Uluaki tosi ki le kau Kolinto 6

Fakamaau i le kau kilisiteano

1Ko se tasi ia koutou, mo ka maua e ia se nea ki lona taina, pe toa a ia o tagi i mua o le kau pagani, kae leai i mua o le kau sagato ? 2Pe leaise kotou iloa e fakamaaui loa e le kau sagato le malama nei ? Ti kapau ko koutou ala e fakamaaui ia loa le malama nei, pe leaise gali mo koutou ke kotou fakamaaui a nea liliki ? 3Pe leaise kotou iloa e tou fakamaaui loa le kau aselo ? Ti kolea e leaise tou fakamaaui ai loa a nea o le mauli leinei ? 4Ti kapau e kotou maua ni visi ki ni nea o le mauli nei, e kotou too latou ala e leai solatou uiga ki le Ekelesia ke tui fakamaau ? 5E kau fakasa le nea lena ke kotou luma ai. Koia e leaise maua ai se poto e tasi ia koutou ke fakamaaui ia ona fetaina. 6Kae kapau e tagi se taina ki se taina, ti e fai a ia i mua o latou ala e leaise tui ? 7Ko leinei, kua nofo se veli lasi ia koutou, ko le fefakamaauiaki o koutou. Kolea e leaise kotou kataki ai mua le veli ? Kolea e leaise kotou tuku ai mua ke kaia okoutou koloa ? 8Kae ko koutou totonu ala e fai ia le veli mo kaia ia a koloa, ti e kotou fai a ia ki ni fetaina !

E maokioki le tino o le kilisiteano : Talie kua fufulu a ia e le toto

9Pe leaise kotou iloa e leaise maua loa le puleaga o le Atua e le kau lee agatonu ? Aua na kotou fai sala i le nea lena : Ko le kau fai feauaki, mo le kau tausi taulaatua, mo le kau tono, 10mo le kau tagata fia fafine, mo le kau tagata fai tagata, mo le kau kaia, mo le kau manumanu koloa, mo le kau faakona, mo le kau lauveli, mo le kau kaia tagata, e leaise lotou ulu loa ki le puleaga o le Atua. 11Ti na fenaaki ni iki ia koutou i mua. Kae kua fufulu koutou, kua fakamaokioki koutou, kua fakamatatonu koutou i le suafa o le Aliki ko Sesu-Kilisito ki le Laumalie o lotatou Atua.

Talie kua maua a ia e Kilisito

12E taga a nea fuli kiate au, kae e leaise aoga a nea fuli ; e taga a nea fuli kiate au, kae e leaise kau tuku loa ke kau popula ki se nea fua e tasi. 13Ko nea kai ki le manava, ti ko le manava ki nea kai, ti e maumaui loa e le Atua le manava o tatau mo nea kai. Kae na leaise fakatupu le tino ki le fai feauaki. Na fakatupu a ia ki le Aliki, ti ko le Aliki ki le tino. 14Ti ko le Atua, leia na toe fakatuuake ia le Aliki, e toe fakatuuake ia loa mo tatou foki ki lona mafimafi. 15Pe leaise kotou iloa ko okoutou tino ko koga tino o Kilisito ? Ti e kau too loa a koga tino o Kilisito, o fakaliliu ko koga tino o se fafine fai feauaki ? 16E leai ai ! Pe leaise kotou iloa ko leia e pipiki ki le fafine fai feauaki e liliu a ia ko se tino e tasi mo ia ? Talie e pati, e la liliu loa ko se tino e tasi. 17Kae ko leia e pipiki ki le Aliki e liliu a ia mo ia ko se laumalie e tasi. 18Kotou sola mei le fai feauaki ! Ko agasala fuli ake ala e fai e se tagata, e fai i tafa o le tino ; kae ko leia e fai ia le fai feauaki e agasala a ia ki lona tino totonu.

Talie ko le fale tapu a ia o le Atua

19Pe leaise kotou iloa ko lokoutou tino ko le fale tapu a ia o le Laumalie Maokioki leia ia koutou, leia kua kotou tali mei le Atua, ti e leaise kotou maua koutou totonu. 20Talie kua totogi koutou ki se totogi lasi ai. Koia ke kotou fakakololia le Atua i lokoutou tino mo lokoutou laumalie, ala e maua e le Atua.

Currently Selected:

Uluaki tosi ki le kau Kolinto 6: FB2000

Highlight

Copy

Compare