Apetiasi 1
1
Kikite o le maumaui o Etome
1Folafola kikite a Apetiasi.
Ko leinei le folafola a le Aliki, le Eteleno, ki Etome :
Na motou maua se logo mei le Eteleno,
Ti na kakau se tagata avelogo ki atu puleaga :
Kotou tutuu ki aluga, ke tou saele ki Etome o taui a ia !
2Ko leinei, e kau fakaliliu loa a koe o ikiiki i lotolotoga o atu puleaga,
E ke liliu loa ko le nea fakagologolo.
3Na fakasese a koe e le fia nealasi o lou loto,
A koe leia e nofo i pu o utu,
Leia e ekeeke i potu taualuga,
Leia e pati i lou loto :
Ko ai e fakaifo ia loa au ki lalo ?
4Pe ke fakatuu ia loa lou ofaga o taualuga ofaipe leia o le akuila,
Pe ke fakatuu loa a ia i lotolotoga o fetuu,
E kau ti loa a koe mei ai ki lalo, e pati le Eteleno.
5Kapau e au ni tagata kaia mo ni tagata maumau i le pouli ki lou fale,
Pe leaise lotou too loa au nea fuli,
Kae ke nofo noa loa ?
Ti kapau e ulu ni tagata tauvite ki lau faisaga vite,
Pe leaise lotou tuku loa se ga nea fua e tasi ?…
6Koia e sakili ai loa a nea fuli a Esau !
E maua loa ona koloa fufu !
7Kua kapu a koe e latou fuli ala na kau mo koe o kaku ki le koiga,
Kua kakaai a koe e ou kaukaunea, ti kua lotou pule kiate koe,
Ko latou ala na kai ia lau pane kua fakatuu ia ni masele kiate koe,
Kae na leaise ke tio ki se nea !
8Pe leaise ko le aso leinei, e pati le Eteleno,
E kau fakapuli ai loa le kau poto i Etome,
Ti mo le atamai i le mauga o Esau ?
9Ko au tagata tau, ei Temane, e nonofo loa i le i lasi,
Talie e mamate loa i le matea latou fuli o le mauga o Esau.
10O tupu ko lau agamakeke ki lou taina ko Sakopo,
E ke apele loa i le luma,
Ti e motusi loa a koe o lee gato.
11I le aso leia na ke tuu ai i ona mua,
Le aso leia na ave popula ai lana kau tau e ni matapule,
Le aso leia na ulu ai ni matapule i ona matapa,
ti na lotou fai ai le toso ki Selusalemi,
Ko koe foki na ke faipe se tasi o latou.
12Na leaise tonu ke ke tio fakafiafia ki le aso o lou taina, le aso o lona malaia ;
Na leaise tonu ke ke fakafiafia ki fanau a Suta i le aso o lolatou maumaui,
Ti na leaise tonu ke ke lauveli kia latou i lou gutu i le aso o lolatou mamae.
13Na leaise tonu ke ke ulu ki le kolo o loku kakai i le aso o lona maumaui.
Na leaise tonu ke ke tio fakafiafia ki lona malaia i le aso o lona maumaui,
Ti na leaise tonu ke fafa lou lima ki ona koloa i le aso o lona maumaui.
14Na leaise tonu ke ke tuu i ona magai ala o tamate latou ala na sosola,
Ti na leaise tonu ke ke soli ki le fili latou ala na sao i le aso o lona mamae !
15Talie kua ofi mai le aso o le Eteleno, ki atu puleaga fuli ;
E fai loa kiate koe o mulimuli ki le nea leia na ke fai.
E vilo loa au gaoi ki lou ulu.
16Talie, ofaipe koutou, kau Iselaele, na kotou inu le ipu o loku sausau i loku mauga maokioki,
E inu loa e atu puleaga fuli o leaise toe oki ;
E lotou inu loa, e lotou konana loa,
Ti e lotou puli noa loa ofaipe se kakai leia na leaise tupu.
17Kae e nofo loa le fakamauli i le mauga o Sione, ti e maokioki loa a ia,
Ti e toe maua loa e le fale o Sakopo ona tofiga.
18E liliu loa le fale o Sakopo ko se afi,
Ti ko le fale o Sosefo ko se ulai afi ;
Kae e liliu loa le fale o Esau ko se tuuga penu,
Leia e lotou tutu loa o okioki,
Ti e leaise toe loa se nea i le fale o Esau,
Talie kua masau le Eteleno.
19E maua loa e latou o le saute le mauga o Esau,
Ti ko latou o le toafa le fenua o le kau Filisitini ;
E lotou maua loa le fenua o Efalaimi mo leia o Samalia ;
Ti e maua loa e Pesamino a Kalaate.
20Ko le kau popula o le kau tau lena o fanau a Iselaele
E maua ia loa le fenua leia na nonofo ai le kau Kanaane o kaku ki Salepeta ;
Ti ko le kau popula o Selusalemi ala e nonofo i Sefalate
E maua ia loa a kolo o le saute.
21E pale ake loa ni tagata fakamauli ki le mauga o Sione,
O fakamaaui le mauga o Esau ;
Ti e maua loa e le Eteleno le pule fakasau.
Currently Selected:
Apetiasi 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
