Ɛdi 31
31
Bɛ nee Medeanema konle nwuanzanwuanza ne
1Ɛdɛnkɛma zele Mosisi kɛ, 2“Kɔdua Medeanema kakɛ wɔ mɔɔ bɛvale bɛyɛle Yizilayɛma la anwo. Ɛhye anzi, ɛbawu.”
3Na Mosisi hanle hilele menli ne kɛ, “Ɛlɔnema mɔɔ wɔ bɛ avinli la ɛboɔboa bɛ nwo na yɛkɔ konle. Yɛkazenra Medeanema wɔ mɔɔ bɛyɛle bɛmanle Ɛdɛnkɛma la anwo. 4Bɛye menli apenle ko bɛvi abusua ekpunli biala anu.” 5Yemɔti bɛ muala bɛ dodo yɛle apenle ngoko bulu nee nwiɔ. 6Na Mosisi manle Sɛlɛvolɛ Ɛlieza ara Fenɛhaze lile bɛ ti, na ɔsesale ninyɛne mɔɔ wɔ ɛleka nwuanzanwuanza ne la nee aweɛne ndendenle ne mɔ mɔɔ bɛbɔ bɛfɛlɛ ɛlɔnema ne la na ɔ nee bɛ hɔle. 7Na kɛmɔ Ɛdɛnkɛma zele Mosisi la, bɛtetale Medeanema na bɛhunle nrenya biala. 8Bɛhunle Medean arelemgbunli nnu ne, Yivae, Rilikɛm, Zuli, Huuli, yɛɛ Riliba bɛbokale nwolɛ. Eza bɛhunle Biyɔ ara nrenya Beelam.
9Yizilayɛma hyele Medean mraalɛ nee ngakula nuokɛ, bɛhyele bɛ nlankɛ nee bɛ mboane, bɛvenle bɛ nwo ninyɛne kɔsɔɔti, 10na bɛyelale bɛ azuamgbole nee bɛ azokoɛleɛ ne mɔ. 11Bɛvale ninyɛne mɔɔ bɛnyianle, menli mɔɔ bɛhyele bɛ wɔ konle ne anu nee nyɛmoa kɔsɔɔti. 12Akee bɛvale menli mɔɔ bɛhyele bɛ nee ninyɛne mɔɔ bɛnyianle la bɛrɛlɛle Mosisi, Sɛlɛvolɛ Ɛlieza nee Yizilayɛma kɔsɔɔti mɔɔ wɔ Mowabe fienemgbole ne mɔɔ wɔ Dwɔdan ne anloa wɔ Gyɛleko afoa nu la.
Ɛlɔnema ne sia bɛ nzi
13Mosisi nee Sɛlɛvolɛ Ɛlieza nee mgbanyima ne mɔ dule bɛ bo wɔ azokoɛleɛ ne hɔyiale ɛlɔnema ne. 14Na Mosisi vale mgbanyinli mɔɔ nea ɛlɔnema ne anwo zo la, safohyenlema mɔɔ nea ɛlɔnema apenle apenle nwo zo nee safohyenlema mɔɔ nea ɛlɔnema ɛya ɛya nwo zo mɔɔ vi konle ne anloa ɛra la anwo ɛya. 15Mosisi bizale bɛ kɛ, “Duzu ati a bɛgyakyi mraalɛ ne mɔ kɔsɔɔti ɛ? 16#Ɛdi 25.1-9 Bɛhakye kɛ mraalɛ ɛhye mɔ a diele Beelam folɛdulɛ ne na bɛammaa Yizilayɛma anli nɔhalɛ ammaa Ɛdɛnkɛma wɔ Piyɔ na bɛhwenle ewulenzane bɛdole Ɛdɛnkɛma menli ne avinli la. 17Ɛhye ati bɛhu ngakula mrenya kɔsɔɔti nee raalɛ biala mɔɔ nrenya ɛva ye ɛlɛ la, 18na bɛgyakyi ngakula mraalɛ nee mbɛlɛra mɔɔ ɛnze nrenya fee la, na bɛhyɛ bɛ bɛva. 19Awie biala mɔɔ ɛhu sonla anzɛɛ ɛva ɔ sa ɛha funli la ɛhɔdɛnla azokoɛleɛ ne kandiba toonwo kenle nsuu. Kenle nsa ne nee kenle nsuu ne azo, bɛnlua bɛ nwo na bɛnlua menli mɔɔ bɛhyele bɛ wɔ konle ne anu la. 20Bɛnlua tɛladeɛ biala, debie biala mɔɔ bɛva nwoma, abɔnkye enrinli nee mbaka bɛyɛ la.”
