Uluaki tosi ki le kau Kolinto 7

O uiga mo le avaga

1O uiga mo nea ala na kotou fai tosi mai ai kiate au, e kau manatu e malie ki le tagata ke aua na lave ki se fafine. 2Kae, o tupu ko le fai feauaki, ke tasi maua e le tagata sona avaga, ti ke tasi maua e le fafine sona avaga. 3Ke soli e le tagata ki lona avaga le nea leia e maua ai a ia kiate ia, ti ke fai fenaaki foki le fafine ki lona avaga. 4E leaise ko le fafine leia e pule ki lona tino, kae ko lona avaga. Ti e leaise ko le tagata foki leia e pule ki lona tino, kae ko le fafine. 5Ke aua na kolua fefakafitiaki ia koulua, gato fai mo kapau kua kolua loto tasi ki ai i se ga temi ikiiki, o tupu ke kolua tokaga ki le faikole ; kae ka oki a ia, ke kolua toe liliu o fakatasi, talie na fakasalai koulua e Satana i lokoulua sala tataofi. 6E kau fakasa le nea lena ofaipe se fakataga, kae e leaise faipe se fakatotonu. 7E kau fakaamu ake ke tatau tagata fuli mo au. Kae e tali e le tagata taki toka tasi se nea alofa totonu mei le Atua, ko le tasi le nea alofa leinei, ti ko le tasi ake le nea alofa leia.

8Kia latou ala na leaise avaga ti mo fafine lokonui, e kau fakasa e malie ke lotou nonofo ofaipe au. 9Kae kapau e leaise lotou kataki fualoa, ke lotou avaga ; talie e malie ake ke avaga i le vela.

Fakatotonu kia latou kua avaga

10Kia latou ala kua avaga, e kau fakatotonu, e leaise ko au, kae ko le Aliki, ke aua na mavae le fafine i lona avaga, 11(ti kapau kua mavae a ia, ke nofo a ia o leaise toe avaga pe ke toe fakatokatoka a ia mo lona avaga), ti ke aua na kapu e le tagata lona avaga.

12Ki la ake, e leaise ko le Aliki, kae ko au leia e pati : Kapau e maua e se taina sona avaga lee tui, ti e loto malie le fafine lena ke la nonofo fakatasi, ke aua na kapu e ia le fafine ; 13ti kapau e maua e se fafine sona avaga lee tui, ti e loto malie le tagata lena ke la nonofo fakatasi, ke aua na kapu e ia le tagata. 14Talie e fakatapui le tagata lee tui e lona avaga, ti e fakatapui le fafine lee tui e lona avaga ; talie kapau e leai, e liliu loa akoulua fanau o pagani, kae ko leinei, e lotou maokioki loa. 15Kapau e fia mavae leia e lee tui, ke mavae a ia. E leaise sai loa le taina pe ko le tuagaane i nea ana. Talie na kalagai tatou e le Atua ke tou mauli i le tokamalie.

16Talie e ke iloa feaki, fafine, pe ke saofaki ia loa lou avaga ? Ti e ke iloa feaki, tagata, pe ke saofaki ia loa lou avaga ?

17Ko leia fua, fetaina, ke tasi saele le tagata o mulimuli ki le vaega leia kua tuku e le Aliki kiate ia, ti mo le kalaga leia kua tali e ia mei le Atua. Ko lena le nea leia e kau fakatotonu ki Ekelesia fuli. 18Na kalagai se tasi kae kua silikosisio, ke nofo silikosisio a ia ; ti na kalagai se tasi kae lee silikosisio, ke aua na silikosisio a ia. 19Ko le nea noa le silikosisio, ti ko le nea noa le lee silikosisio, kae ko le nea leia e mauiga ko le fakalogo ki fakatotonu a le Atua. 20Ke nofo le tagata taki toka tasi i le nofo leia na nofo ai i temi o lona kalagai. 21Na kalagai a koe e ke popula, aua na ke tokaga ki ai ; kae kapau e mafai ke ke liliu o lauatea, too le faigamalie lena. 22Talie ko le tagata popula leia kua kalagai e le Aliki ko se tagata lauatea a ia a le Aliki ; ti ko le tagata lauatea leia kua kalagai e le Aliki ko se tagata popula a ia a Kilisito. 23Kua totogi koutou ki se totogi lasi ; aua na kotou liliu o popula ki ni tagata. 24Fetaina, ke kotou tasi nofo i mua o le Atua, i le nofo leia na nofo ai a ia i lona kalagai.

