Ɛdi 11
11
Ɛleka ne mɔɔ bɛdonle ye Tabɛla la
1Menli ne dendɛle Ɛdɛnkɛma bɛ nzo abo wɔ nyane mɔɔ ɔlɛkile bɛ la anwo. Ɛdɛnkɛma dele na ɔvale ɛya kpole ɔmanle senle radɔle bɛ avinli yelale azokoɛleɛ ne foa ko. 2Menli ne zunle vɛlɛle Mosisi; Mosisi zɛlɛle Ɛdɛnkɛma na senle ne guale aze. 3Yemɔti bɛvɛlɛle ɛleka zɔhane Tabɛla, ɔboalekɛ ɛkɛ ne yɛɛ Ɛdɛnkɛma senle ne zɔle bɛ avinli a.
Mosisi ye mgbanyima abulasuu
4Ɛnee nyɛvolɛ bie nee Yizilayɛma a ɛlɛtu adenle ne a. Bɛ ti akunlu rale nane ɛlilɛ zo kpole kpalɛ. Yizilayɛma bɔbɔ dendɛle bɛ nzo abo hanle kɛ, “Saa yɛnyia nane yɛali a anrɛɛ ɔle kpalɛ. 5Mɔɔ yɛwɔ Yigyibiti la, yɛlile fɛlɛ biala mɔɔ yɛdayɛ yɛkulo la, yɛɛ yɛandua ɛhwee. Yɛkakye bɔna ndɔlɔra, anamuna, alɛta anweɛ, ‘Liiki’, anweɛ mralɛ nee anweɛ mgbole mɔɔ yɛlile la. 6Na kɛkala, yɛ anwosesebɛ muala ɛwie, yɛnli debie gyɛne biala kɛ mana ko ye ala!”
7 #
Ade 16.31
(Mana le ma ekyi bie, ɔ nwo le kɛ akɔlɛnlome woyaa. 8-9#Ade 16.13-15 Nɔɔzo mɔɔ ɛbɔlɛ ne ɛlɛtɔ la ɛnee bɛdabɛ noko bɛlɛtɔ. Aleɛ kye a menli ne mɔ kɔsesa, bɛti anzɛɛ bɛsi ye duba nu, bɛbɔ ye ndɛlamoa na bɛto ye siase nu. Ye fɛlɛko le kɛ kpanwo mɔɔ bɛva ɔlivi nwole bɛfete na bɛdo la.)
10Mɔɔ menli ne gyinlegyinlanle ekpunli ekpunli wɔ bɛ ndanlɛ azua ne nlenkɛ ne mɔ anloa na bɛlɛsu la, Mosisi dele, na ye ahonle futule, ɔboalekɛ Ɛdɛnkɛma vale bɛ nwo ɛya kpole. 11Mosisi hanle hilele Ɛdɛnkɛma kɛ, “Duzu ati a ɛ nee me ɛli ye zɛhae a? Duzu ati a wɔannwu me anwunvɔne na wɔva menli ɛhye mɔ kɔsɔɔti anwo adesoa wɔzoa me a? 12Na mame a menrenzɛle menli ɛhye mɔ a? Na mame a menwole bɛ na wɔaze me kɛ menvia bɛ kɛ baviavolɛ fia adɔma la, menva bɛ mengɔ azɛlɛ ne mɔɔ ɛvale ɛbɔle bɛ ze mɔ ɛwɔkɛ la azo a? 13Nienwu yɛɛ mekanyia nane meamaa menli ɛhye mɔ a? Ɔluakɛ bɛsu bɛka bɛkile me kɛ memaa bɛ nane bɛli. 14Me ngomekye menrɛhola menli ɛhye mɔ kɔsɔɔti sonle, adesoa ne bo me nwo zo. 15Saa zɛhae ala a ɛkɛyɛ me a, ɛnee maa menzɔ ɛ nye na pɛ me zo ndɛndɛ, amaa meannwu me nyunlu.”
16Na Ɛdɛnkɛma zele Mosisi kɛ, “Nea Yizilayɛma anu ye menli abulasuu mɔɔ menli ne di bɛ eni na bɛdie bɛ bɛto nu kɛ bɛle bɛ mgbanyima la, fa bɛ bɛla Ndanlɛ Sua ye anu na maa bɛgyinla ɛ nwo ɛkɛ. 17Mebadwu aze me nee bɛ aradendɛ ɛkɛ. Mebadu sunsum ne mɔɔ meva memaa wɔ la bie meawula bɛ, amaa bɛahola bɛaboa wɔ na bɛazoa menli ne adesoa ne bie. Ɔnle kɛ ɛ ngomekye ɛsoa ɔ muala. 18Ka kile menli ne kɛ bɛmaa bɛ nwo ɛde na ɛhyema bɛbanyia nane bɛali. Ɛdɛnkɛma ɛde bɛ ɛzunlɛ ne mɔɔ bɛlɛsu bɛaha kɛ, ‘Nwane bɔbɔ a kɛmaa yɛ nane yɛkɛli a? Ɔluakɛ yɛwɔ Yigyibiti la ɛnee yɛde boɛ’ la. Yemɔti Ɛdɛnkɛma bamaa bɛ nane yeamaa bɛali. 19Bɛnrɛli ye kenle kokye, anzɛɛ kenle nwiɔ, anzɛɛ kenle nnu, anzɛɛ kenle bulu, anzɛɛ kenle abulanwiɔ, 20na bɛbali toonwo siane mumua ko, toonwo yeavindevinde bɛ bonyi nu, mɔɔ nzinlii bɛnwu ye bɔbɔ a ɛnee ɔyɛ ayahanlɛ a. Ɛhye bazi, ɔboalekɛ bɛkpo medame, Ɛdɛnkɛma mɔɔ mede bɛ avinli la, na bɛzu bɛha kɛ, ‘Duzu ati bɔbɔ yɛɛ yɛvile Yigyibiti a?’ ”
21Na Mosisi hanle kɛ, “Menli mɔɔ megyi bɛ nloa la le menli apenle ngoko ɛya nsia. Ɛse ɛbamaa bɛ nane bɛali toonwo siane mumua ko! 22Asoo bɛkɛnyia bɛ nwo nlankɛ nee mboane mɔɔ kɛza bɛ la, anzɛɛ saa bɛboɔboa nyevile nu fɛlɛ kɔsɔɔti anloa a ɔkɛza bɛ ɔ?”