21Sɛlɛvolɛ Ɛlieza hanle hilele ɛlɔnema ne mɔɔ vi konle ne ɛra la kɛ, “Mɛla mɔɔ Ɛdɛnkɛma ɛva ɛmaa Mosisi la ɛne. 22-23Debie biala mɔɔ ka senle a ɔnyela, debie mɔɔ le kɛ ezukoa nvutuke, dwɛtɛ fufule, kɔbele, bulalɛ, kyɛnze anzɛɛ sumi la, bɛva bɛha senle bɛdu nwolɛ. Eza bɛva evinlidulɛ nzule ne bɛnlua bɛ. Debie gyɛne biala mɔɔ ka senle a ɔyela la, bɛva nzule ne mɔɔ bɛfa bɛtu evinli la bɛnlua ye. 24Kenle nsuu ne azo, bɛkpo bɛ nwo ninyɛne, na bɛ nwo kɛde na akee bɛara azokoɛleɛ ɛkɛ.”
Ninyɛne mɔɔ bɛnyianle la ɛhyɛlɛ
25Ɛdɛnkɛma zele Mosisi kɛ, 26“Ɛdawɔ nee Sɛlɛvolɛ Ɛlieza nee mbusua mgbanyinli ne mɔ, bɛdia ninyɛne mɔɔ bɛnyianle nee menli nee nyɛmoa mɔɔ bɛhyele bɛ la. 27Bɛhyɛ ninyɛne ne mɔ anu nwiɔ. Bɛva ko bɛmaa ɛlɔnema ne na bɛva ko ne noko bɛmaa menli mɔɔ ɛha la. 28Ɛlɔnema ne afoa nu ɛdeɛ ne, die nwolɛ adwule maa Ɛdɛnkɛma. Menli ɛya nnu biala, bɛye nuhua sonla ko, zɔhane ala yɛɛ bɛyɛ nlankɛ, asoaso, mboane, yɛɛ mbɔnkye ne mɔ a. 29Bɛva bɛmaa Sɛlɛvolɛ Ɛlieza bɛmaa ɔva ɔyɛ azubɔdeɛ ɔmaa Ɛdɛnkɛma. 30Yizilayɛma mɔɔ ɛha la afoa nu ɛdeɛ ne, menli abulanlu biala, bɛye nuhua ko, zɔhane ala yɛɛ bɛyɛ nlankɛ, asoaso, mboane, yɛɛ mbɔnkye ne mɔ a. Bɛva bɛmaa Livaema mɔɔ nea Ɛdɛnkɛma Ndanlɛ Sua ne la.” 31Mosisi nee Sɛlɛvolɛ Ɛlieza yɛle mɔɔ Ɛdɛnkɛma zele Mosisi la.
