Ɛdi 12
12
Bɛhwe Meleam anzo
1Ɛnee Mosisi ɛgya Kɛhye raalɛ, na Meleam nee Aalɔn dendɛle tiale ye wɔ nwolɛ. 2Bɛhanle kɛ, “Na Mosisi angomekye ala a Ɛdɛnkɛma ɛlua ɔ nwo zo ɛdendɛ a? Na ɔtɛduale yɛdayɛ noko yɛ nwo zo ɔtɛtendɛle ɔ?” Na Ɛdɛnkɛma dele mɔɔ bɛhanle la. 3(Nɔhalɛ nu, Mosisi le bɛlɛvolɛ. Ɔle bɛlɛvolɛ ɔtɛla dasanli biala mɔɔ wɔ aleɛabo la.)
4Arɛlevilɛ nu, Ɛdɛnkɛma zele Mosisi, Aalɔn nee Meleam kɛ, “Mekpondɛ bɛdabɛ menli nsa ye wɔ Ɛdɛnkɛma Ndanlɛ Sua ne anu.” Na bɛmɛ nsa ne bɛhɔle. 5Na Ɛdɛnkɛma luale amungu mpila nu dwule aze. Ɔragyinlanle Ndanlɛ Sua ne anlenkɛ ne anloa na ɔvɛlɛle Aalɔn nee Meleam kɛ bɛ mu nwiɔ bɛrɛla bɛ nyunlu. 6Na Ɛdɛnkɛma zele bɛ kɛ, “Bɛdie mɔɔ meka la! Saa Nyamenle kpɔmanvolɛ ba bɛ avinli a, medame Ɛdɛnkɛma a meye me nwo mekile ye wɔ ɛnyelɛzodeɛnwunlɛ nu, na metendɛ mekile ye wɔ ɛlalɛ nu a. 7#Hib 3.2 Na me sonvolɛ Mosisi ɛdeɛ, asolo ye, meva ye mezie me menli Yizilayɛma kɔsɔɔti anloa. 8Yemɔti meye me nwo ali me nee ye yɛ mu nwiɔ yɛtendɛ bɔkɔɔ mɔɔ mendo ye agyiba biala a. Yenwu medame Ɛdɛnkɛma me sɔhovolɛ bɔbɔ. Duzu ati bɔbɔ yɛɛ ɔwɔ kɛ bɛtendɛ bɛtia me sonvolɛ Mosisi a?”
9Ɛdɛnkɛma vale bɛ nwo ɛya na ɔgyakyile bɛ ɔhɔle. 10Na mɔɔ amungu ne hwenle ɔ nwo vile Ndanlɛ Sua ne anu la, ɛnee nwonane nu ewule ɛzulolɛ bie#12.10 Nwonane nu ewule ɛzulolɛ bie: anzɛɛ kokobɛ nzabenle. ɛdila Meleam ɛmaa ɔ nwo ɛyɛ nwohyee kɛ ezukɔtweaba. Aalɔn dole ɔ nye nleanle Meleam, na ɔnwunle kɛ nwonane nu ewule ɛzulolɛ bie ɛdila ye. 11Na ɔhanle ɔhilele Mosisi kɛ, “O me menle, yɛli ngoaseasɛm, yɛyɛ ɛtane bɔbɔ ɛdeɛ, noko mmamaa yɛnwu amaneɛ ɛhye. 12Mmamaa Meleam yɛ kɛ sonla mɔɔ bɛkawo ye la ɛnee yewu bɛ kunlu na ye foa ko ɛnrinzi ɛhɔ la.”
13Na Mosisi zunle vɛlɛle Ɛdɛnkɛma kɛ, “O Nyamenle, mebodo wɔ, yɛ ye ayile.”
14Na Ɛdɛnkɛma zele Mosisi kɛ, “Saa ɔ ze a dole nyɛlɛ ɔ nyunlu a, anrɛɛ ye anyiemgba ɛnrɛdoa ye toonwo kenle nsuu ɔ? Bɛye ye azokoɛleɛ ɛkɛ bɛmaa ɔdɛnla kandiba nehane kenle nsuu; kenle nsuu ne dwu a, bɛmaa ɔrɛla azokoɛleɛ ne bieko.” 15Yemɔti bɛyele Meleam bɛhɔle azokoɛleɛ ne kandiba na ɔlale lɔ toonwo kenle nsuu. Na menli ne andu bɛ bo toonwo bɛvale Meleam bɛrale azokoɛleɛ ɛkɛ ne bieko. 16Nzinlii bɛdule bɛ bo bɛvile Hazilo na bɛhɔyɛle azokoɛleɛ wɔ Pɛlan fienemgbole ne anu.
Currently Selected:
Ɛdi 12: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
