Amosi 2
2
Kikite ki Moape, mo Suta, mo Iselaele
1Koia e folafola ai le Eteleno, o pati :
O tupu ko agaveli e tolu a Moape,
E fa foki, e leaise kau toe fetogi laku fakatotonu,
Talie na tutu e ia o okioki a ivi o le sau o Etome.
2E kau kakau loa le afi ki Moape,
Ti e kai loa e ia a fale sau o Kelisoti ;
Ti e mate loa Moape i loto malie o le maveuveu,
I loto malie o ni kalaga tau mo le tagi o fakatagi pupusi.
3E kau tuuti loa i loto malie o Moape le tui fakamaau,
Ti e kau tamate loa ona pule fuli mo ia, e pati le Eteleno.
4E folafola ai le Eteleno, o pati :
O tupu ko agaveli e tolu a Suta,
E fa foki, e leaise kau toe fetogi laku fakatotonu,
Talie na lotou maumaui le lao a le Eteleno,
Ti na leaise lotou taupau ana fakatotonu,
Talie na fakasese latou e taulaatua loi
Ala na atolasio ki ai olatou tamana.
5E kau kakau loa le afi ki Suta,
Ti e kai loa e ia a fale sau o Selusalemi.
6Koia e folafola ai le Eteleno, o pati :
O tupu ko agaveli e tolu a Iselaele,
E fa foki, e leaise kau toe fetogi loa laku fakatotonu,
Talie na lotou fakatau le tagata agatonu ki se paaga,
Ti mo le tagata mativa ki se sa taka.
7E lotou loto ke tio ki le efu o le kele i le ulu o le kau fakaaloalofa,
Ti e lotou tiaki le tagi a le kau mativa.
E ano le vosa mo le tamana ki le taine e tasi,
O tupu ke fakakelekele loku suafa maokioki.
8E lotou momoe i tafa o aletale i ni kofu na tuku ake e le kau mativa kia latou,
Ti e lotou inu i le fale o olatou atua le vino a latou ala e lotou fakatua.
9Kae na kau maumaui i olatou mua le kau Amole,
Ala na taualuga ofaipe ni sete,
Ti na makeke ofaipe ni sene ;
Na kau maumaui olatou fua i aluga,
Ti mo olatou aka i lalo.
10Kae na kau aumai koutou mei le fenua o Esipito,
Ti na kau taki koutou i fetuu e kau fa i le toafa,
Ke kotou maua le fenua o le kau Amole.
11Na kau lagai i okoutou vosa ni kau polofeta,
Ti i okoutou tagata tupulaga ni kau nasilea.
Pe na leaise soko maoki le nea lena, fanau o Iselaele ? e pati le Eteleno…
12Kae na kotou fakainu le vino ki le kau nasilea !
Ti na kotou tuku ki le kau polofeta le fakatotonu leinei :
Aua na kotou faikikite !
13Ko leinei, e kau takatakafi loa koutou,
Ofaipe le taomi o le kele e se saliote kua apele i fui fulumeto.
14Ko leia e mauvave e leaise mafai loa ke sola,
Ko leia e makeke e leaise mafai loa ke fakaaoga ia lona makeke,
Ti e leaise saofaki loa e le tagata toa lona mauli ;
15Ko leia e too ia le kalolo e leaise mafai loa ke tuu,
Ko leia e vae maamaa e leaise sao loa,
Ti e leaise saofaki loa e le tagata ekeosi lona mauli ;
16Ko le tagata leia e loto toa i le kau tau
E sola telefua loa i le aso lena, e pati le Eteleno.
Currently Selected:
Amosi 2: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
