Uluaki tosi ki le kau Kolinto 14
14
Fakaaoga o nea alofa i le Ekelesia
1Kotou afa le alofa. Kotou oli ki nea alofa fakalaumalie, kae tafito ki leia o le kikite.
2Talie, ko leia e masau i masau kesekese e leaise masau a ia ki tagata, kae ki le Atua, talie e leaise matala se tasi kiate ia, ti e masau a ia i le Laumalie ki ni misitelio. 3Kae ko leia e kikite e masau a ia ki tagata, ke faufau latou, mo fakalotomakeke latou, mo fakafimalie latou. 4Ko leia e masau i masau kesekese e fakamakeke fua e ia a ia totonu ; kae ko leia e kikite e fakamakeke e ia le Ekelesia.
5E kau fakaamu ke kotou masau fuli i masau kesekese, kae e toe malie ake ke kotou kikite. E lasi ake leia e kikite i leia e masau i masau kesekese, mo kapau e fakamatala e ia lana masau ke faufau ai le Ekelesia. 6Ti ko leinei, fetaina, kolea loa loku aoga kia koutou mo kapau e kau natu kia koutou o masau atu i ni masau kesekese, kae e leaise kau masau atu kia koutou i se levelasio, pe i se iloa, pe i se kikite, pe i se akonaki ?
7Kapau ko nea lee mauli ofaipe le fakatagi pupusi mo le ukalele, ala e tasi tuku ia lona musika totonu, e leaise la tuku ia se fa nota leia e matala malie, pe feaki loa ke iloa kesekese laua ? 8Ti kapau e leaise matala le tagi o le fakatagi pupusi, ko ai e teuteu loa ki le tau ? 9E tatau foki mo koutou, kapau e leaise kotou tuku ia ki lokoutou alelo se folafola leia e matala, pe feaki loa ke iloa le nea leia e kotou fakasa ia ? Talie e kotou masau loa i le aele.
10Ti e logo ai e maua ni masau kesekese i le malama nei, e leaise masau fua e tasi e leai sona uiga ; 11Ti kapau loa e leaise kau iloa le uiga o se masau, e kau fai loa pe se matapule ki leia e masau, ti ko leia e masau i le masau lena e fai loa a ia pe se matapule kiate au. 12Ti ke tatau foki mo koutou. Kapau e kotou oli ki nea alofa fakalaumalie, kotou afa ke kotou mou koloa i nea ala e faufau ia le Ekelesia.
13Koia ko leia e masau i se masau kese, ke kole e ia le nea alofa o le fakamatala. 14Talie kapau e kau faikole i se masau kese, e faikole loku laumalie, kae e nofo paa loku atamai. 15Kolea loa ke fai ? E kau faikole loa i le laumalie, kae e kau toe faikole foki i loku atamai ; e kau sua loa i le laumalie, kae e kau toe sua foki i loku atamai. 16Talie kapau e ke fakafetai fai i le laumalie, pe feaki loa ke tali mai leia e fakalogo : Amene ! mo kapau e leaise iloa e ia le nea leia e ke fakasa ia ? 17E maoki e ke fai ia ni fakafetai malilie ai, kae e leaise faufau leia ake. 18E kau fakafetai ki le Atua i laku masau i masau kesekese o lasi ake ia koutou fuli, 19kae, i le Ekelesia, e malie ake kiate au ke kau puaki ni kupu e lima i loku atamai, o tupu ke akoi ai foki ala ake, i ni kupu e kau agafulu afe i se masau kese.
20Fetaina, aua na kotou fakatoe i le potu o le fakamaau ; kae kotou faipe ni toe liliki i le potu o le agaveli, ti kotou faipe ni tagata kua katoa i potu o le fakakaukau.
21Kua tosi i le lao :
Ko ni tagata o se masau kese,
Ti mo ni laugutu o ni matapule,
Ala e kau masau ai loa ki le kakai lena,
Ti e leaise lotou fakalogo mai loa kiate au i ai foki, e pati le Aliki.
22Koia, ko masau kesekese ko se fakamailoga, o leai ki le kau tui, kae ki le kau lee tui ; kae ko le kikite, ko se fakamailoga a ia ki le kau tui, kae leai ki le kau lee tui. 23Kapau loa, i se fakatasi a le Ekelesia katoa, e masau fuli i masau kesekese, kae ulu mai ni iki ala e leaise matala pe ko ni iki ala e lee tui, pe leaise lotou pati loa kua kotou valelea ? 24Kae kapau e kotou kikite fuli, kae e ulu mai loa se tasi leia e lee tui, pe ko se tagata leia e fia logo, e lave loa akoutou masau i lona loto, ti e fakamaaui loa a ia e koutou fuli, 25ti e fakasa loa a manatu fakapulipuli o lona loto ; ti e fakamapee loa a ia ki le kele, o atolasio ki le Atua, mo fakasa e nofo maoki ai le Atua ia koutou.
Ko le fai o nea alofa i le Ekelesia
26Kolea loa ke fai, ei fetaina ? I akoutou fakatasi, ka maua loa e ni iki se katiko, se akonaki, se levelasio, se masau kese ti mo lona fakamatala ; ke fai nea fuli ke faufau ai le Ekelesia. 27Kae kapau e masau ni iki i masau kesekese, ke masau fai se toka lua pe ko se toka tolu, o tasi mo ia lona lakaga, kae ke fakamatala e se tasi ; 28Kae kapau e leaise maua se tasi ke fakamatala ia, ke fakalologo i le Ekelesia, ti ke masau kiate kita totonu mo le Atua. 29O uiga mo le kau polofeta, ke masau se toka lua pe ko se toka tolu, kae ke fakamaau e la ake ; 30kapau e maua e se tasi leia e tonatona i lalo se levelasio, ke fakalologo le uluaki. 31Talie e mafai ke kotou kikite fuli o fakaoloolo, o tupu ke akoi mo fakalotomakeke ai a tagata fuli. 32E fakalogo a laumalie o le kau polofeta ki le kau polofeta ; 33talie ko le Atua e leaise ko se Atua o le maveuveu, kae ko le Atua o le tokamalie. Ofaipe i Ekelesia fuli o le kau sagato, 34ke fakalologo fafine i fakatasi, talie e leaise taga ke lotou masau i ai ; kae ke lotou fakataulalo, ofaipe lona fakasa foki e le lao. 35Kapau e lotou fia iloa se nea, ke lotou vesili ki olatou avaga i olatou kaiga ; talie e fakalumaluma ke masau le fafine i le Ekelesia. 36Pe na au le folafola a le Atua meia koutou ? Pe ko koutou fai ala kua kaku atu ki ai le folafola ?
37Kapau e pati se tasi ko se polofeta a ia, pe maua e ia se nea alofa fakalaumalie, ke iloa e ia ko le nea leinei e kau tosi atu kia koutou ko se fakatotonu a ia mei le Aliki. 38Kapau e fakapouli se tasi ki le nea lena, ke aua na tokaga kiate ia.
39Koia loa, fetaina, kotou oli ki le kikite, ti aua na kotou taofi ke masau i masau kesekese. 40Kae ke fai nea fuli i le fakaapaapa mo le fakatokatoka.
Currently Selected:
Uluaki tosi ki le kau Kolinto 14: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