32-35Ninyɛne mɔɔ ɛlɔnema ne nee bɛ rale la dodo ɛne: mboane apenle ngoko ɛya nsia abulasuu nee nnu, nlankɛ apenle ngoko abulasuu nee nwiɔ, asoaso apenle ngoko abulasia nee ko, yɛɛ mraalɛ mbɛlɛra mɔɔ ɛtɛnwunle nrenya ɛlɛ la apenle ngoko abulasa nee nwiɔ. 36-40Ɛlɔnema ne afoa nu ɛdeɛ foa ko ne mɔɔ bɛnyianle la le mboane apenle ngoko ɛya nsa abulasa nee nsuu, ɛya nnu. Ɛdɛnkɛma afoa nu ɛdeɛ mɔɔ wɔ ɛhye anu la le ɛya nsia abulasuu nee nnu. Nlankɛ apenle ngoko abulasa nee nsia, yɛɛ bɛvale nuhua abulasuu nee nwiɔ bɛmanle Ɛdɛnkɛma; asoaso apenle ngoko abulasa, ɛya nnu, yɛɛ bɛvale nuhua abulasia nee ko bɛmanle Ɛdɛnkɛma; mbɛlɛra mɔɔ ɛtɛnwunle nrenya ɛlɛ la le apenle ngoko bulu nee nsia, yɛɛ bɛvale nuhua abulasa nee nwiɔ bɛmanle Ɛdɛnkɛma. 41Na kɛmɔ Ɛdɛnkɛma zele la, Mosisi vale ninyɛne ɛhye mɔ manle Sɛlɛvolɛ Ɛlieza na ɔvale ɔyɛle azubɔdeɛ ɔmanle Ɛdɛnkɛma.
42-46Yizilayɛma afoa nu ɛdeɛ foa ko ne le kɛ ɛlɔnema ne ɛdeɛ ne ala la, mboane apenle ngoko ɛya nsa abulasa nee nsuu, ɛya nnu, nlankɛ apenle ngoko abulasa nee nsia, asoaso apenle ngoko abulasa, ɛya nnu, yɛɛ menli apenle ngoko bulu nee nsia. 47Na kɛmɔ Ɛdɛnkɛma zele la, Mosisi vale menli abulanlu biala anu ko yɛɛ nyɛmoa abulanlu biala anu ko manle Livaema mɔɔ nea Ɛdɛnkɛma Ndanlɛ Sua ne la.
48Akee safohyenle mgbanyinli mɔɔ nea ɛlɔnema apenle apenle nwo zo, nee safohyenlema mɔɔ nea ɛlɔnema ɛya ɛya nwo zo la hɔle Mosisi anwo ɛkɛ 49na bɛhanle bɛhilele ye kɛ, “Yɛmenle, yɛdia ɛlɔnema mɔɔ yɛnea bɛ nwo zo la, na bɛ nuhua ko bɔbɔ amminli. 50Yemɔti ninyɛne mɔɔ yɛnyianle, ezukoa nvutuke ninyɛne mɔɔ bɛfa bɛsiezie bɛ nwo, bɛ sa ngɛba, funga, mgbɔdelera, asomadeɛ, yɛɛ avikpa, yɛva nuhua mɔɔ le Ɛdɛnkɛma afoa nu ɛdeɛ ne yɛra kɛ azubɔdeɛ, amaa bɛava bɛayɛ mgbɔdalɛ nzɛlɛlɛ bɛamaa yɛ.” 51Mosisi nee Sɛlɛvolɛ Ɛlieza liele ezukoa nvutuke ninyɛne ne; bɛva ɔ muala bɛli adwinli. 52Ezukoa nvutuke ninyɛne mɔɔ ɛlɔnema mgbanyinli ne vale rɛlɛle Ɛdɛnkɛma la anloa to asɛɛ tone nu kilo ɛya nwiɔ. 53Ɛlɔnema ne biala ninyɛne ɛdeɛ mɔɔ ɔnyianle la boka ninyɛne mɔɔ bɛnyianle bɛ bɛ nee bɛ rale la anwo. 54Yemɔti Mosisi nee Sɛlɛvolɛ Ɛlieza liele ɛlɔnema mgbanyima ne mɔ ezukoa nvutuke azubɔdeɛ ne mɔ hɔle Ɛdɛnkɛma Ndanlɛ Sua ne anu, amaa yeava yeahakye Yizilayɛma.
Currently Selected:
Ɛdi 31: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
