Uluaki tosi kia Timoteo 4
4
Fakamakeke o Timoteo
1Kae e pati maoki le Laumalie : i temi fakamuli e tiaki loa e ni iki le tui, kae lotou pipiki loa ki ni laumalie kaka ti mo ni akonaki a temonio, 2o tupu ko le malualoi o le kau toketa loi, ala kua mate olatou atamai, o sakinake na tutu latou ki se ukamea kaka ; 3e lotou fakatotonu ke aua na avaga, ti ke aua na kai a nea kai ala na fakatupu e le Atua ke too mo le loto fakafetai e latou ala e agatonu ti kua iloa ia le maoki. 4Talie e malie a nea fuli ala na fakatupu e le Atua, ti e leaise tonu ke tiaki se nea, kae ke too a ia mo ni fakafetai,
5talie e fakamea a nea fuli e le folafola a le Atua mo le faikole.
6I lau fakasa a nea ana ki fetaina, e ke liliu loa ko se tagata gaoi malie a Sesu-Kilisito, leia e fagai e folafola o le tui ti mo le akonaki malie leia kua ke mulimuli totonu ki ai. 7Ke ke tiaki a fanaga fakamalama a le kau finematua. 8Kae ke ke gaoi ki le aga fakaatua ; talie e aoga ikiiki a fai manogi fakatino, kae ko le aga fakaatua e aoga a ia ki nea fuli ai : e maua e ia le fakapapau o le mauli o le temi nei ti mo leia o le temi ka au. 9Ko se folafola maoki lena, ti e gali katoa a ia ke tali.
10Koia e tou gaoi, ti e tou tau, talie e tou tuku latatou amanaki malie ki le Atua mauli, leia ko le Fakamauli o tagata fuli, kae tafito le kau tui.
11Fakasa a nea ana, ti mo akonaki latou. 12Ke aua na fakanoai e se tasi lou koi muli, kae ke ke liliu ko se faifaitaki ki le kau agatonu, i masau, mo le aga, mo le alofa, mo le tui, ti mo le maokioki.
13O kaku ki laku kaku atu, tokaga ki le lautosi, mo le fakamakeke, mo le akonaki. 14Aua na ke tuku noa le nea alofa leia iate koe, leia na soli atu kiate koe i se kikite i le teki o lima o le kau fakamatuatua. 15Fakamalotoloto ki nea ana, ti ke soli a koe katoa kia latou, o tupu ke tio tagata fuli ki lau saele ki mua. 16Tokaga kiate koe totonu, ti mo lau akonaki ; kataki fualoa i nea ana, talie, i lau fai fenaaki, e ke saofaki ai loa a koe totonu, ti e ke saofaki ai foki latou ala e fakalogologo atu kiate koe.
Currently Selected:
Uluaki tosi kia Timoteo 4: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
