Kolose 3
3
Le mauli foou ia Kilisito
1Koia kapau kua kotou toe tuuake mo Kilisito, kotou afa a nea o aluga, i le ganea leia kua nofo ai Kilisito i le lima atamai o le Atua. 2Kotou pipiki ki nea o aluga, kae aua ki nea ala i le malama nei. 3Talie kua kotou mate, ti kua fufu lokoutou mauli mo Kilisito i le Atua.
4Ka sa mai loa Kilisito, ko lokoutou mauli, e kotou sa loa mo ia i le kololia.
5Koia ke kotou tamate le nea leia, i okoutou koga tino, e kau ki le malama nei, le fai feauaki, mo le aga fakakelekele, mo oli fakavale, mo oli veveli, ti mo le manumanu, leia ko se tausi taulaatua. 6Talie ko nea ana e tupu ai le vilo o le sausau o le Atua ki vosa o le patigataa ; 7ala na kotou saele ai foki i mua, i le temi leia na kotou mauli ai i agasala ana. 8Kae i le temi nei, ke kotou fakafiti ki nea fuli ana, ki le itaita, mo le masau makeke, mo le agaveli, mo le fatufatu, ti mo masau veveli ala e feala ke au mei okoutou gutu.
9Aua na kotou feloiaki, talie kua kotou tiaki le tagata afea mo ana gaoi, 10ti kua kotou kofu le tagata foou leia e fakafoou i le poto o mulimuli ki le paaki o leia na fakatupu ia a ia. 11Koia e leaise i ai se Keleka i leinei pe ko se Sutea, mo se tagata silikosisio pe ko se lee silikosisio, mo se matapule pe ko se Site, mo se tagata popula pe ko se tagata lauatea ; kae ko Kilisito fuai i tagata fuli.
12Koia ko koutou, ofaipe se kau filifiliia a le Atua, kua maokioki mo alofaina, ke kotou kofu ni manatu loto o le manavaalofa, mo le agamalie, mo le fakataulalo, mo le agamalu, ti mo le kataki. 13Ke kotou fekatakiaki i okoutou vasaa, ti kapau e mamae se tasi ki se tasi i se nea, ke kotou fefakamolemoleaki. Ke kotou fakamolemole foki ofaipe Kilisito leia na fakamolemole kia koutou. 14Kae i aluga o nea fuli ana, kotou kofu le alofa, leia ko le sai o le malie tukupau. 15Ti ke pule i okoutou loto le tokamalie o Kilisito, leia na kalagai koutou ki ai ke kotou fau se tino e tasi. Ti ke kotou loto fakafetai.
16Ke nofo mau ia koutou le folafola a Kilisito i lona mou koloa katoa ; ke kotou feakonakiaki ti mo fetokoiaki i le poto katoa, ki ni pesalemo, mo ni imi, ti mo ni katiko fakalaumalie, o sua ki le Atua i lokoutou loto o tupu ko le kalasia. 17I nea fuli ala e kotou fai, i masau mo gaoi, ke kotou fai fuli latou i le suafa o le Aliki Sesu, o fakafetai iate ia ki le Atua le Tamana.
Le mauli foou o le famili
18Fafine avaga, kotou fakataulalo ki okoutou avaga, talie e malie le nea lena i le Aliki.
19Tagata avaga, kotou alofa ki okoutou avaga, ti aua na kotou fakaitaita kia latou.
20Fanau, kotou fakalogo i nea fuli ki okoutou matua, talie e malie le nea lena ki le Aliki.
21Tamana, aua na kotou fakakaekae akoutou fanau, talie ke aua na lotou loto gaegae.
22Tagata fakasausau, kotou fakalogo i nea fuli ki okoutou pule i le kanofi, o leaise gato fua i olatou mua, o sakinake ke fakamatamalie ki tagata, kae i le loto faigaofie, o i ki le Aliki. 23Ko nea fuli ala e kotou fai, ke kotou fai latou i le loto malie, ofaipe ki le Aliki, kae leai ki ni tagata, 24o kotou iloa e kotou tali loa mei le Aliki le totogi ko le tofiga. Kotou tausi kia Kilisito, ko le Aliki.
25Talie ko leia e leaise agatonu i lana gaoi e tali ia loa o mulimuli ki lona lee agatonu, talie e leaise fakapalatasi ki le kakai.
Currently Selected:
Kolose 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