O uiga mo latou e leikiaise avaga

25O uiga mo latou ala e taupoou, e leaise kau maua ni fakatotonu mei le Aliki, kae e kau tuku atu laku manatu, ofaipe se tagata leia kua tali ia mei le Aliki le kalasia ke agatonu.

26Ko leinei loa le nea leia e kau manatu e malie, o tupu ko temi faigataa ala ka tuu mai : E malie ki le tagata ke nofo fenaaki. 27Kua sai a koe ki se fafine, aua na ke faiga ke motusi le sai lena ; e leikiaise sai a koe ki se fafine, aua na ke afa sou avaga. 28Kapau kua ke avaga, na leaise ke fai ia se agasala ; ti kapau kua avaga le taine taupoou, na leaise agasala a ia ; kae e maua loa e latou ana ni mamae i le tino, ti e kau loto ke kotou sao i ai.

29Ko leinei le nea leia e kau fia fakasa, fetaina : kua toetoe le temi ; koia i le temi nei e tonu ke mauli a tagata ala kua nonofo mo se avaga o sakinake e lotou sala avaga ; 30ti ko latou ala e tagi o sakinake e leaise lotou tagi ; mo latou ala e fiafia o sakinake e leaise lotou fiafia ; mo latou ala e fai fakatau o sakinake e leaise lotou maua ia se nea ; 31mo latou ala e fakaaoga ia le malama nei o sakinake e leaise lotou fakaaoga ia a ia, talie e puli loa a teu o le malama nei. 32Kae e kau loto ke kotou sala tuania. Ko le tagata leia e leaise avaga e tokaga ki nea a le Aliki, mo puleaki ke fiafia ai le Aliki ; 33kae ko le tagata leia kua avaga e tokaga ki nea o le malama nei, mo puleaki ke fiafia ai lona avaga. 34E toe fai kesekese foki le fafine avaga mo le taine taupoou : ko le fafine leia e leaise avaga e tokaga ki nea o le Aliki, o tupu ke maokioki a ia i le tino mo le laumalie ; kae ko le fafine leia kua avaga e tokaga ki nea o le malama nei, ti mo puleaki ke fiafia ai lona avaga.

35E kau fakasa le nea lena ke aoga kia koutou : e leaise tupu ke maselei ai koutou, kae ke amo ai koutou ki le nea leia e malie mo aoga ke kotou pipiki ai ki le Aliki sala fakavisi.

36O uiga loa mo laua ala kua feauaki kae kua la loto ke aua na la avaga. Kapau e manatu le tagata e leaise fai nea fakaagatonu a ia ki le taine, ti kapau e pulei a ia e lona oli fakatino, o fuafua e ia e tonu ke la avaga, ti e malie ke la avaga, o fai ki lona loto, e leaise agasala a ia. 37Kae kapau ko le tagata, sala fakamakeke mei tafa, kua fakapapau e ia i lona loto ke aua na avaga, ti kapau e mafai e ia le pulei o lona loto mo too e ia totonu le nea ke fai, e malie ke aua na avaga a ia mo le taine. 38Koia, ko le tagata leia e avaga mo lana feauaki e fai ia se nea leia e malie, ti ko le tagata leia e leaise avaga mo lana feauaki e fai ia se nea leia e toe malie lasi ake.

39Kua sai le fafine ki lona avaga i le temi katoa leia e mauli ai lona avaga ; ti kapau kua mate le tagata, e lauatea le fafine ke toe avaga mo leia e loto a ia ki ai ; ko leia fua ke fai i le Aliki. 40Kae ko laku manatu e fiafia lasi ake le fafine lena mo kapau e nofo fenaaki a ia. Ti ko au foki, e kau tui e kau maua le Laumalie o le Atua.

Currently Selected:

Uluaki tosi ki le kau Kolinto 7: FB2000

Highlight

Copy

Compare