Lua tosi ki le kau Kolinto 3

Gaoi a le Lao mo le gaoi a le Laumalie

1Pe ma toe kamata masau kia maua totonu ? Pe aoga kia maua, ofaipe ni iki, ni tosi fakamaoki kia koutou, pe meia koutou ? 2Ko lama tosi koutou, leia kua tosi i oma mafu, leia kua iloa ti kua lau e tagata fuli. 3Kua fakasa maoki koutou ko se tosi koutou a Kilisito, leia kua tosi e lama gaoi, o leai ki se vaitosi, kae ki le Laumalie o le Atua mauli, o leai i ni laupapa fatu, kae i ni laupapa kanofi, i mafu.

4E ma fakasa le nea lena o tupu ko le fanaki leia e ma maua ki le Atua ia Kilisito. 5Talie ke aua na pati e ma mafai ia e maua totonu ke ma fakatupu ia se nea o sakinake e au meia maua totonu ; kae e au mei le Atua loma mafai.

6Ko ia foki leia na teuteui ia maua ke ma liliu ko ni tagata gaoi o se sai foou, leai o le matai tosi, kae o le Laumalie ; talie e tamate e le matai tosi, kae e saofaki e le Laumalie.

7Ti kapau na fakasa le kololia o le Atua e le gaoi o le mate, leia na tosi ki ni matai tosi i ni fatu, o leaise mafai ke tio a fanau o Iselaele ki mata o Moisese, o tupu ko le gigila o ona mata, logo ai ko se kololia fakatemi a ia : 8Ti e feaki ake loa le lasi o le kololia o le gaoi a le Laumalie ! 9Talie kapau na kololia ia le gaoi o le fakamalaia, ti e toe fakalaka mamao ake le kololia ia o le gaoi o le faitotonu. 10Talie e feala foki ke tou pati i le nea lena, ko le kololia leia na gigila i mua e noa a ia mo ka fakatatau a ia ki le kololia o le temi nei, leia e lasi mamao ake. 11Talie kapau na kololia ia le nea leia na fakatemi, ti e toe lasi ake le kololia ia o le nea leia e tuumau.

12Koia i lama maua le amanaki malie lena, e ma apele loa i le loto toa, 13ti e leaise ma faipe Moisese, leia na uufi ia ona mata ki se pulou, ke aua na tio fakamatemate a mata o vosa o Iselaele ki le fakaoki o le nea leia na fakatemi. 14Kae kua lotou liliu o fefeka i olatou atamai. Talie o kaku mai ki le aso nei, e koi tuumau le pulou lena mo ka lotou lau le Tausi Afea, ti e leaise toe puli le kie lena, talie koi puli a ia ia Kilisito. 15Kae o kaku mai ki le aso nei, ka lau Moisese, e ti se kie ki olatou loto ; 16kae ka tafoki a loto ki le Aliki, e too le pulou lena. 17Ti ko le Aliki ko le Laumalie ; ti i le ganea leia e i ai le Laumalie o le Aliki, e i ai foki le lauatea.

18Ti ko tatou fuli ala e tio i ni mata sala pulou ki le kololia o le Aliki ofaipe i se tiloata, e tou liliu ko se paaki e tasi mo ia, mei se kololia ki se kololia, i le Laumalie o le Aliki.

Currently Selected:

Lua tosi ki le kau Kolinto 3: FB2000

Highlight

Copy

Compare