Uluaki tosi ki le kau Kolinto 15
15
Ko le toe tuuake o Sesu-Kilisito
1E kau fakamanatu atu kia koutou, fetaina, le Evaselio leia na kau akonaki atu kia koutou, leia foki kua kotou tali, ti na kotou tuumau ai, 2leia foki kua kotou saofaki ai, mo kapau e kotou taofi a ia ofaipe laku akonaki atu a ia kia koutou ; ka leai, na kotou tui noa.
3Na kau akonaki atu kia koutou i mua o nea fuli, ofaipe le nea leia na kau tali ia foki : na mate Kilisito o tupu ko atatou agasala, o mulimuli ki le Tosi ; 4ti na tanu a ia, ti na toe tuuake a ia i le aso tolu, o mulimuli ki le Tosi ; 5ti na sa a ia kia Kefasi, ti mo le tino agafulu tupu lua. 6Ti na sa a ia ki ni fetaina e tino lelau lima tupu i le temi e tasi, ti e koi mauli nei le toka api o latou, kae kua mamate ni iki. 7Ti na sa loa a ia kia Sakopo, ti mo la ake apositolo fuli. 8Ti e i muli o latou fuli, na toe sa loa a ia kiate au, ofaipe ki se toe leia na fanaui fakatomua ; 9talie e kau ikiiki oki i le kau apositolo, ti e leaise tonu ke fakaigoa au ko le apositolo, talie na kau fakavelivelii le Ekelesia o le Atua. 10Kae i le kalasia o le Atua, kua kau liliu o feneeki, ti na leaise ano noa lona kalasia kiate au ; mamao ai, na kau gaoi lasi ake ia latou fuli, kae na leaise ko au toka tasi, kae ko le kalasia o le Atua iate au. 11Koia, pe ko au, pe ko latou, ko lena le nea leia e motou akonaki, ti ko lena le nea leia na kotou tui ki ai.
Ko le mauiga o le toe tuuake o Kilisito
12Ti ko leinei, kapau e akonaki kua toe tuuake Kilisito mei le kau mate, kolea e pati ai ni iki o koutou e leaise toe tuuake le kau mate ? 13Kapau e leaise toe tuuake le kau mate, ti na leaise toe tuuake foki Kilisito ; 14ti kapau na leaise toe tuuake Kilisito, e ano noa loa lamatou akonaki, ti e ano noa foki mo lakoutou tui. 15Ti e motou liliu foki ko ni tagata fakamaoki loi ki le Atua, talie na motou fakamaoki loi na fakatuuake Kilisito e le Atua, kae ta la na leaise toe fakatuuake e ia a ia, mo kapau e leaise toe tuuake le kau mate. 16Talie kapau e leaise toe tuuake le kau mate, ti na leaise toe tuuake foki Kilisito ; 17Ti kapau na leaise toe tuuake Kilisito, e leaise aoga lakotou tui, koi kotou nonofo i akoutou agasala, 18ti kua pulinoa foki latou ala na mamate ia Kilisito. 19Ti kapau e tou amanaki malie fua kia Kilisito i le mauli leinei, ko nea fakaaloalofa oki tatou i tagata fuli.
Sesu-Kilisito ko le uluaki na toe tuuake
20Kae ko leinei, kua toe tuuake maoki Kilisito mei le kau mate, ti kua soko a ia ko le uluaki fua o latou ala kua mamate. 21Talie na au le mate mei se tagata e tasi, ti na au foki le toe tuuake mei se tagata e tasi. 22Ti na mamate a tagata fuli ia Atama, e tatau foki, e toe mauli loa a tagata fuli ia Kilisito, 23kae e tasi nofo loa i lona tuuaga : ko le uluaki fua ko Kilisito, ti oki ko latou ala e kau ia Kilisito i lana toe liliu mai. 24Ti e soko loa le fakaoki, mo ka tuku loa e ia le puleaga ki leia e Atua mo Tamana, i le oki o lana maumaui a pule fuli, mo lagiaki fuli, ti mo makeke fuli. 25Talie e tonu ke pule a ia o kaku ki lana tuku ia ona fili fuli ki lalo o ona vae. 26Ko le fili fakamuli leia e maumaui loa, ko le mate. 27Talie, na tuku e le Atua a nea fuli ki lalo o vae o Kilisito. Kae i lana pati kua fakataulaloi a nea fuli kia Kilisito, e matala ai ko leia na soli ia kiate ia a nea fuli, e leaise kau i ai. 28Ti ka oki loa le fakataulaloi o nea fuli kia Kilisito, e fakataulalo loa le Alo totonu ki leia na tuku ia a nea fuli kiate ia, o tupu ke katoa le Atua i nea fuli.
Le maoki o le toe tuuake
29Ka leai, kolea e fai loa e latou ala kua papitema ki le kau mate ? Kapau e leaise toe tuuake ai le kau mate, kolea e lotou papitema ai ki le kau mate ? 30Ti ko matou, kolea e motou teiteiki ai omatou mauli i ola fuli ? 31I le aso taki tasi e fakaali au ki le mate, e kau fakasa atu, fetaina, i le kololia leia e kau maua o tupu ko kotou ia Sesu-Kilisito lotatou Aliki.
