Uluaki tosi ki le kau Kolinto 5

Maveuveu i le Ekelesia o Kolonitia

1Kua logo i ganea fuli e maua ia koutou se fai feauaki, ti ko se fai feauaki leia e leaise maua foki i le kau pagani ; talie kua kaku o nofo se tasi o koutou mo le avaga o lona tamana. 2Ti kua kotou makita i le fia nealasi ! kae na leaise kotou mamae mua, o tupu ke too meia koutou leia kua fai ia le nea lena ! 3Kiate au, e kau puli fakatino ia koutou kae e kau nofo mo koutou i le laumalie, ti kua kau fakamaaui leia na fai ia le nea a ia, o sakinake kua kau nofo tonu mo koutou. 4I le suafa o le Aliki Sesu, ko koutou mo loku laumalie, ala kua fakatasi mo le mafimafi o lotatou Aliki ko Sesu,

5ke tuku le tagata lena kia Satana ke maumaui le tino, kae ke fakamauli le laumalie i le aso o le Aliki ko Sesu.

6E leaise malie lakotou fakakololia kia koutou ! Pe leaise kotou iloa ko se ga momoi fakatupu e fakatutupu ia le falina katoa ? 7Kotou fakapuli le fakatupu matua, o tupu ke kotou liliu ko se falina foou, talie kua kotou sala fakatupu. Talie ko Kilisito, lotatou Pasikate, kua momoli ma tatou. 8Koia ke tou fai le aso, kae leai ki se fakatupu matua, pe ki se fakatupu o le veli mo le agaveli, kae ki ni pane sala fakatupu o le agatonu mo le maoki.

E nofo le kilisiteano i le malama nei kae leaise kau i le malama nei

9Kua kau tosi atu i laku tosi kia koutou, ke aua na kotou fakatasi mo le kau fai feauaki : 10E leaise kau pati atu ki le kau fai feauaki katoa o le malama nei, pe ko le kau manumanu paaga, pe ko le kau kaia tagata, pe ko le kau tausi taulaatua ; talie kapau koia, e tonu loa ke kotou mavae i le malama nei. 11Ko leinei, ko le nea leia kua kau tosi atu kia koutou, ke aua na kotou fakatasi mo se tasi leia e igoa ko se taina kae fai feauaki a ia, pe manumanu paaga, pe tausi taulaatua, pe nukinuki, pe inu kava, pe kaia tagata, ti ke aua foki na kotou kai mo se tagata fenaaki. 12Talie kolea e kau fakamaaui ai loa latou mei tafa ? Pe leaise ko latou ala i loto e tonu ke kotou fakamaaui ? 13Kia latou ala i tafa, e fakamaaui latou e le Atua. Kotou too meia koutou le tagata agasala lena.

Currently Selected:

Uluaki tosi ki le kau Kolinto 5: FB2000

Highlight

Copy

Compare