Ɛdi 34
34
Azɛlɛ ne ɛweɛne ne mɔ
1Ɛdɛnkɛma zele Mosisi kɛ, 2“Ka kile Yizilayɛma kɛ: Saa bɛdwu Keena azɛlɛ ne azo, azɛlɛ ne mɔɔ melɛfa meamaa bɛ la azo a, bɛgyigya ɛweɛne ne mɔ zɛhae: 3Nyiakɛ ɛweɛne ne bɔ ye Zen fienemgbole nu, ɔlua Yidɔm afoa nu. Ɔbɔ ɔ bo wɔ aduduleɛ afoa nu wɔ Nyevile Wulera ne nyiakɛ. 4Na ɛweɛne ne abele ɔ nwo wɔ Akelabem Ademgbolezo nyiakɛ, yeapɛ nu wɔ Zen na yeahɔdwu Keedɛhye Baanɛya nyiakɛ. Akee ɔtenrɛ ɔ nwo ɔkɔ Heeza Adaa na ɔkɔ Azemɔn. 5Ɔdwu ɛkɛ a ɔkakyi ɔ nwo ɔkɔ bɔnza ne mɔɔ wɔ Yigyibiti ɛweɛne zo la anu, na yeahɔgua ye Mɛdetɛlenia Nyevile ne anloa.
6“Adɔleɛ afoa nu ɛweɛne ne a le Mɛdetɛlenia Nyevile ne.
7“Sɔlɔ ɛweɛne ne vi Mɛdetɛlenia Nyevile ne anloa kɔdwu Hɔɔ Boka, 8na ɔvi ɛkɛ ne yeahɔ Heemate Ademgbolezo. Ɔbadoa zo yeahɔ Zidade, 9na eza yeahɔ Zefɔlɔn, na yeahɔgua ye Heeza Yinan.
10“Aduduleɛ ɛweɛne ne vi Heeza Yinan kɔdwu Hyifam. 11Akee ɔbawɔne ɔ ti nyiakɛ yeahɔ Habɛle wɔ Eyen aduduleɛ, na yeahɔ Galeli Tandane ne aduduleɛ ɛvoleɛ. 12Ɔdwu ɛkɛ a ɔbawɔne ɔ ti aze yeava nyiakɛ, yealua Azule Dwɔdan ne anloa yeahɔgua ye Nyevile Wulera ne anloa.
“Bɛ azɛlɛ ne ɛweɛne nna ne, bɛmɛ ɛ.”
13 #
Dwɔ 14.1-5
Mosisi hanle hilele Yizilayɛma kɛ, “Azɛlɛ ne mɔɔ Ɛdɛnkɛma ɛva ɛmaa mbusua ekpunli ngɔnla nee foa ne, mɔɔ bɛbagua nwolɛ nzeleba bɛahyɛ bɛava la ɛne. 14Wulubɛn nee Gaade mbusua ekpunli ne mɔ nee Manasɛ abusua ekpunli ne foa ko asa ɛha bɛ afoa nu ɛdeɛ 15wɔ Dwɔdan aduduleɛ afoa nu mɔɔ bikye Gyɛleko la.”
Mgbanyima mɔɔ nea bɛamaa bɛahyɛ azɛlɛ ne la
16Ɛdɛnkɛma zele Mosisi kɛ, 17“Sɛlɛvolɛ Ɛlieza nee Nɛn ara Dwɔhyua a bahyɛ azɛlɛ ne amaa menli ne a. 18Bɛye mbusua ekpunli ne mɔ mgbanyima ngoko bɛmaa bɛboa bɛ bɛmaa bɛhyɛ azɛlɛ ne.” 19-28Menli ɛhye mɔ a Ɛdɛnkɛma yele bɛ a:
| Abusua Ekpunli | Abusua Kpanyinli |
|---|---|
| Dwuda | Gyɛfɛni ara nrenya Kalɛbe |
| Semɛyɔn | Amehɛde ara nrenya Hyɛlumeɛle |
| Bɛngyaman | Keleselɔn ara nrenya Yilaedade |
| Dan | Dwɔgelae ara nrenya Bɛkae |
| Manasɛ | Yifɔdo ara nrenya Haneɛle |
| Yifelaem | Hyefetan ara nrenya Kɛmuwɛle |
| Zɛbulɛn | Panake ara nrenya Yilaezeefan |
| Yesakaa | Azan ara nrenya Paleteɛle |
| Ahya | Hyɛlomae ara nrenya Ahaehɛde |
| Nafetalae | Amehɛde ara nrenya Pɛdaahɛle |
29Menli ɛhye mɔ a Ɛdɛnkɛma yele bɛ manle bɛhyɛle Keena azɛlɛ ne bɛmanle Yizilayɛma a.
Currently Selected:
Ɛdi 34: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
