Ɛdi 30
30
Ɛwɔkɛbɔlɛ nwo ngyehyɛlɛ
1Mosisi hanle hilele Yizilayɛ mbusua ekpunli ekpunli ne mɔ mgbanyima ne kɛ, “Mɔɔ Ɛdɛnkɛma se bɛyɛ la ɛne. 2#Mat 5.33 Ɔse: Saa nrenya fa debie bɔ Ɛdɛnkɛma ɛwɔkɛ, anzɛɛ ka ndane fa ɔ nwo bɔ ɛwɔkɛ maa Ɛdɛnkɛma a, ɔnle kɛ ɔtu ɔdaye ɔ nloa edwɛkɛ mɔɔ yeha la ɔto, ɔwɔ kɛ ɔdi edwɛkɛ biala mɔɔ vi ɔ nloa anu kɛvinde la azo.
3“Anzɛɛ saa raalɛ ka ndane kɛ ɔyɛ debie yeamaa Ɛdɛnkɛma, anzɛɛ ɔfa ɔ nwo ɔbɔ ɛwɔkɛ ɔmaa Ɛdɛnkɛma, wɔ mekɛ mɔɔ ɔde ɔ ze sua nu la, 4na ɔ ze te nwolɛ bie, na yeanga nwolɛ bie a, ɛnee ɔwɔ kɛ ɔdi ye ndane ne azo. 5Na saa ɔ ze te na yeamkponle zolɛ na kenle ko ne ala ɔda ye ali a, debie biala ɛnkyekye raalɛ ne, yɛɛ ɔnle kɛ ɔdi ye ndane ne anzɛɛ ye ɛwɔkɛbɔlɛ ne azo. Ɛdɛnkɛma bava ye ɛtane ahyɛ ye, ɔboalekɛ ɔ ze amkponle zo.
6“Saa raalɛ mɔɔ bɛtɛgyale ye la dwenle nwolɛ, anzɛɛ yeandwenle nwolɛ na ɔka ndane anzɛɛ ɔbɔ ɛwɔkɛ kɛ ɔtwe ɔ nwo yeavi debie nwo na nzinlii bɛgya ye, na ɔ hu te nwolɛ bie na yeanga nwolɛ edwɛkɛ kenle ko ne ala a, 7ɔwɔ kɛ raalɛ ne di ye ndane ne azo. 8Na saa ɔ hu te nwolɛ bie, na yeamkponle zolɛ a, ɔnle kɛ ɔdi ye ndane ne azo, yɛɛ Ɛdɛnkɛma bava ye ɛtane ahyɛ ye.
9“Ɔwɔ kɛ kunlanvolɛ raalɛ anzɛɛ raalɛ mɔɔ bɛbɔ ye ewole la di ye ndane anzɛɛ ye ɛwɔkɛ mɔɔ ɔkɛbɔ la azo.
10“Saa awuvolɛ raalɛ ka ndane anzɛɛ bɔ ɛwɔkɛ kɛ ɔtwe ɔ nwo yeavi debie nwo a, 11ɔwɔ kɛ ɔdi zolɛ, kyesɛ ɔ hu te na ɔtia zɔhane ndane ne anzɛɛ ɛwɔkɛ ne anu. 12Saa ɔ hu te na ɔto nuhua entia a, ɔnle kɛ ɔdi zolɛ. Ɛdɛnkɛma bava ye ɛtane ahyɛ ye, ɔboalekɛ ɔ hu duale ye kɛ ɔmmaye. 13Ɔ hu lɛ adenle kɛ ɔmaa ɔdi ye ndane ne anzɛɛ ɛwɔkɛ ne azo, anzɛɛ ɔtua ye kɛ ɔmmadi zo. 14Na kenle ko ne mɔɔ ɔ hu kɛde ndane ne anwo bie la, saa yeanga nwolɛ edwɛkɛ a, ɛnee ɔkile kɛ yelie ye ndane ne nee ye ɛwɔkɛ ne yedo nuhua. Ɔwɔ kɛ raalɛ ne di ye ndane ne azo. 15Saa nzinlii ɔ hu to nuhua entia a, nwolɛ munzule ne ka ɔdaye nrenya ne.”
16Mɛla mɔɔ Ɛdɛnkɛma vale manle Mosisi mɔɔ fane nrenya nee ɔ ye, selɛ nee ralɛ raalɛ mɔɔ de ɔ ze sua nu la ndanehanlɛ nwo la ɛne.
Currently Selected:
Ɛdi 30: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
