Kolose 4
4
1Pule, kotou soli ki akoutou tagata fakasausau le nea leia e totonu mo feauga, o kotou iloa e i ai lokoutou Pule foki i le lagi.
Tokoi mo fakaalofa
2Kotou kataki fualoa i le faikole, kotou alaala i ni faikole mo ni fakafetai ki le Atua. 3Kotou ulufaki foki maua, o tupu ke fakamavaa e le Atua kia maua se matapa o uiga mo le folafola, ti ke feala ke kau fakasa le misitelio o Kilisito, leia e tupu ai laku nofo i tini anei, 4ti ke kau fakasa le misitelio a ia o mulimuli ki le nea leia e tonu ke kau fakasa ia.
5Kotou saele tokaga kia latou ala e nonofo i fafo, ti kotou totogi le temi.
6Ke ano tuumau le kalasia i akoutou masau, ti ke fakakonakona latou e le patai, o tupu ke kotou iloa le tali leia e aoga ki le tagata taki toka tasi.
7Ko Tisike, le taina alofaina, ti ko le tagata fakasausau agatonu, loku kaukau nea popula i le gaoi ki le Aliki, e fakasa ia atu loa kia koutou a nea fuli o uiga mo au. 8E kau kakau atu a ia kia koutou, o tupu ke kotou iloa loma anoaga, ti ke fakapelepelei e ia okoutou loto. 9E kau kakau atu a ia mo Onesimo, le taina agatonu mo alofaina, leia ko se tasi o koutou. E la fakamatala atu loa kia koutou a nea fuli ala e soko i leinei.
10Ko Alisitake, loku kaukau nea i le pilisoni, e fakaalofa atu kia koutou, tatau mo Maleko, le taina mataitama o Palenapa, (leia kua kotou maua ni fakatotonu o uiga mo ia, kapau e natu a ia kia koutou, kotou tali fakamalie a ia) ; 11ko Sesu, leia e igoa ko Susitusi, e fakaalofa atu foki kia koutou. Ko latou ana toka tolu e tefua i le kau Sutea, e gaoi mo au ki le Puleaga o le Atua, ti na lotou fakapelepelei loku loto. 12Ko Epafalasi, leia ko se tasi o koutou, e fakaalofa atu kia koutou ; ko le tagata fakasausau a ia a Sesu-Kilisito, e leaise toe gato lana tau kia koutou i ana faikole, o tupu ke kotou tuu makeke ofaipe ni tagata kua katoa, o nofo fakalogo ki le fai o le finegalo katoa o le Atua. 13Talie e kau tuku le fakamaoki kia koutou, e nofo a ia mo se loto tokaga lasi ai kia koutou, mo latou o Laotise, ti mo latou o Ielapolisi. 14Ko Luka, le toketa alofaina, e fakaalofa atu kia koutou, ti mo Temasi.
15Fakaalofa atu ki fetaina ala e nonofo i Laotise, mo Nifase, ti mo le Ekelesia leia i lona fale.
16Ka oki loa le lau o le tosi leinei ia koutou, kotou faiga ke toe lau a ia i le Ekelesia o le kau Laotise, ti ke kotou lau foki le tosi leia ka kaku atu loa kia koutou mei Laotise. 17Ti kotou pati kia Alikipe : tokaga ki le gaoi leia kua ke tali mei le Aliki, o tupu ke ke fai fakamalotoloto a ia.
18E kau fakaalofa atu kia koutou, a au Paulo, i loku lima totonu. Kotou manatui mai oku tini.
Ke nofo ia koutou le kalasia !
Currently Selected:
Kolose 4: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
