Lua tosi ki le kau Kolinto 7
7
1Koia, ei alofaaga, i le maua o fakapapau ana, tou fakamea tatou mei nea fuli ala e fakakelekele ia le tino mo le laumalie, o fakaoki lotatou fakamaokioki i le kanofi ki le Atua.
Mamae i le Atua, fiafia o Paulo
2Kotou tuku mai kia maua se nofoaga i okoutou loto ! Na leaise ma sala ki se tasi, na leaise ma fakamativa se tasi, na leaise ma fakagaoi se tasi kia maua. 3E leaise kau masau fenaaki atu kia koutou ke tautea ai koutou ; talie kua oki i laku fakasa e kotou nonofo i oma loto ki le mauli mo le mate. 4E kau nofo mo se fanaki lasi kia koutou, e kau fiafia loa kia koutou i nea fuli ; e kau apele i le fakafimalie, e kau apele pipi i le fiafia i loto malie o mamae fuli. 5Talie, talu loma kaku mai ki Masetonia nei, na leaise maua fua e oma tino se malolo ; na ma tali a mamae kesekese : tau i tafa, tuania i loto. 6Kae ko le Atua, leia e fakafimalie ia latou ala kua tiaki ki lalo, na fakafimalie ia maua ki le kaku mai a Tito, 7ti na ma toe loto makeke o leai fua i lana kaku mai, kae toe lasi ake i le nea leia na fakamatala mai e ia o uiga mo lakoutou fakafimalie a ia totonu. Na fakamatala mai e ia kia maua le lasi o lokoutou fia tio kiate au, mo le lasi o lokoutou loto mamae, mo le lasi o lokoutou alofa kiate au. Koia i le temi nei kua toe lasi ake loku fiafia.
8Talie, kapau na kotou mamae i laku tosi, e leaise kau fakasemala ki le nea lena ; ti, kapau na kau fakasemala i le nea lena, talie e kau tio na fakalotomamae koutou e le tosi lena i se ga temi, 9kae e kau fiafia i le ola nei, o leaise tupu ko lokoutou loto mamae, kae o tupu kua ave koutou e le mamae lena ki le fakasemala, talie na fakamamae koutou i le finegalo o le Atua, o tupu ke aua na ma fai ia se nea veli kia koutou. 10Koia, ko le loto mamae mei le Atua e fakatupu ia se fakasemala ki le mauli, leia e leaise tou toe fakasemala ki ai, kae ko le loto mamae mei le malama nei e fakatupu ia le mate. 11Ti kua kotou tio ki fua ala na fakatupu e le Atua mei le loto mamae lena, ki le tokaga leia na kotou maua mei ai ! ki le fia fakatokatoka o nea fuli, ki le vesia ki le nea e veli, ki le tuania, ki le oli mamae ke kotou tio kiate au, ki le oli makeke ki se tua leia e totonu ! Na kotou fakasa i nea fuli e kotou mea i le nea lena.
12Kapau na kau fai tosi atu kia koutou, na leaise tupu ko leia na fai ia le agaveli, pe ko leia na tali ia le agaveli, kae na tupu ke fakasa ai, i mua o le Atua, lokoutou alofa lasi kia maua i lotolotoga o koutou. 13Koia kua ma fimalie i le nea lena. Kae kua toe lasi ake loma fiafia o tupu ko le fiafia o Tito, leia na kotou fakafimalie lona loto. 14Ti kapau i ona mua na kau fakakololia fakaikiiki kia koutou, e leaise kau luma i ai ; kae, ofaipe la ma fakasa tuumau le maoki, na toe maoki foki le nea leia na ma fakakololia ai i mua o Tito. 15Ti ko lona manavaalofa kia koutou kua toe lasi kese ake, i lana manatu ki lakoutou fakalogo a koutou fuli, ti mo lakoutou tali a ia mo se loto fakaapaapa mo se loto lulu. 16E kau fiafia i laku fanaki kia koutou i nea fuli.
Currently Selected:
Lua tosi ki le kau Kolinto 7: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
