Ɛdi 32
32
Mbusua ekpunli ekpunli mɔɔ wɔ Dwɔdan aduduleɛ afoa nu
(Mɛla 3.12-22)
1Wulubɛn nee Gaade mbusua ekpunli ne mɔ ɛnee lɛ nlankɛ dɔɔnwo kpalɛ. Mɔɔ bɛnwunle kɛ Gyeezɛ nee Geleade azɛlɛ ne le kpalɛ maa nlankɛ la, 2bɛhɔle Mosisi, Sɛlɛvolɛ Ɛlieza nee mgbanyima ne mɔ ɛkɛ bɛhɔhanle kɛ, 3-4“Maanzinli ɛhye mɔɔ Ɛdɛnkɛma ɛva ɛmaa Yizilayɛma kɛ bɛdɛnla nu, mɔɔ azua ɛhye mɔ: Atalo, Daebɔn, Gyeezɛ, Nemela, Hɛhyebɔn, Ɛlɛyeli, Sebema, Nibo, yɛɛ Biyɔn wɔ nu la le azɛlɛ kpalɛ maa nlankɛ, yɛɛ wɔ sonvolɛma, Wulubɛnema nee Gaadema lɛ nlankɛ. 5Yɛsɛlɛ wɔ, saa yɛ nyunlu ɛra anyia wɔ ɛ nyunlu a, ɛnee fa azɛlɛ ɛhye maa wɔ sonvolɛma ye, maa bɛva bɛyɛ bɛ ti anwo ɛdeɛ, mmamaa yɛpɛ Dwɔdan ne yɛkɔ ɔ nzi lɔ.”
6Na Mosisi hanle hilele Gaade nee Wulubɛn mbusua ekpunli ne mɔ kɛ, “Ɛnee bɛ mediema ne mɔ ɛhɔ konle nloa na bɛmɛ bɛdɛnla ɛke ɔ? 7Duzu ati a bɛkɛmaa Yizilayɛma anwo kɛbubu bɛ kɛ bɛmɛ bɛnrɛhɔ azɛlɛ ne mɔɔ Ɛdɛnkɛma ɛva ɛmaa bɛ la azo ɛ? 8#Ɛdi 13.17-33 Ɛhye yɛɛ bɛ ze mɔ yɛle wɔ Keedɛhye Baanɛya wɔ mekɛ mɔɔ menzoanle bɛ kɛ bɛhɔnlea azɛlɛ ne la a. 9Bɛhɔle toonwo bɛhɔdwule Ɛhyekɔlo Bɔnza na bɛnleanle azɛlɛ ne, na mɔɔ bɛziale bɛrale la, bɛrazɛkyele Yizilayɛma adwenle kɛ bɛmmamaa bɛ gyakɛ ba tia azɛlɛ ne mɔɔ Ɛdɛnkɛma ɛva ɛmaa bɛ la azo. 10#Ɛdi 14.26-35 Na kenle ko ne Ɛdɛnkɛma vale bɛ nwo ɛya na ɔhanle ndane kɛ, 11‘Meka meka kɛ, bɛdabɛ mɔɔ bɛvi Yigyibiti bɛrale la, bɛ nuhua biala mɔɔ ɛli ɛvolɛ abulanwiɔ mɔɔ kɔ la anye ba ɛnrɛnwu azɛlɛ ne mɔɔ menganle ndane kɛ mefa meamaa Ebileham, Ayezeke, yɛɛ Gyekɔbo la azo, ɔboalekɛ bɛanva bɛ nwo amuala bɛammaa me,’ 12kyesɛ Kinɛzenli Gyɛfɛni ara nrenya Kalɛbe nee Nɛn ara Dwɔhyua ala, ɔluakɛ bɛmɛ ala yɛɛ bɛvale bɛ nwo bɛmanle Ɛdɛnkɛma nɔhalɛ nu a. 13Ɛdɛnkɛma vale Yizilayɛma anwo ɛya na ɔmanle bɛlile ahyimango wɔ fienemgbole ne anu toonwo ɛvolɛ abulanla, hɔkpulale kɛ awolɛndoazo zɔhane mɔɔ ɛyɛ ɛtane wɔ Ɛdɛnkɛma anyunlu la wiele wu la. 14Na bɛnlea, bɛva bɛ ze mɔ agyakɛ, ɛtanevolɛma akpolane, kɛ bɛlɛka Ɛdɛnkɛma ɛya kpole bɛamaa yeava Yizilayɛma anwo ɛya a! 15Saa bɛandoa ɔ bo zo na bɛkakyi bɛ nzi bɛsi ye a, eza ɔbakpo bɛ wɔ fienemgbole ye anu, na ɛnee bɛbamaa menli ne amuala adɔ gyebilisanza.”
16Akee bɛbikyele ye na bɛhanle bɛhilele ye kɛ, “Yɛbazi mboane tunli wɔ ɛkɛ yeamaa yɛ mboane ne mɔ, na yeakyekye azuamgbole yeamaa yɛ mra ngyikyi ne mɔ. 17Noko yɛboɔboa yɛ nwo, yɛbadwazo yɛali yɛ mediema Yizilayɛma anyunlu yɛ nee bɛ ahɔ konle ne toonwo kɔkpula kɛ yɛkɛbɔ bɛ atɛnlase wɔ azɛlɛ ne azo la. Ezuavolɛ ne ati yɛ nwo amra ne mɔ badɛnla azuamgbole mɔɔ bɛbɔ nwolɛ bane la azo. 18Yɛnrɛzia yɛnrɛra yɛ sua zo, kyesɛ yɛnwu kɛ Yizilayɛma asa ɛha bɛ azɛlɛ ne mɔ mɔɔ bɛva bɛmaa bɛ la. 19Ɔluakɛ yɛ nee bɛ ɛnrɛhyɛ agyadeɛ wɔ Dwɔdan ne anzi nehane, ɔboalekɛ yɛmɛ, yɛnyia yɛ agyadeɛ ɛdeɛ wɔ Dwɔdan aduduleɛ ɛke.”
