Ɛdi 13
13
Busiama ne
(Mɛla 1.19-33)
1Ɛdɛnkɛma zele Mosisi kɛ, 2“Ye Yizilayɛ mbusua ekpunli bulu nee nwiɔ ne anu ko biala abusua kpanyinli ko soa bɛ maa bɛhɔli busia bɛkpɔla Keena azɛlɛ ne mɔɔ mefa meamaa bɛ la.” 3-15Mosisi lile Ɛdɛnkɛma edwɛkɛ zo na ɔzoanle mbusua mgbanyinli ɛhye mɔ ɔmanle bɛvi Pɛlan fienemgbole ne anu bɛhɔle:
| Abusua Ekpunli | Abusua Kpanyinli |
|---|---|
| Wulubɛn | Zakɛ ara nrenya Hyama |
| Semɛyɔn | Hɔlae ara nrenya Hyeefate |
| Dwuda | Gyɛfɛni ara nrenya Kalɛbe |
| Yesakaa | Dwosefi ara nrenya Ayegale |
| Yifelaem | Nɛn ara nrenya Hohyia |
| Bɛngyaman | Rilefu ara nrenya Paletae |
| Zɛbulɛn | Sodae ara nrenya Gadeɛle |
| Manasɛ | Susae ara nrenya Gadae |
| Dan | Gɛmalae ara nrenya Ameɛle |
| Ahya | Maekeɛle ara nrenya Sitɛ |
| Nafetalae | Vɔfosae ara nrenya Naabae |
| Gaade | Makae ara nrenya Giyuyɛle |
16Menli mɔɔ Mosisi zoanle bɛ kɛ bɛhɔkpɔla azɛlɛ ne la ɛne. Na ɔkpale Nɛn ara nrenya Hohyia duma ne na ɔdonle ye Dwɔhyua.
17Mɔɔ Mosisi soa bɛ la, ɔzele bɛ kɛ, “Bɛhɔ sɔlɔ afoa nu wɔ Keena azɛlɛ ne nyiakɛ, na bɛhɔ azua mɔɔ gua awoka ne mɔ azo la azo. 18Bɛhɔnlea kɛ maanle ne si de la, saa menli mɔɔ wɔ zolɛ la anwo yɛ se anzɛɛ bɛ nwo ɛnyɛ se, saa bɛ nwo zonle anzɛɛ bɛ nwo anzo; 19bɛnlea kɛ azɛlɛ ne le kpalɛ anzɛɛ ɔnle kpalɛ, yɛɛ saa menli ne dede azokoɛleɛ anzɛɛ azuamgbole mɔɔ bɛbɔ nwolɛ bane la azo; 20bɛnlea saa azɛlɛ ne kye aleɛ anzɛɛ ɔngye aleɛ, yɛɛ eza saa mbaka wɔ zolɛ anzɛɛ mbaka ɛnle zolɛ a. Bɛzi ahonle na bɛva nehane ma ngakyile ne mɔ bie bɛrɛla.” (Mekɛ ne le mekɛ mɔɔ ɛnee bɔ zo mɔɔ vanye ma ɛbɔ ɔ bo kɛ bɛbolo a.)
21Yemɔti busiama ne bɔle ɔ bo wɔ Zen fienemgbole nu bɛhɔkpɔlale azɛlɛ ne toonwo bɛhɔdwule Rilihɔbo mɔɔ zua Heemate Ademgbolezo wɔ sɔlɔ afoa nu la. 22Bɛhɔle azɛlɛ ne nyiakɛ na bɛhɔle Hibulɔn, ɛleka mɔɔ ɛnee menli kakanyinlima bie mɔɔ bɛfɛlɛ bɛ Anakema la abo zo amra, Ahaeman, Hyihyae, yɛɛ Talimae de la. (Bɛkyekyele Hibulɔn ɔlile ɛvolɛ nsuu kolaa na bɛakyekye Zowan mɔɔ wɔ Yigyibiti la.) 23Bɛrale Ɛhyekɔlo Bɔnza, na ɛkɛ ne, bɛpɛle vanye baka ɛhane ko mɔɔ ma siakɛ ko pɛ a wɔ zolɛ la. Ye ɛnlomboɛ ti, menli nwiɔ a gyɛnvale na bɛahola ye soa a. Eza bɛ nee ma bie mɔɔ le kɛ akutue la, yɛɛ feege ma rale. 24(Bɛvɛlɛle ɛkɛ ne Ɛhyekɔlo Bɔnza, ɔboalekɛ ɛkɛ ne a Yizilayɛma pɛle vanye ma siakɛ ne a.)
