Uluaki tosi ki le kau Kolinto 4

Fia nealasi o le kau Kolinito, fakataulalo o Paulo

1Koia, ke tio mai kia maua ofaipe ni tagata fakasausau a Kilisito, ti mo ni tagata tausi o misitelio o le Atua. 2Ti ko le nea foki leia e kole ki ni tagata tausi koloa, ke lotou tasi agatonu i lana gaoi. 3Kiate au, e leaise mauiga ke kotou fakamaaui au, pe ke fakamaaui au e se fakamaauaga a tagata. E leaise kau fakamaaui foki a au totonu, talie e leaise kau maua ni nea i loku loto ala e kau sala ai ; 4kae e leaise ko le nea lena e kau fakamatatonu ai. Ko leia e fakamaaui ia au, ko le Aliki.

5Koia ke aua na kotou fakamaaui ai se nea i mua o le aso, o kaku ki le au o le Aliki, leia e fakasa ia loa ki le malama le nea leia e munia i le fakapouli, ti mo manatu o loto. Ti e tali loa e le tagata taki toka tasi le fakavikiviki mei le Atua.

6Talie o tupu ko koutou, fetaina, leia kua kau too ai a nea ana o fakaaoga kiate au mo Apolosio, o tupu ke kotou ako i oma tagata ke aua na fakalaka i le nea leia kua tosi, ti ke aua na nofo se tasi o koutou mo se fia nealasi, o fili leia ki leia. 7Talie ko ai e fakakese ia a koe ? Kolea e ke maua na leaise ke tali ? Ti kapau na ke tali le nea lena, kolea e ke fakakololia ai, o sakinake na leaise ke tali a ia ?

8Ko leinei, kua kotou makona ; kua kotou mou koloa, kua kotou kamata sau kae sala mo maua. Ti e amusia ake ke kotou sau maoki, o tupu ke ma sau foki mo koutou ! 9Talie, e sakinake kiate au, kua tuku e le Atua matou ko apositolo ko le kau mulimuli oki i tagata fuli, ofaipe ni kau tua ki le mate, talie kua motou liliu ko ni nea manogii a le malama nei, mo le kau aselo, ti mo tagata. 10Kua motou valelea o tupu ko Kilisito, kae ko koutou, kua kotou popoto ia Kilisito ; e motou gagae, kae e kotou makeke ; e fakaapaapa kia koutou, kae e nukinuki kia matou ! 11O kaku mai ki le ola nei, e motou fia kai, mo fia inu, mo telefua ; ti e sasa matou, ti e motou taka i le ala ; 12e motou pakia i le gaoi ki omatou lima ; nukinukii, kae motou tapuaki ; fakavelivelii, kae motou kataki ; 13lauvelii, kae motou masau mo le agamalie ; o kaku mai ki le aso leinei, kua motou liliu ko ni penu o le malama nei, ko ni faikauga o tagata fuli.

14E leaise kau tosi a nea ana o tupu ke fakalumai ai koutou ; kae e kau valoki koutou ofaipe ni aku fanau alofaina. 15Talie, kapau e kotou maua foki ni pule e tino agafulu afe ia Kilisito, kae e leaise kotou maua ni tamana mauke, talie ko au leia na fanaui ia koutou ia Sesu-Kilisito ki le Evaselio. 16Koia e kau kole atu ai kia koutou, ke kotou faifaitaki mai kiate au. 17I le nea lena kua kau kakau atu ai kia koutou Timoteo, leia ko laku fanau alofaina mo agatonu i le Aliki ; e fakamanatu atu loa e ia kia koutou oku ala ia Kilisito, ala na kau ako ki Ekelesia fuli i ganea fuli.

le pule fakaapositolo o Paulo

18Kae kua fia nealasi ni iki ia koutou, o sakinake na leaise tonu ke kau natu kia koutou. 19Kae kua vave fua laku natu kia koutou, mo kapau ko le finegalo a ia o le Aliki, ti e kau iloa loa, leai a masau, kae ko le makeke o latou ala kua makita. 20Talie ko le puleaga o le Atua e leaise ko masau, kae ko le makeke. 21Kolea e kotou loto ki ai ? Ke kau natu kia koutou mo se laakau, pe mo le alofa mo se loto agamalu ?

Currently Selected:

Uluaki tosi ki le kau Kolinto 4: FB2000

Highlight

Copy

Compare