Uluaki tosi ki le kau Kolinto 3

Le gaoi a tagata fakasausau a le Atua

1Kiate au, fetaina, na leaise mafai ke kau masau atu kia koutou ofaipe ki ni tagata fakalaumalie, kae ofaipe ki ni tagata fakakanofi, ofaipe ki ni fanau liliki ia Kilisito. 2Na kau soli atu kia koutou se sua u, kae leai se nea kai fefeka, talie na leaise kotou ma tatali a ia ; ti e tatau foki i le temi nei, e leaise kotou ma tatali a ia, talie koi kotou fakakanofi. 3Talie koi maua ia koutou se finenonofo mo ni fefele, pe leaise kotou fakakanofi, pe leaise kotou saele o mulimuli ki le tagata ? 4Talie ka pati se tasi : Ko au, o Paulo au ! Ti mo se tasi ake : Ko au, o Apolosio ! Pe leaise ko ni tagata koutou ? 5Ko ai Apolosio, ti ko ai Paulo ? Ko ni tagata fakasausau fai laua, ala na kotou tui ai, o mulimuli ki le nea leia na soli e le Aliki kia laua taki toka tasi.

Ko le Atua toka tasi e mauiga i le gaoi fakakilisiteano

6Na kau to ia, ti na fakavai e Apolosio, kae na fakasomo e le Atua. 7Koia e leaise ko ia leia e to ia ko se nea, pe ko leia e fakavai ia, kae ko le Atua leia e fakasomo ia. 8Ko leia e to ia mo leia e fakavai ia e tatau laua, ti e la tasi maua loa lona fakapale o fakatatau ki lana gaoi.

Ko le fakapale o le gaoi ki le Atua

9Talie e ma kau gaoi mo le Atua. Ko koutou ko le faigasaga a le Atua, le fale o le Atua.

10O mulimuli ki le kalasia o le Atua leia kua soli mai kiate au, kua kau teki le fakavae ofaipe se tufuga fale poto, ti na fau loa e se tasi ake i aluga. Kae ke tasi tokaga ki lana faasiga fau i aluga.

Ko le fakatafito e tasi : ko Sesu-Kilisito

11Talie e leaise mafai e se tasi ke teki e ia se tasi ake fakavae kese i leia kua teki, ke iloa ko Sesu-Kilisito.

Ko fau fale e lua mo ola anoaga

12Ti kapau e fau loa e se tasi i aluga o le fakavae lena ki se aulo, se siliva, ni fatu mauiga, ni laakau, se mutie, se penui fulumeto, e fakasa loa le gaoi a le tagata taki toka tasi : 13Talie e fakasa loa a ia i le aso, talie e fakasa loa a ia e le afi ; ti e asiasii loa e le afi le anoaga o le gaoi a le tagata taki toka tasi. 14Kapau e tuumau le gaoi leia na fai e se tasi i aluga o le fakavae lena, e maua loa e ia se fakapale.

15Kae kapau e vela le gaoi a se tasi, e puli loa lona fakapale ; kae e fakamauli loa a ia, kae sakinake na fakalaka mua a ia i le afi.

16Pe leaise kotou iloa ko le fale tapu koutou o le Atua, ti e nofo le Laumalie o le Atua ia koutou ? 17Kapau e maumaui e se tasi le fale tapu o le Atua, e maumaui loa a ia e le Atua ; talie e maokioki le fale tapu o le Atua, ti ko lona fale tapu ko koutou.

18Ke aua na kakai e se tasi a ia totonu : Kapau e tui se tasi ia koutou ko se poto a ia i le sekulo leinei, ke liliu a ia ko se vale, o tupu ke liliu a ia ko se poto.

19Talie ko le poto o le malama nei ko se valea a ia i mua o le Atua. Talie kua tosi :

E tapo e ia le kau poto i lalatou fia poto.

20Ti e toe pati foki :

E iloa e le Aliki a manatu a le kau poto,

Eiloa e ia e lotou vaiga.

21Koia ke aua na fakakololia ai e se tasi ni tagata ; talie ko nea fuli ai a koutou : 22Pe ko Paulo, pe ko Apolosio, pe ko Sefasi, pe ko le malama nei, pe ko le mauli, pe ko le mate, pe ko nea o le temi nei, pe ko nea o le temi ka au. 23Ko nea fuli a koutou ; ti ko koutou a Kilisito, ti ko Kilisito a le Atua.

Currently Selected:

Uluaki tosi ki le kau Kolinto 3: FB2000

Highlight

Copy

Compare