Lua tosi ki le kau Kolinto 6
6
Fakataulalo mo le agatonu o Paulo
1Talie e ma kaukau gaoi mo le Atua, e ma fakakolekole foki kia koutou ke aua na kotou tuku ke to noa le kalasia o le Atua.
2Talie e pati i le Tosi :
I le temi faigamalie na kau tali a koe,
Ile aso o le fakamauli na kau tokoi kiate koe.
Tio, ko leinei le temi faigamalie ; Tio, ko leinei le aso o le fakamauli. 3E leaise ma loto ke siga se tasi i se nea, o tupu ke aua na liliu le gaoi ko se nea fakatupu lauveli. 4Kae e ma faiga ke ma malie kia koutou i nea fuli, ofaipe ni tagata fakasausau a le Atua, i se kataki fualoa i mamae, i mativa, i tutamaki, 5i sasa, i pilisoni, i maveuveu, i gaoi pakia, i alaala pouli, i sesunio ; 6i le maokioki, i le iloa, i le kataki fualoa, i le agamalie, i le Laumalie Maokioki, i le alofa maoki, 7i le folafola o le maoki, i le makeke o le Atua, i masafu tau mo masafu tali tau o le maokioki ; 8i loto malie o le kololia mo le matagafua, i loto malie o le logologona malie mo le logologona veli ; ofaipe ni tagata kaka, kae e ma maoki ; 9ofaipe ni tagata e leaise iloa, kae e iloa malie maua ; ofaipe ni tagata kua mamate, ti ko leinei e ma mauuli ; ofaipe ni tagata e tautea, kae e leaise tamate ; 10ofaipe ni tagata e loto mamae, kae e ma fiafia tuumau ; ofaipe ni mativa, kae e ma fakakoloa ia le toka api ; ofaipe ni tagata e leaise maua ia ni nea, logo ai e ma maua a nea fuli.
Kalaga ki le mavae mo le fakamea
11Kua mavaa atu oma gutu kia koutou, kau Kolinito, kua fakamavaa fakalaulasi atu kia koutou oma loto, 12e leaise kotou kopi ia fua i ai, kae ko lokoutou loto leia kua lau ikiiki kia maua. 13Ke kotou liufaki mai kia maua le tatau, E kau masau atu kia koutou ofaipe ki ni aku fanau totonu,
Kotou fakalaulasi foki lokoutou loto !
14Aua na kotou kau fakatasi mo le kau lee agatonu i lalo o se laakau taki kese. Talie e fakatasi feaki le maokioki mo le agasala ? Pe fakatasi feaki le malama mo le fakapouli ? 15Pe kau fakatasi feaki Kilisito mo Peliale (Satana) ? Pe vaega tasi leia e tui mo leia e lee tui ? 16Ko le nea fea leia e fakatasi ai le fale tapu o le Atua mo taulaatua ? Talie ko le fale tapu tatou o le Atua mauli, ofaipe le pati a le Atua : E kau nofo loa ti e kau saele loa i loto malie o latou ; e kau liliu loa ko lolatou Atua, ti e lotou liliu loa ko loku kakai.
17Koia e pati ai le Aliki :
Kotou au kese meia latou,
Ti kotou mavae kese, e pati le Aliki ;
Aua na kotou fafa ki le nea leia e kelekele,
Ti e kau tali loa koutou.
18 E kau fai loa kia koutou pe se Tamana,
Ti e kotou fai loa kiate au pe ni vosa mo ni taineliki,
Efolafola le Aliki mafimafi.
Currently Selected:
Lua tosi ki le kau Kolinto 6: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