20Yemɔti Mosisi hanle hilele bɛ kɛ, “Saa bɛkɛyɛ ɛhye, bɛkɛva konle ninyɛne bɛkɛhɔho konle wɔ Ɛdɛnkɛma anyunlu ɛdeɛ, 21saa ɛlɔnenli biala kɛpɛ Dwɔdan ye kɛhɔho Ɛdɛnkɛma anyunlu toonwo kɔkpula kɛ Ɛdɛnkɛma kɛbɛlɛ ye kpɔvolɛma ne aze 22na ɔkɛva azɛlɛ ne la a, yemɔ ɔwɔ kɛ bɛsia bɛ nzi, ɔboalekɛ bɛwie bɛ gyima ne di bɛmaa Ɛdɛnkɛma nee Yizilayɛma, na azɛlɛ ɛhye bayɛ bɛ agyadeɛ wɔ Ɛdɛnkɛma anyunlu. 23Na saa bɛanyɛ ye zɔhane a, ɛnee bɛnwu ye kɛ bɛyɛ ɛtane bɛtia Ɛdɛnkɛma, yɛɛ bɛnwu ye kɛ bɛ ɛtane ne baye bɛ amaa. 24Bɛkyekye azuamgbole bɛmaa bɛ mra, bɛsisi tunli bɛmaa bɛ mboane, na bɛli ɛwɔkɛ biala mɔɔ bɛbɔ la azo.”
25Na Gaadema nee Wulubɛnema ne mɔ hanle hilele Mosisi kɛ, “Wɔ sonvolɛma bayɛ ye kɛmɔ yɛ menle ɛha la. 26Yɛ mra, yɛ mraalɛ, yɛ mboane, yɛɛ yɛ nlankɛ bawoa Geleade azuamgbole ne mɔ azo. 27Na wɔ sonvolɛma ne mɔ, awie ko biala ɛboɔboa ɔ nwo wɔ konle nu kɛ ɔ nee Ɛdɛnkɛma kɔ konle ne.”
28 #
Dwɔ 1.12-15
Yemɔti Mosisi vale mɛla ɛhye mɔ manle Sɛlɛvolɛ Ɛlieza, Dwɔhyua, yɛɛ Yizilayɛ mbusua ekpunli mgbanyinli ne mɔ kɛ, 29“Saa Gaade nee Wulubɛn menli ne mɔ boɔboa bɛ nwo nee bɛ pɛ Dwɔdan ne, kɔko fa azɛlɛ ne, kɛmɔ Ɛdɛnkɛma ɛha la a, ɛnee bɛva Geleade azɛlɛ ne bɛdɛnla zolɛ. 30Na saa bɛ nee bɛ ampɛ Dwɔdan ne, bɛ nee bɛ angɔngo ɛdeɛ a, ɛnee yemɔ, bɛbanyia bɛ azɛlɛ ɛdeɛ ne wɔ Keena kɛ bɛdabɛ la.”
31Na Gaadema nee Wulubɛnema buale kɛ, “Mɔɔ Ɛdɛnkɛma ɛha ɛhile ye sonvolɛma la, yemɔ ala yɛɛ yɛbayɛ a. 32Yɛbapɛ yɛahɔ Keena azɛlɛ zo yeahɔho, amaa Dwɔdan ye anzi aduduleɛ ɛke afoa nu azɛlɛ ne ayɛ yɛ agyadeɛ.”
33Na Mosisi vale Amɔle Belemgbunli Saehɔn nee Beehyan Belemgbunli Ɔɔgo arelemgbunli maanle ne mɔ, bɛ azuamgbole nee azua mɔɔ zuozua bɛ nee nwolɛ azɛlɛ kɔsɔɔti manle Gaade nee Wulubɛn mbusua ekpunli ne mɔ nee Dwosefi ara Manasɛ abusua ekpunli ne foa ko. 34Gaade abusua ekpunli ne kyekyele azuamgbole Daebɔn, Atalo, Alowɛ, 35Atelo Hyofan, Gyeezɛ, Dwɔgebɛhaa, 36Bɛte Nemela, yɛɛ Bɛte Hɛlan bieko. Bɛle azuamgbole mɔɔ bɛbɔ nwolɛ bane a. Eza bɛyɛle tunli bɛmanle bɛ mboane ne mɔ. 37Wulubɛn abusua ekpunli ne kyekyele azuamgbole Hɛhyebɔn, Ɛlɛyeli, Keleateeyem, 38Nibo, Beeyale Miyɔn (bɛhakyile duma ɛhye), yɛɛ Sebema. Bɛtotonle azuamgbole mɔɔ bɛkyekyele bɛ bieko la aluma fofolɛ.
39Manasɛ ara Meekɛ abusua ekpulike ne honle vale Geleade, bɛdule Amɔlema mɔɔ de ɛkɛ la, na bɛdɛnlanle ɛkɛ. 40Na Mosisi vale Geleade manle Manasɛ ara Meekɛ abusua ekpulike ne na bɛdɛnlanle zo. 41Na Manasɛ ara Gyeeyɛ hɔtetale namunamu bie, ɔvale bɛ na ɔdonle bɛ “Gyeeyɛ Namunamu.” 42Noba ɔdaye ɔtetale bɛ na ɔvale Kinate nee ye namunamu ne mɔ, na ɔvale sua ne ɔdonle ɔdaye Noba ɔ nwo.
Currently Selected:
Ɛdi 32: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
