Ɛdi 35
35
Azuamgbole mɔɔ bɛvale bɛmanle Livaema la
1 #
Dwɔ 21.1-42
Wɔ Mowabe ɛsɛlɛ ne mɔɔ wɔ Dwɔdan ne anzi, mɔɔ wɔ Gyɛleko la anu, Ɛdɛnkɛma zele Mosisi kɛ, 2“Ka kile Yizilayɛma kɛ, bɛva bɛ azɛlɛ ne mɔ azo azuamgbole ne mɔ bie bɛmaa Livaema bɛmaa bɛdɛnla zolɛ. Eza bɛmaa bɛ azuamgbole ne mɔ anwo azɛlɛ mɔɔ bɛdidi zolɛ la. 3Azuamgbole ne mɔ bayɛ bɛ ɛdeɛ bɔkɔɔ, yɛɛ bɛ nlankɛ nee bɛ nyɛmoa ne mɔ badidi azɛlɛ ne azo. 4Azuamgbole ne mɔ azɛlɛ ne mɔɔ bɛbava bɛamaa Livaema ayɛ adidileka la bɔ ye suakpole ne bane ne anwo na ɔkɔ toonwo mita ɛya nna abulanlu wɔ ye afoa nu ɛleka biala. 5Ye afoa nu ne mɔ kɔsɔɔti sɛ, yemɔti azɛlɛ ne mɔɔ bɔ yia suakpole ne la le mita ɛya ngɔnla, yɛɛ suakpole ne wɔ avinli. 6Azuamgbole mɔɔ bɛva bɛmaa Livaema la le nsia mɔɔ bayɛ ɛvealeka mɔɔ bɛbamaa awie mɔɔ anye ɛnla nwolɛ na ɔkɛhu sonla la adenle bɛamaa yeahɔvea a. Eza bɛva azuamgbole abulanla nee nwiɔ bɛboka bɛ nwo. 7Azuamgbole mɔɔ bɛva bɛmaa Livaema la le abulanla nee mɔtwɛ nee nwolɛ adidileka. 8Na azuamgbole mɔɔ bɛbayeye bɛavi Yizilayɛma azɛlɛ ne mɔ azo bɛamaa Livaema la, bɛmaa mbusua ekpunli mgbole ne mɔ ɛdeɛ ne ɛzo, na ngyikyi ne mɔ ɛdeɛ ne ɛyɛ ngyikyi, kɛmɔ abusua ekpunli biala agyadeɛ mɔɔ ɔkɛnyia ye la kpole de la.”
Ɛvealeka azuamgbole ne mɔ
(Mɛla 19.1-13; Dwɔ 20.1-9)
9Ɛdɛnkɛma zele Mosisi kɛ, 10“Ka kile Yizilayɛma kɛ: Saa bɛpɛ Azule Dwɔdan ne bɛkɔ Keena a, 11bɛye azuamgbole bɛyɛ ɛvealeka mɔɔ saa awie anye ɛnla nwo na ɔku sonla a ɛnee ɔnriandi ɔkɔfea ɛkɛ la. 12Azuamgbole zɔhane bayɛ ɛleka mɔɔ awie mɔɔ kɛhu sonla la nriandi kɔ a, amaa yeavi mɔɔ kpondɛ kɛ ɔku ye bie ɔsie ye awie ne mɔɔ yehu ye la abo zo la asa. Awie mɔɔ ɛhu sonla la, ɔnle kɛ bɛku ye wɔ mekɛ mɔɔ bɛtɛdile ye edwɛkɛ wɔ bagua nu la. 13Ɛvealeka azuamgbole ne mɔ ɔwɔ kɛ yɛ nsia ala. 14Bɛye nsa wɔ Dwɔdan aduduleɛ afoa nu, na bɛye nsa wɔ Keena azɛlɛ zo. 15Ɛhye mɔ bayɛ ɛvealeka amaa Yizilayɛma nee nyɛvolɛ mɔɔ de maanle ne anu kpɔkpɔ anzɛɛ nyɛvolɛ mɔɔ ɛlɛpɛ nu aze la. Awie biala mɔɔ anye ɛnla nwo na ɔkɛhu sonla la kola nriandi kɔfea biala azo.
