Lua tosi ki le kau Kolinto 8
8
Vaevae fakatatau o koloa i le Ekelesia :
1) Faifaitakiaga o le kau Masetonia
1E ma fakailo atu kia koutou, fetaina, le kalasia o le Atua leia kua fakasa i Ekelesia o Masetonia. 2Talie i le asiasii lasi i olatou mamae, ko lolatou fiafia lasi mo lolatou mativa lasi na fakatupu ia o lasi ai ni soli o nea alofa ia latou. 3E kau fakamaoki na lotou soli i le loto malie o mulimuli ki le nea leia na lotou maua, ti na fakalaka foki i le nea leia na lotou maua, 4talie na lotou kole fakamalotoloto mai kia maua le kalasia ke lotou kau ki le tokoi ki le kau sagato i Selusalemi. 5Ti na leaise gato fua i lalatou kau ki ai ofaipe lama amanaki malie ki ai, kae na lotou soli mua latou totonu ki le Aliki, ti oki kia maua, i le finegalo o le Atua.
2) Faifaitakiaga o Kilisito
6Koia na ma filifili ai a Tito ke fakaoki ia ia koutou le gaoi alofa lena, ofaipe lana kamata ia. 7Koia, ofaipe koutou, na kotou malie tukupau i nea fuli, i le tui, i le masau, i le iloa, i le faa fai i nea fuli, ti mo le alofa kia maua, kotou fai ke kotou toe malie tukupau foki i le gaoi alofa lena. 8E leaise kau fakasa le nea lena ke tuku atu se fakatotonu, kae ke asiasii ai, i le alofa o la ake, le maoki o lokoutou alofa. 9Talie kua kotou iloa le kalasia o lotatou Aliki ko Sesu-Kilisito, leia na fakamativa o tupu ko koutou kae na mou koloa a ia, o tupu ke kotou mou koloa i lana fakamativa. 10Koia e kau tuku atu kia koutou se manatu i le nea lena : e malie kia koutou, ke kotou soko atu le nea leia kua kotou kamata ia i le fetuu kua sili. Talie ko koutou ala na uluaki fai ia le gaoi lena, ti na uluaki loto malie ki lona fai. 11Koia kotou fakaoki i le temi nei le gaoi lena, o tupu ke tatau le oli i le fakaoki mo leia na kotou maua i le kamataaga. 12Talie kapau e maua le loto malie ke soli, e tali e le Atua le nea leia e soli o mulimuli ki le nea leia e maua, kae e leai ki le nea leia e leaise maua. 13Talie e leaise ko se nea ke kotou mafaia ai kae fimalie ala ake, kae ke mulimuli ki le lekula o le vaevae fakatatau : i le temi leinei ko le nea leia e leaise aoga kia koutou e tapono ia loa a nea ala e aoga kia latou, 14o tupu i se tasi aso ko le nea leia e leaise aoga kia latou ke tapono ia loa a nea ala e aoga kia koutou ; e fenaaki loa le fai o le vaevae fakatatau, 15o mulimuli ki le nea leia e tuu i le tosi : Ko leia na tanaki lasi, na leaise maua e ia o fakalaka, ti ko leia na tanaki ikiiki, na leaise puli se nea kiate ia.
3) Tokaga o Tito ki le tanaki nea alofa
16Kae ke fakafetai ki le Atua, i lana tuku ki le loto o Tito le fia tokaga kia koutou ofaipe maua ; 17talie na tali e ia lama kole ; ti i le lasi o lona oli, na natu aifai a ia kia koutou. 18Ti kua ma kakau atu mo ia le taina leia kua logologona lana gaoi ki le Evaselio i Ekelesia fuli ; 19Ti e leaise ko ia fua, kae na filifili foki a ia e Ekelesia ke kau fanoga mo maua i le gaoi fakaalofa lena, leia e ma fai ki le kololia o le Aliki totonu ti ke fakamaoki ai loma loto malie. 20E ma fai fenaaki, o tupu ke aua na lauveli se tasi kia maua o uiga mo le nea alofa lasi lena e ma tokaga ki ai. 21Talie e ma afa le nea leia e malie, o leaise gato fua i mua o le Aliki, kae i mua foki o tagata. 22E ma kakau atu mo laua lotatou taina, leia kua tua lasi lama asiasii lona oli makeke i ni nea mauke ai, ti kua toe fakasa e ia o lasi ake i le nea leinei lona oli o tupu ko lana fanaki lasi kia koutou. 23Koia ko Tito, ko loku kaukau nea a ia i le gaoi, ti e gaoi a ia mo au kia koutou ; ti ko oma fetaina, ko fakafofoga latou o Ekelesia, ti e lotou gaoi ki le kololia o Kilisito. 24Kotou fakasa kia latou, i mua o Ekelesia, le maoki o lokoutou alofa, ti kotou fakasa kia latou e tonu lama fakakololia o tupu ko koutou.
Currently Selected:
Lua tosi ki le kau Kolinto 8: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
