Tetelonome 19
19
Kolo ulufaga
1Ka kapu loa e le Eteleno, lou Atua, a puleaga kae tuku atu loa e ia kiate koe lolatou fenua, ka ke kapu ia loa latou kae ke nofo loa i olatou kolo mo olatou fale, 2e ke filifili loa ni kolo e tolu i loto malie o le fenua leia e tuku atu loa kiate koe e le Eteleno, lou Atua, ke ke maua tofiga. 3E ke foa loa ni ala ki kolo ana, ti e ke vae tolu loa le fenua leia e soli atu loa kiate koe e le Eteleno, lou Atua, ke ke maua tofiga. Ko le nea lena, o tupu ke feala le sola o le tagata tukipo ki kolo ana. 4E fakatuu le lao lena ki le tagata leia na fai ia se tukipo i se tutamaki kae na leaise nofo a ia mo sona vesia ki leia kua mate, o tupu ke feala ke sola a ia ki se kolo i kolo ana ti ke saofaki ai lona mauli. 5Ko nei ni faifaitakiaga : E fai la pe se tagata leia na ano mo se tasi tagata ki le vao matua o ta laakau. Na siki loa e ia lana toki o tuuti se laakau, ti na masau loa le matai toki i le kau o le toki o tau ki lona soa o tupu ai lona mate. Ko le tagata lena na fai ia le tutamaki e feala loa ke sola ki se kolo i kolo ana ke saofaki ai lona mauli. 6E leaise tonu loa ki le tagata totogi toto, i le lasi o lona ita, ke tuli e ia ti ke maua e ia le tagata tukipo o tamate, o tupu ko le loa o le ala. Talie e leaise tonu ke mate le tagata tukipo, talie na leaise nofo a ia i mua mo sona ita ki le tagata leia kua mate. 7Koia leia e kau tuku atu ai kiate koe le fakatotonu leinei : Ke ke filifili loa kiate koe ni kolo e tolu. 8Kapau e fakalasi loa e le Eteleno, lou Atua, lou fenua, ofaipe lana fakapapau ki ou tamana, ti kapau e soli atu loa e ia kiate koe le fenua katoa leia na fakapapau e ia ke soli ki ou tamana, - 9koleia fua, e ke tausi loa mo ke fai loa a folafola fuli ana e kau tuku kiate koe i le aso nei, ti e ke alofa loa ki le Eteleno, lou Atua, ti e ke saele tuumau loa i ona ala, - e ke toe fakalasi loa a kolo ana e tolu ki ni iki ake a kolo e tolu, 10o tupu ke aua na liligi loa le toto mea i loto malie o le fenua leia e soli atu kiate koe e le Eteleno, lou Atua, ke ke maua tofiga, ti ke aua na ke agasala loa i se tukipo.
11Kae kapau e sola loa se tagata ki se kolo o kolo ana, kae na teuteui e ia ni puleaki veveli i lona vesia ki lona oloi, ti na lama e ia a ia o taai o tupu ai lona mate, 12e kakau loa e le kau fakamatuatua o le kolo ke too a ia o tuku ki lima o le tagata totogi toto, o tupu ke tamate a ia. 13Ke aua na maua loa e lou mata se alofa kiate ia, kae e ke too loa mei Iselaele le toto o le tagata mea, ti e ke manuia loa.
Lao o koiga
14Ke aua na ke fetogi loa a koiga o lou kaiga ala na fakatuu e ou tupuaga, i le tofiga leia e ke maua loa mei le Eteleno i le fenua leia e soli atu loa kiate koe e le Eteleno, lou Atua.
Lao o tagata fakamaoki
15E leaise feauga le fakamaoki a le tagata e toka tasi ke tuku ai se sala ki se tagata, pe ko se agasala, pe ko se tasi nea veli leia e feala ke fai. Koi maoki se nea mo ka e fakamaoki ki ai ni tagata e toka lua pe toka tolu.
16Kapau e tuu ake loa se tagata o fakamaoki loi ki se tasi tagata o uiga mo se sala, 17e ano loa a tagata ana e visi ki le Eteleno, i mua o tagata faisakilifisio mo tui fakamaau ala e gaoi i aso ana. 18E fai loa e tui fakamaau se afaafa totonu. Pe ko le tagata fakamaoki ko se tagata fakamaoki loi, pe na fai e ia ni fakamatala loi ki lona taina, 19ti e kotou fai loa kiate ia le nea leia na loto a ia ke fai ki lona taina. E ke too loa i ai le veli i loto malie o Iselaele. 20E logo loa ki ai a la ake, ti e lotou i loa, ti e leaise toe soko loa le nea veli lena i loto malie o Iselaele. 21Ke aua na alofa loa lou mata : ko le mauli ki le mauli, ko le fa mata ki le fa mata, ko le nifo ki le nifo, ko le lima ki le lima, ko le vae ki le vae.
Currently Selected:
Tetelonome 19: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
