakasa loa ki le kau fakamatuatua o lona kolo : ko leinei loma vosa, leia e patigataa ti e fakatutuu, leia e leaise fakalogo mai kia maua, leia e fai nea fakavale ti mo inu kava. 21Ti e tuki fatui loa a ia ke mate e tagata fuli o lona kolo. E ke sau loa i ai le veli mei loto malie o ou, o tupu ke logo Iselaele katoa ti ke i a ia.
Ko mate tautau
22Kapau e tamate loa se tagata, leia na fai ia loa se agasala leia e tonu ke fakatuaa ki le mate, o ke tautau loa a ia ki se laakau, 23e leaise ke tuku loa le mate ke tau i le laakau i le pouli ki le ao. Kae e ke tanu loa a ia i le aso lena, talie ko leia e tau i le laakau ko se malaia a ia i mua o le Atua, ti e leaise ke fakakelekele loa le fenua leia e tuku atu loa kiate koe e le Eteleno, lou Atua, ke ke maua tofiga.
Currently Selected:
Tetelonome 21: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