16-18“Noko saa awie fa debie mɔɔ le kɛ bolɛ anzɛɛ bulalɛ anzɛɛ kokolobaka bɔ sonla ku ye a, sonla ne mɔɔ hunle ahenle ne la di fɔlɛ, ɔwɔ kɛ bɛku ye bie bɛtua. 19Ahenle ne mɔɔ bɛhu ye la anwo sonla fɔɔnwo a ku ahenle mɔɔ di fɔlɛ ne la a. Ɛleka biala mɔɔ ɔkɛyia ye la, ɔwɔ kɛ ɔku ye.
20“Saa sonla kpɔ awie na ɔwɔ ye dadeɛ anzɛɛ ɔsia ye ɔfuandi debie ɔbɔ ye ɔku ye, 21anzɛɛ saa ɔfa ɛkpɔlɛ ɔto ye kɛlɛ ɔku ye a, ɔdi fɔlɛ, ɔwɔ kɛ bɛku ye.
22“Na saa awie nee ɔ gɔnwo ɛnlɛ edwɛkɛ biala wɔ bɛ avinli na ɔwɔ ye debie, anzɛɛ saa yeandɛ ye na ɔkavuandi debie ala, 23anzɛɛ ɔkado bolɛ bie na yeannwu ye, na ɔ nee ye yia nu ɔku ye, wɔ mekɛ mɔɔ ɔ nee ye ɛnlɛ bie, yɛɛ ɔnlɛ adwenle ɛtane kɛ ɔdi kɔdiawu gyima la a, 24maanlema ne ɔwɔ kɛ dua mɛla ɛhye mɔ azo di edwɛkɛ ne. 25Ɔwɔ kɛ maanlema ne pepɛ die ye fi ahenle ne mɔɔ kpondɛ kɛ ɔsenra ye la asa anu. Ɔwɔ kɛ bɛfa ye bɛkɔ ɛvealeka ne mɔɔ ɔnriandile ɔhɔveale la, na ɔtɛnla ɛkɛ ne toonwo kɔkpula mekɛ mɔɔ Sɛlɛvolɛ Kpanyinli ne mɔɔ bɛkpokpale ye nwole nwuanzanwuanza ne la kɛwu la. 26Na saa ahenle ne mɔɔ hunle sonla ne la vi ye ɛvealeka ne finde tɛla ɛvealeka ɛweɛne ne, 27na ahenle mɔɔ yehu ye la anwo sonla fɔɔnwo nwu ye na ɔku ye a, ɔnli fɔlɛ. 28Ɔluakɛ ɔwɔ kɛ ɔtɛnla ɛvealeka ne toonwo kɔkpula Sɛlɛvolɛ Kpanyinli ne ewule na yeazia yeahɔ ye sua zo. 29Ɛleka biala mɔɔ bɛwɔ la, mɛla ɛhye mɔ wɔ ɛkɛ maa bɛ nee bɛ bo zo amra.
30“Saa awie ku sonla a, ɔwɔ kɛ menli di nwolɛ daselɛ na bɛbua ye ewulefɔlɛ na bɛku ye. 31Ɔnle kɛ kɔdiawu biala mɔɔ bɛkɛbua ye ewulefɔlɛ la tua ezukoa die ɔ nwo, ɔwɔ kɛ bɛku ye. 32Saa sonla nriandi kɔfea ɛvealeka a, bɛmmamaa ye adenle bɛmaa ɔtua ezukoa biala na ɔsia ɔkɔ ye sua zo kolaa na Sɛlɛvolɛ Kpanyinli ne awu. 33Saa bɛyɛ ɛhye a evinli baha azɛlɛ ne mɔɔ bɛde zolɛ la. Ɔluakɛ mogya maa evinli ka azɛlɛ ne, yemɔti saa bɛangu kɔdiawu ne a, adenle biala ɛnle ɛkɛ mɔɔ bɛdua zolɛ bɛnua azɛlɛ ne a ɔkɛda a, kyesɛ kɔdiawu ne mogya ne ala. 34Azɛlɛ ne mɔɔ bɛde zolɛ la, bɛmmamaa evinli ka ye, ɔboalekɛ medame a mele Ɛdɛnkɛma a, yɛɛ mede me menli Yizilayɛma avinli.”
Currently Selected:
Ɛdi 35: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
