Ɛdi 29
29
Ɛvolɛ Fofolɛ Ɛvoyia azubɔdeɛ ne mɔ
(Sɛlɛ 23.23-25)
1“Siane nsuu ne, ye kenle ne mɔɔ lumua la azo, ɔwɔ kɛ bɛyia nu bɛyɛ nzɛlɛlɛ, yɛɛ ɔnle kɛ bɛyɛ gyima ɛsesebɛ biala. Kenle zɔhane, ɔwɔ kɛ bɛwu aweɛne ndendenle ne mɔ anu. 2Bɛva ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye la bɛmaa ye. Bɛva ɛnlankɛ nyinli edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu. 3Bɛ ma azubɔdeɛ ne, bɛva esamo kpalɛ mɔɔ bɛva ɔlivi nwole bɛfɔtɔ la kilo nsa bɛzua ɛnlankɛ ne: boane nyinli ne, bɛva esamo kilo nwiɔ, 4yɛɛ boane edonraa ko biala, bɛva esamo kilo ko. 5Eza bɛbɔ menli ne ati bɛva abɔnkye nyinli ko bɛyɛ ɛtane azubɔdeɛ bɛyɛ mgbɔdalɛ nzɛlɛlɛ bɛmaa bɛ. 6Bɛyɛ ɛhye mɔ bɛboka siane ne kenle mɔɔ lumua la ɛyelalɛ azubɔdeɛ ne nee nwolɛ ma azubɔdeɛ ne anwo, nee dahudahu ɛyelalɛ azubɔdeɛ ne, nee ma azubɔdeɛ ne nee nwanye azubɔdeɛ ne anwo, kɛmɔ bɛhyehyɛ la. Ɛyelalɛ azubɔdeɛ ɛhye mɔ evuanlɛ sɔ Ɛdɛnkɛma anye.
Mgbɔdalɛ Kenle azubɔdeɛ ne mɔ
(Sɛlɛ 23.26-32)
7 #
Sɛlɛ 16.29-34
“Siane nsuu ne, ye kenle bulu ne azo, bɛyia nu bɛyɛ nzɛlɛlɛ. Bɛmmadi debie yɛɛ bɛmmayɛ gyima biala. 8Bɛbɔ ɛyelalɛ azu mɔɔ ye evuanlɛ sɔ Ɛdɛnkɛma anye la bɛmaa Ɛdɛnkɛma. Bɛva ɛnlankɛ nyinli edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu. 9Bɛ ma azubɔdeɛ ne, bɛva esamo mɔɔ bɛva ɔlivi nwole bɛfɔtɔ la: ɛnlankɛ nyinli ne, bɛva esamo kilo nsa, boane nyinli ne, bɛva esamo kilo nwiɔ, 10yɛɛ boane edonraa biala, bɛva esamo kilo ko. 11Eza bɛva abɔnkye nyinli ko bɛyɛ ɛtane azubɔdeɛ bɛboka ɛtane azubɔdeɛ ne mɔɔ bɛvale bɛyɛle mgbɔdalɛ nzɛlɛlɛ ne la, nee dahudahu ɛyelalɛ azubɔdeɛ ne mɔ anwo.
Kpɔda Bo Ɛvoyia azubɔdeɛ ne mɔ
(Sɛlɛ 23.33-44)
12“Siane nsuu ne, ye kenle bulu nee nnu ne azo, bɛyia bɛyɛ nzɛlɛlɛ. Bɛli ɛvoyia ɛhye bɛwula Ɛdɛnkɛma anyunlunyia toonwo kenle nsuu, eza bɛmmayɛ gyima ɛsesebɛ biala. 13Kenle ne mɔɔ lumua la bɛva ɛyelalɛ azubɔdeɛ mɔɔ sɔ Ɛdɛnkɛma anye la bɛmaa ye. Bɛva nlankɛ nyinli ndonrandonra bulu nee nsa, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 14Bɛ ma azubɔdeɛ ne, bɛva esamo kpalɛ mɔɔ bɛva ɔlivi nwole bɛfɔtɔ la: saa bɛfa ɛnlankɛ nyinli ko a, bɛva esamo kilo nwiɔ, 15yɛɛ saa bɛfa boane edonraa ko a, bɛva esamo kilo ko nee nwolɛ nwanye azubɔdeɛ mɔɔ sa la. 16Eza bɛva abɔnkye nyinli ko bɛyɛ ɛtane azubɔdeɛ. Bɛyɛ ɛhye mɔ bɛboka dahudahu ɛyelalɛ azubɔdeɛ ne nee ye ma azubɔdeɛ ne nee ye nwanye azubɔdeɛ ne mɔ anwo.
17“Ye kenle nwiɔ ne azo, bɛva nlankɛ nyinli ndonrandonra bulu nee nwiɔ, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 18-19Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.
20“Ye kenle nsa ne azo bɛva nlankɛ nyinli ndonrandonra bulu nee ko, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 21-22Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.
23“Ye kenle nna ne azo bɛva nlankɛ nyinli ndonrandonra bulu, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 24-25Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.
26“Ye kenle nnu ne azo bɛva nlankɛ nyinli ndonrandonra ngɔnla, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 27-28Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.
29“Ye kenle nsia ne azo bɛva nlankɛ nyinli ndonrandonra mɔtwɛ, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 30-31Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.
32“Ye kenle nsuu ne azo bɛva nlankɛ nyinli ndonrandonra nsuu, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna. 33-34Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.
35“Ye kenle mɔtwɛ ne azo bɛyia nu na bɛyɛ nzɛlɛlɛ, eza bɛmmayɛ gyima ɛsesebɛ biala. 36Bɛva ɛnlankɛ edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu bɛyɛ ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye la bɛmaa ye. 37-38Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.
39“Saa ɛvoyialilɛ ne mɔ dwu zo a, bɛva bɛ azubɔdeɛ ɛhye mɔ bɛboka bɛ ɛwɔkɛyelɛ, ahunlunyele, ɛyelalɛ, ma nee nwanye, yɛɛ anzonudwolɛ azubɔdeɛ ne mɔ bɛmaa Ɛdɛnkɛma.”
40Yemɔti Mosisi hanle edwɛkɛ biala mɔɔ Ɛdɛnkɛma hanle hilele ye la hilele Yizilayɛma ne.
Currently Selected:
Ɛdi 29: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