25Busiama ne kpɔlale azɛlɛ ne toonwo kenle abulanla na bɛziale. 26Bɛrale Mosisi, Aalɔn nee Yizilayɛma anwo ɛkɛ wɔ Keedɛhye mɔɔ wɔ Pɛlan fienemgbole nu la. Bɛhanle mɔɔ bɛnwunle ye la bɛhilele bɛ, na bɛvale azɛlɛ ne azo ma mɔɔ bɛ nee bɛ rale la bɛhilele bɛ. 27Na bɛhanle bɛhilele Mosisi kɛ, “Yɛhɔle azɛlɛ ne mɔɔ ɛzoanle yɛ zo la azo. Azɛlɛ ne kye aleɛ yɛɛ ninyɛne kpalɛ wɔ zolɛ; ma mɔɔ wɔ zolɛ la bie mɔ ɛ; azɛlɛ ne kye aleɛ bɔkɔɔ. 28Noko menli mɔɔ wɔ zolɛ la anwo yɛ se, yɛɛ bɛbɔ bɛ azuamgbole ne mɔ anwo bane kpalɛ. Mɔɔ yɛ ɛzulolɛ kpole kpalɛ la a le kɛ, yɛnwunle kakanyinlima bie mɔɔ le Anake abo zo amra la wɔ ɛkɛ. 29Amalɛkema de azɛlɛ ne nyiakɛ afoa nu. Hɛtema, Gyibɛsema nee Amɔlema dede azua mɔɔ gua awoka ne mɔ azo la azo; yɛɛ Keenama dede Mɛdetɛlenia Nyevile ne nee Azule Dwɔdan ne anloa.”
30Kalɛbe bɔle agoo manle menli mɔɔ wɔ Mosisi anwo ɛkɛ la yɛle ngungoonwu na ɔhanle kɛ, “Bɛmaa ɔyɛ ndɛ yɛhɔho yɛva azɛlɛ ne yɛdɛnla zo. Yɛ nwo yɛ se, yɛkola yɛdi bɛ nwo zo konim.”
31Na menli mɔɔ nee Kalɛbe hɔle la hanle kɛ, “Kyɛkyɛ o, yɛnlɛ anwosesebɛ mɔɔ yɛfa yɛkɔteta bɛ a; menli ne anwo yɛ se tɛla yɛ.” 32Yemɔti bɛbɔle azɛlɛ ne mɔɔ bɛhɔkpɔlale la anwo nzekue bɛhilele Yizilayɛma. Bɛhanle kɛ, “Azɛlɛ ne ɛnle azɛlɛ kpaziwɔkɛ biala mɔɔ menli mɔɔ de zolɛ la nyia aleɛ di a. Awie biala mɔɔ yɛnwunle ye la le anyinlima. 33#Mɔl 6.4 Eza yɛnwunle menli ndendenle mbelane bie mɔɔ le Anake abo zo amra mɔɔ vi Nɛfelem anu la wɔ ɛkɛ. Yɛgyi bɛ nyunlu a yɛle kɛ ngɛkɛba bie, yɛɛ bɛdabɛ noko bɛnea yɛ a ɛnee yɛle ngɛkɛba bie wɔ bɛ nye zo.”
Currently Selected:
Ɛdi 13: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