23Na Ɛdɛnkɛma zele Mosisi kɛ, “Ɛnee ɛnea a Ɛdɛnkɛma asa ɛyɛ sinli ɔ? Ɛdɛnkɛma tumi ne anloa ɛha aze ɔ? Saa edwɛkɛ mɔɔ melɛka la kɛyɛ nɔhalɛ anzɛɛ ɔnrɛyɛ nɔhalɛ a, ɛbanwu ye.”
24Yemɔti Mosisi vindele hɔhanle edwɛkɛ mɔɔ Ɛdɛnkɛma ɛha la hilele menli ne. Ɔboɔboale menli ne anu mgbanyima abulasuu anloa na ɔtotole bɛ wɔ Ndanlɛ Sua ne anwo. 25Akee Ɛdɛnkɛma luale amungu ne anu dwule aze na ɔdendɛle ɔhilele Mosisi. Ɔdule sunsum ne mɔɔ yeva yemaa ye la bie ɔwulale mgbanyima abulasuu ne nu. Mɔɔ sunsum ne dwule bɛ nwo zo la, bɛbɔle ɔ bo kɛ bɛtendɛ kɛ Nyamenle kpɔmanvolɛma la, noko yeangyɛ.
26Ɛnee mgbanyima abulasuu ne anu nwiɔ, Ɛledade nee Midade wɔ azokoɛleɛ ɛkɛ. Bɛmɛ, bɛangɔ Ɛdɛnkɛma Ndanlɛ Sua ne anu bie, noko sunsum ne dwule bɛ nwo zo wɔ azokoɛleɛ ɛkɛ ne manle bɛdabɛ bɛhanle Nyamenle nrɛlaleɛ. 27Kpavolɛ bie nriandile rahanle hilele Mosisi kɛ, “Ɛledade nee Midade ɛlɛka Nyamenle nrɛlaleɛ wɔ azokoɛleɛ lɔ.”
28Nɛn ara nrenya Dwɔhyua mɔɔ le Mosisi sonvolɛ na ɔle ye menli ne mɔɔ yekpa nu yeye bɛ la anu ko la hanle kɛ, “Me menle Mosisi, tua bɛ kpunli!”
29Na Mosisi bizale ye kɛ, “Ɛtwe me ti nungule ɔ? Me kunlu a anrɛɛ Ɛdɛnkɛma ɛva ye Sunsum ne ɛwula ye menli ne nu yemaa bɛ kɔsɔɔti bɛyɛ Nyamenle kpɔmanvolɛma!” 30Akee Mosisi nee Yizilayɛ mgbanyima ne mɔ ziale hɔle azokoɛleɛ lɔ.
Ɛdɛnkɛma maa nloma kyelɛwele ara
31Ɛdɛnkɛma manle anwoma bie dule na ɔ nee nloma kyelɛwele pinopino bie vi nyevile nu radule guale azokoɛleɛ ɛkɛ. Bɛ somaa ne anwumahɔlɛ le kɛyɛ mita ko. Bɛdule bɛguale azokoɛleɛ ɛkɛ ne ɛleka biala bɛbɛnrale bɛyiale. (Ɛkɛdo ɛ nye la ɛnee bɛyɛ pinopino wɔ azɛlɛ ne anwo). Kyelɛwele de kyelɛwele zo na bɛdoa zo pinopino toonwo mita kɛyɛ nyɛ. 32Yemɔti kenle ko ne, ye nɔe ne nee ye alehyenlɛ nu kɔsɔɔti, kyelɛwele ne mɔ ala a menli ne hyele a. Awie mɔɔ angye bie fee la hyele tone nu kilo apenle, na bɛrɛlɛle bɛ wɔ azokoɛleɛ ne anzi kɔsɔɔti. 33Mɔɔ nane ne akee bule bɛ nwo zo la, Ɛdɛnkɛma vale bɛ nwo ɛya na ɔdeanle bɛ, ɔmanle ewule nzane dɔle bɛ avinli hunle bɛ. 34Yemɔti bɛvɛlɛle ɛleka zɔhane “Kebulo Hateeyava” (ɔ bo a le “Aleɛkpole Azie”), ɔboalekɛ ɛkɛ ne yɛɛ bɛziele menli mɔɔ yɛle nanelilɛ nwo aleɛkpole la.
35Menli ne vi Kebulo Hateeyava la, bɛhɔle Hazilo na bɛyɛle azokoɛleɛ ɛkɛ.
Currently Selected:
Ɛdi 11: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
