Amosi 9
9
Tautea o Iselaele
1Na kau tio loa ki le Aliki leia na tuu i le aletale.
Ti na pati a ia : Taai a puloga o pou lalasi ti ke galulu a uluaga o le fale tapu,
Ti ke ke fatifatii latou ki olatou ulu o latou fuli !
E kau tamate loa le toega ki le seleta.
E leaise feala loa ke mauli se tasi o sola,
E leaise sao loa se tasi ia latou.
2Kapau e lotou ulu ki le nofoaga o le kau mate,
E taaki loa latou e loku lima mei ai.
Ti kapau e lotou pale loa ki le atu lagi,
E kau fakaifo loa latou mei ai.
3Kapau e lotou mumuni i le tumutumu o le Kalemelo,
E kau afa loa latou i ai ti e kau tapo loa latou.
Kapau e fufu latou i oku mata i le takele o le tai,
E kau fakatotonu loa ki le gata ke uuti ia latou i ai.
4Kapau e lotou ano loa ki le popula i mua o olatou fili,
E kau fakatotonu loa ki le seleta ke tamate latou i ai ;
E kau fakaagaaga loa oku mata kia latou,
Ke kau fai se veli kae leai se malie.
5E fafa le Aliki, le Eteleno o kau tau, ki le malama nei, ti e galulu a ia,
Ti e tagi laulau loa lona kakai katoa.
E malaga le kele katoa ki aluga ofaipe le vaitafe,
Ti e ifo a ia ki lalo ofaipe le vaitafe o Esipito.
6Na fakatuu e ia lona fale i le atu lagi,
Kae tuu lona fakatafito i le kele.
E kalagai e ia a vai o le tai,
Ti e fakamafola e ia latou i aluga o le kele :
Ko le Eteleno ko lona igoa.
7Fanau a Iselaele, pe leaise kotou fai kiate au
Pe fanau a le kau Etiopia ? e pati le Eteleno.
Pe na leaise kau fakamavae Iselaele mei le fenua o Esipito,
Ofaipe le kau Filisitini mei Kafetoli ti mo le kau Silia mei Kile !
8Ko leinei, e tio a mata o le Aliki, le Eteleno, ki le puleaga agasala.
E kau maumaui loa a ia i aluga o le malama nei ;
Kae e leaise kau maumaui katoa loa le fale o Sakopo,
E pati le Eteleno.
9Talie ko leinei, e kau tuku loa aku fakatotonu,
Ti e kau lui loa le fale o Iselaele i lotolotoga o atu puleaga fuli,
Ofaipe le lulu o le one i se tami,
Kae e leaise vilo loa se tegai laakau e tasi ki le kele.
10E mamate loa a tagata agasala fuli o loku kakai i le seleta,
Latou ala e pati : E leaise fakafeofi mai loa le malaia, e leaise kaku mai loa a ia kia tatou.
Fakafoou o Iselaele i temi fakamuli
11I le temi lena, e kau toe lagai loa i lana siga le fale o Tavite,
E kau toe tapono loa ona pu, e kau toe fakatuu loa ona maumau,
Ti e kau toe lagai loa a ia ofaipe lana tuu i le temi mua.
12O tupu ke lotou maua le toega o Etome ti mo atu puleaga fuli
Ala kua kalagai ai loku suafa,
E pati le Eteleno, leia e fakasoko ia loa a nea ana.
13Ko leinei, e soko mai loa a aso, e pati le Eteleno,
Ala e ano loa le tagata fakamaluu kele i muli o leia e tuuti ia le fulumeto,
Ti ko leia e tatau ia le fuai vite, i muli o leia e muluki ia le pulapula,
Ala e sali loa le vino foou mei mauga ofaipe ni tafe,
Ti e sali loa a ia mei mauga liliki fuli.
14E kau toe aumai loa le kau popula o loku kakai ko Iselaele.
E lotou toe laga loa a kolo maumau, ti e lotou nonofo loa i ai.
E lotou to loa ni vite ti e lotou inu loa lona vino.
E lotou fai loa ni oloto ti e lotou kai loa lona fua.
15E kau to loa latou i lolatou fenua,
Ti e leaise toe taaki loa latou i le fenua leia na kau soli kia latou,
E pati le Eteleno, lou Atua.
Currently Selected:
Amosi 9: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