32Kapau ko ni tio fakatagata ala na kau tau ai ki manu fekai i Efeso, kolea lona aoga mai kiate au ? Kapau e leaise toe tuuake le kau mate,
Tou kai ti tou inu, talie e tou mamate loa apogipogi.
33Aua na kotou fai sala : E maumaui e kaukaunea veveli a aga malilie. 34Kotou toe liliu mai kia koutou totonu, ko lena le nea leia e totonu, ti aua na kotou agasala ; talie e leaise iloa e ni iki o koutou le Atua, e kau fakasa a ia ke kotou luma ai.
Le tino o latou e toe tuuake
35Kae e pati loa se tasi : E feaki loa le toe tuuake a le kau mate, ti ko tino feaki ala e au loa mo latou ? 36Ko le vale a koe ! ko le nea leia e ke muluki e leaise mauli mo kapau e leaise mate mua a ia. 37Ti ko le nea leia e ke muluki, e leaise ko le tino lena e somo ake loa ; ko se fatui fakaili fai a ia, ofaipe se fatui fulumeto, pe ko se tasi ake fatui fakaili ; 38Ti e soli loa e le Atua kiate ia se tino ofai ki lona loto, ti e soli e ia ki pulapula taki tasi se tino leia e ano totonu mo ia.
39E leaise tatau a kanofi fuli ; e kese fai le kanofi o tagata, ti e kese le kanofi o le manu, ti e kese le kanofi o manu lele, ti e kese le kanofi o ika. 40E i ai foki ni tino fakaselo, ti mo ni tino fakakele ; kae e kese fai le gigila o tino fakaselo, ti e kese le gigila o tino fakakele. 41E kese fai le gigila o le laa, ti e kese le gigila o le masina, ti e kese le gigila o fetuu ; ti e kese le gigila o le tasi fetuu mei le tasi fetuu.
42E toe fenaaki foki mo le toe tuuake o le kau mate. E muluki le tino e pala, kae e toe tuuake a ia e lee pala ; 43E to a ia e fakalialia, kae e toe tuuake a ia e fakakololia ; e muluki a ia e gaegae, kae e toe tuuake a ia e apele i le makeke ; 44E to a ia e fakanatula, kae e toe tuuake loa a ia e fakalaumalie. Kapau e i ai se tino fakanatula, e i ai foki se tino fakalaumalie. 45Koia e tuu ai i le tosi : Ko le uluaki tagata, ko Atama, na liliu a ia ko se laumalie mauli. Ko le Atama fakamuli, ko Sesu, kua liliu a ia ko se Laumalie fakamauli. 46Kae e leaise muamua le nea leia e fakalaumalie, ko le nea leia e fakanatula ; e mulimuli le nea leia e fakalaumalie. 47Ko le uluaki tagata, leia na tupu mei le kele, e fakakele ; ko le lua tagata ko le Aliki a ia mei lagi. 48Ko latou ala e kau ki le kele, e tatau mo leia na au mei le kele ; kae ko latou ala e kau ki Selo e tatau mo leia na au mei Selo. 49Ti e tatau foki mo tatou : na tou maua le paaki o le tagata mei le kele, ti kua tou toe maua foki le paaki o leia na au mei Selo.
Malo o le toe tuuake i le mate
50Ko le nea leia e kau fakasa, fetaina, e leaise feala ke maua e le kanofi mo le toto le puleaga o le Atua, ti e leaise feala ke maua e nea pala a nea lee pala.
51Ko leinei, e kau fakasa kia koutou se misitelio : E leaise tou mamate fuli loa, kae e tou fetogi fuli loa, 52i se temi e tasi, i le kemo o le mata, i le pupusi o le fakatagi fakamuli. E tagi loa le fakatagi pupusi, ti e toe tuuake loa le kau mate i ni tino lee pala, ti ko tatou, e tou fetogi loa. 53Talie e tonu ke kofu e le tino pala leinei le lee pala, ti ke kofu e le tino mate leinei le mauli lee gato.
54Ka kofu loa e le tino pala leinei le lee pala, ti ka kofu loa e le tino mate leinei le mauli lee gato, ti e soko loa le folafola leia e tuu i le Tosi :
Kua folo le mate e le malo.
55 Ei mate, kofea lou malo ?
Ei mate, kofea lou makeke ?
56Ko le pule o le mate ko le agasala ; ti ko le makeke o le agasala ko le lao. 57Kae ke tuku le fakafetai ki le Atua, leia kua soli ia kia tatou le malo i lotatou Aliki ko Sesu-Kilisito ! 58Koia, ei oku fetaina alofaina, ke kotou tuu makeke, lee taugaoi, o gaoi ke asilisili malie ki le Aliki, o kotou iloa e leaise ano noa akoutou gaoi i le Aliki.
Currently Selected:
Uluaki tosi ki le kau Kolinto 15: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
