Uluaki tosi kia Timoteo 5
5
Lekula ki fafine lokonui
1Aua na ke valoki fakamakeke le matua, kae fakalotomakeke a ia ofaipe se tamana ; fakalotomakeke le kau tupulaga ofaipe ni fetaina,
2a fafine matutua ofaipe ni tinana, a fafine muli ofaipe ni tuagaane, i le mea katoa.
3Tausi ki fafine lokonui ala kua lokonui maoki. 4Ti kapau e maua e se fafine lokonui ni ana fanau pe ko ni ona makopuna, e tonu ke lotou ako i mua o nea fuli le fai o le aga fakaatua ki olatou famili totonu, ti ke lotou totogi ki olatou matua le nea leia na lotou tali meia latou, talie e malie le nea lena ki le Atua. 5Ko le fafine leia kua lokonui maoki, e leaise tausi a ia e se tasi, ti kua tuku e ia lana fanaki ki le Atua, ti e faikole tuumau a ia o kole lona tokoi i le po mo le ao. 6Kae ko le lokonui leia e mauli i fiafia fakamalama, kua mate a ia logo ai koi mauli. 7Fakasa kia latou a nea ana, o tupu ke lotou lee sala. 8Kapau e leaise tokaga se tasi kia latou o lona fale, kae tafito latou o lona famili, kua tiaki e ia le tui, ti e veli ake a ia i se pagani. 9Koi ke tosi loa se fafine lokonui ki le tosi o le kau fafine lokonui, mo ka kua fakalaka ona fetuu i le kau ono. Ti tasi e tonu ke avaga tua tasi a ia i mua, 10ti ke iloa a ia o tupu ko ana gaoi malilie : ke tausi malie a ia ki ana fanau, mo fakatalitali kaiga matapule, mo fufulu a vae o le kau sagato, mo tokoi ki le kau masaki, ti mo fai ia a gaoi malilie fuli. 11Kae aua na ke tali a fafine lokonui koi tupulaga ; talie ka ekenaki loa latou e oli fakatino ke lotou fia avaga, ti e lotou mavae loa meia Kilisito, 12ti e lotou agasala loa i lalatou maumaui lalatou uluaki fakapapau. 13Toe tasi ake, e lotou fakamasani loa i le fakapuli noa o lolatou temi i le ulu saele ki fale ; ti e leaise gato fua i le nofo noa, kae toe veli ake talie e lotou gutu pati mo fia ilo, o masau ki nea ala e leaise tonu ke masau ki ai. 14Koia e kau loto ai ke avaga a fafine lokonui tupulaga, ke lotou maua ni alatou fanau, ke lotou takitaki olatou fale, o tupu ke aua na lotou tuku ki le fili se faigamalie ke lauveli ; 15Talie kua maliu kese foki ni iki o muli ia Satana. 16Kapau e maua e se tasi, pe fafine pe tagata, ni fafine lokonui i lona famili, ke taupau e ia latou, o tupu ke aua na mafaia le Ekelesia ia latou, kae ke maamaa a ia o taupau latou ala e sala famili.
Lekula ki le kau fakamatuatua
17Ko kau fakamatuatua ala e taki malie, ke tuku kia latou se fakaapaapa lasi, kae tafito latou ala e gaoi ki le folafola mo le akonaki. 18Talie e pati le Tosi tapu : aua na ke fakagutu loa le pipi mo ka takatakafi e ia le fulumeto. Ti e tonu ke maua e le tagata gaoi lona totogi. 19Aua na ke tali fua se fakalakasala o se fakamatuatua, mo kapau e leaise tuku a ia e ni tagata fakamaoki e toka lua pe toka tolu. 20Ko latou ala e agasala, valoki latou i mua o le Ekelesia katoa, o tupu ke i foki mo latou ake ala. 21E kau kole mamae atu kiate koe i mua o le Atua, i mua o Sesu-Kilisito, ti mo mua o le kau aselo filifiliia, ke ke tokaga ki nea fuli ana, o sala fakapalatasi ti mo sala fia mata malie. 22Aua na ke teki fakatavili ou lima ki se tasi, ti ke aua na ke kau ki agasala a le kakai ; kae ke ke taupau a koe i le mea. 23Aua na ke inu vai ata, kae tau inu se ga vino, o tupu ko lou kete mo ou tautau masaki. 24Kua sa malie a agasala a iki tagata i mua, kae e leikiaise fakamaaui latou, kae ko agasala a iki ake koi sa loa latou ki muli. 25Ti e fenaaki foki ki gaoi malilie, e lotou sa malie, ti ko iki e leikiaise sa nei kae e leaise mafai ke munia tuumau.
Currently Selected:
Uluaki tosi kia Timoteo 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
