Uluaki tosi ki le kau Kolinto 13
13
Ko nea alofa fakalaumalie e tonu ke fakaaoga i le alofa
1Kapau e kau masau loa i pati a tagata mo le kau aselo, kae e leaise kau maua le alofa, kua kau tatau mo se fa pele leia e tagi, pe ko se fa nafa leia e gugulu. 2Ti kapau e kau maua loa le nea alofa o le kikite, mo le iloa o misitelio fuli, ti mo le poto katoa ; ti kapau e kau maua loa le tui katoa o kaku ki le siki o mauga, kae e leaise kau maua le alofa, ko le nea noa au. 3Ti kapau e kau tufa loa oku koloa fuli ke fagai ai le kau mativa, ti kapau e kau tuku loa loku tino ke tutu, kae e leaise kau maua le alofa, e leaise aoga le nea lena kiate au.
4E kataki fualoa le alofa, ti e apele a ia i le agamalie ; e leaise loto veli le alofa ; e leaise viki tonu le alofa, ti e leaise fia nealasi a ia, 5e leaise fai fua e ia se nea veli, e leaise afa e ia lona malie, e leaise ita gaofie a ia, e leaise masalosalo veli a ia, 6e leaise fiafia a ia i le nea leia e sala, kae e fiafia a ia i le maoki ; 7e uufi e ia a nea fuli, e tui a ia ki nea fuli, e amanaki malie a ia ki nea fuli, e kataki e ia a nea fuli.
8E leaise puli le alofa i se aso. E gato loa a kikite, e gato loa a masau kesekese, e gato loa le iloa. 9Talie e tou iloa fakakoga, ti e tou kikite fakakoga, 10kae ka au loa le nea leia e saosaoa, e puli loa le nea leia e fakatemi. 11I le temi leia na kau ikiiki ai, na kau masau ofaipe se toe, ti na kau manatu ofaipe se toe, ti na kau fakakaukau ofaipe se toe ; kae i le temi leia na kau liliu ai o tagata, na kau tuku kese loa a naunau o le toe. 12I le temi nei e tou tio nenefu ofaipe i se tiloata, kae i se aso e tou tio mata loa, le mata ki le mata ; i le aso nei e kau iloa fakakoga, kae i le aso a ia e kau iloa katoa loa ofaipe loku iloa katoa e le Atua.
13I le aso nei e tuu mau a nea anei e tolu : Le tui, mo le amanaki malie, ti mo le alofa ; kae ko leia e lasi ake i nea ana, ko le alofa.
Currently Selected:
Uluaki tosi ki le kau Kolinto 13: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
