Amosi 8
8
Kete fuai laakau : Fakaoki o Iselaele
1Na fakasa mai loa e le Aliki, le Eteleno, le tio leinei kiate au :
Ko leinei, ko se kete fuai laakau.
2Na pati loa a ia : Kolea e ke tio ki ai, Amosi ?
Na kau tali loa : Ki se kete fuai laakau.
Ti na pati mai loa le Eteleno kiate au : Kua soko mai le fakaoki ki loku kakai ko Iselaele ;
E leaise kau toe fakamolemole loa kiate ia.
3I aso ana, e liliu loa a sua o fale sau ko ni tagi laulau,
E pati le Aliki, le Eteleno ;
E laku fakalologo loa i ganea fuli ni mate mauke ai.
4Kotou fakalogo mai ki le nea leinei, koutou ala e kai ia le kau mativa,
Ti e maumaui ia le kau fakaaloalofa o le fenua !
5E kotou pati : Ke oki vave la a aso lalasi o le masina foou,
Kae feala ke motou toe fakatau lamatou fulumeto !
Ke oki vave la le sapato kae toe fakamavaa omatou fale tanaki fulumeto !
E motou fakaikiiki loa le kilo, kae motou siki loa lona totogi,
E motou fakasalasala loa a fua ke kakaai.
6Ti e motou totogi loa le kau fakaaloalofa ki se paaga
Ti mo le tagata mativa ki se sa taka,
Ti e motou fakatau loa le kili o le fulumeto.
7Kua fakapapau le Eteleno i le kololia o Sakopo :
E leaise kau toe galoi loa sana gaoi fua e tasi.
8Pe leaise lulu loa le fenua o tupu ko latou ?
Pe leaise tagi laulau loa le kakai katoa ? E pale ake loa le fenua katoa ofaipe se vaitafe,
E malaga loa a ia ki aluga ti e toe ifo loa a ia ki lalo ofaipe le vaitafe o Esipito.
9I le aso lena, e pati le Aliki, le Eteleno :
E kau fakagalo ia loa le laa i le lalatea,
Ti e kau fakaliliu loa ke pouli le malama nei i le loto malie o le ao ;
10E kau fetogi loa okoutou aso lafeti ki ni aso mamae,
Ti mo akoutou sua fakafiafia ki ni tagi laulau,
E kau fakasulu loa ki vakavaka fuli ni taga,
Ti e kau fakatula loa a ulu fuli ;
E kau tuku loa le fenua ke tagi mamae ofaipe ki se vosa fuatasi,
Ti e fai loa lona fakaoki pe se aso kona.
11Ko leinei, e soko mai loa a aso, e pati le Eteleno,
Ala e kau kakau ai loa le oge ki le fenua,
Leai le oge o le pane mo le fia inu o le vai,
Kae le fia kai mo le fia inu ke logo ki folafola a le Eteleno.
12E lotou feanoaki loa mei le tasi a tai ki le tasi a tai,
Mei le noleto ki le esite,
E lotou ano saele loa o afa le folafola a le Eteleno,
Kae e leaise lotou maua loa a ia.
13I aso ana, e mamate loa a taineliki fulumalilie mo tamaliki tupulaga i le fia inu.
14E lotou fakapapau loa i le atua fakalialia o Samalia,
Ti e lotou pati : Ke mauli lou Atua, Tane !
Ke mauli le ala o Pele-Sepa !
Kae e lotou vivilo loa, ti e leaise lotou toe tutuu loa ki aluga.
Currently Selected:
Amosi 8: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
