Ɛdi 10
10
Dwɛtɛ fufule aweɛne ndendenle ne mɔ
1Ɛdɛnkɛma zele Mosisi kɛ, 2“Fa dwɛtɛ fufule mɔɔ bɛva hamenle bɛbolo la yɛ aweɛne ndendenle nwiɔ na wɔava wɔavɛlɛ menli ne wɔamaa bɛarayia, na eza wɔava wɔamaa bɛadudu zo bɛavi azokoɛleɛ ne. 3Saa bɛwu aweɛne ndendenle ne amu nwiɔ anu a, ɛnee ɔwɔ kɛ menli ne kɔsɔɔti bayia ɛ nwo ɛkɛ wɔ Ɛdɛnkɛma Ndanlɛ Sua ne anlenkɛ ne anloa. 4Na saa bɛwu aweɛne tendenle kokye anu a, ɛnee ɔwɔ kɛ Yizilayɛ mbusua mgbanyinli ala a bayia ɛ nwo ɛkɛ a. 5Saa bɛwu aweɛne ndendenle ne mɔ anu nzinrenzinra a, ɛnee ɔwɔ kɛ mbusua ekpunli ekpunli mɔɔ wɔ aduduleɛ afoa nu la tudu zo. 6Saa bɛwu aweɛne ndendenle ne mɔ anu nzinrenzinra mɔɔ tɔ zolɛ nwiɔ la a, ɛnee ɔwɔ kɛ mbusua ekpunli ekpunli mɔɔ wɔ nyiakɛ afoa nu la tudu zo. Yemɔti bɛwu aweɛne ndendenle ne mɔ anu nzinrenzinra bɛva bɛmaa menli ne ɛdudu zo. 7Na saa bɛfɛlɛ menli ne mɔ kɔsɔɔti bɛamaa bɛarayia a, bɛwu aweɛne ndendenle ne mɔ anu bɛmaa ɔhyɛ. 8Ɔwɔ kɛ Aalɔn amra mrenya sɛlɛvolɛma ne a wu aweɛne ndendenle ne mɔ anu a.
“Melɛ tendenle mɔɔ bara la kɔsɔɔti, ɔwɔ kɛ bɛdi ngyehyɛlɛ ɛhye azo. 9Saa bɛ nee bɛ kpɔvolɛma mɔɔ ɛlɛsisi bɛ wɔ bɛ azɛlɛ ne azo la kaho a, bɛwu aweɛne ndendenle ne mɔ anu nzinrenzinra bɛhile kɛ konle ɛzi. Na medame, Ɛdɛnkɛma bɛ Nyamenle ne, mebaboa bɛ na mealie bɛ meavi bɛ kpɔvolɛma asa anu. 10Wɔ fɛlɛkolilɛ nu noko, Siane Fofolɛ Ɛvoyia ne mɔ nee ɛvoyia ngakyile ne mɔ ɛlilɛ nu, bɛwu aweɛne ndendenle ne mɔ anu bɛgua ɛyelalɛ azubɔdeɛ ne mɔ azo, nee bɛ anzonudwolɛ azubɔdeɛ ne mɔ azo, na mebaboa bɛ. Medame a mele Ɛdɛnkɛma bɛ Nyamenle ne a.”
Yizilayɛma fi azokoɛleɛ ɛkɛ ne
11Mɔɔ Yizilayɛma vile Yigyibiti la, ye ɛvolɛ nwiɔ ne anu, siane ne mɔɔ tɔ zolɛ nwiɔ la kenle abulanwiɔ ne azo, amungu ne mɔɔ zinze Ɛdɛnkɛma Ndanlɛ Sua ne azo la hwenle ɔ nwo vile zolɛ, 12na Yizilayɛma vi Saenae Fienemgbole nu dule bɛ bo zɔle bɛ adendulɛ ne azo, bɛkpɔsale toonwo ɔhɔdwule kɛ amungu ne hɔdole sɛkɛ wɔ fienemgbole ne mɔɔ wɔ Pɛlan la anu.
13Ɛhye a le mekɛ mɔɔ lumua mɔɔ Ɛdɛnkɛma luale Mosisi anwo zo manle Yizilayɛma dule bɛ bo a. 14Mekɛ biala mɔɔ bɛlɛtu bɛ bo la, bɛkɔ ye kɛmɔ bɛhyehyɛle ye dɛba ne ala la. Bɛkɔ ye ekpunli ekpunli. Bɛdabɛ mɔɔ bɛwɔ Dwuda abusua ekpunli ne anu la a dumua a. Amenadabe ara nrenya Nahyɔn a li bɛ ti a. 15Zuwaa ara nrenya Nɛtanili a li Yesakaa abusua ekpunli ne ati a, 16yɛɛ Hilɔn ara nrenya Yilayabe a li Zɛbulɛn abusua ekpunli ne ati a.
17Saa bɛtudu Ndanlɛ Sua ne bɛwie a, Gɛhyɔn nee Mɛlɛlae mbusua ekpulike ne mɔ mɔɔ soa la akee tɔ adenle zo.
18Bɛdabɛ mɔɔ bɛtoa bɛ la a le Wulubɛn abusua ekpunli ne anu amra. Hyɛdiyɛ ara nrenya Ɛlaezɛ a li bɛ ti a. 19Zulehyadae ara nrenya Hyɛlɛmeɛle a li Semɛyɔn abusua ekpunli ne ati a, 20yɛɛ Duwɛle ara nrenya Yilayasafe a li Gaade abusua ekpunli ne ati a.
21Akee Kohate abusua ekpulike ne mɔɔ soa ninyɛne nwuanzanwuanza ne mɔ la toa bɛ. Saa bɛdwu azokoɛleɛ fofolɛ a, ɔwɔ kɛ bɛkyehyɛ Ɛdɛnkɛma Ndanlɛ Sua ne bɛwie kolaa na Livaema mɔɔ zo ninyɛne nwuanzanwuanza ne mɔ la adwu ɛkɛ.
22Menli mɔɔ wɔ Yifelaem abusua ekpunli ne anu la toa zolɛ. Amehɛde ara nrenya Yilaehyama a li bɛ ti a. 23Pɛdaazɛ ara nrenya Gameeleɛle a li Manasɛ abusua ekpunli ne ati a, 24yɛɛ Gedɛyonae ara nrenya Abaedan a li Bɛngyaman abusua ekpunli ne ati a.
25Na akee Dan abusua ekpunli ne mɔɔ Amehyadae ara nrenya Ehayizɛ li bɛ ti, 26Ahya abusua ekpunli ne mɔɔ Ɔkelan ara nrenya Peegeɛle li bɛ ti, yɛɛ 27Nafetalae abusua ekpunli ne mɔɔ Yinam ara nrenya Ahaela li bɛ ti la a li bɛ kɔsɔɔti bɛ nzi a. 28Mekɛ biala mɔɔ Yizilayɛma vi azokoɛleɛ ko kɛdu bɛ bo kɛ bɛkɔ la, kɛ bɛzile bɛdoɔdoale zolɛ la ɛne.
29Mosisi hanle hilele ɔ ye adiema nrenya Hobabe, mɔɔ le Medeanenli Gyɛtelo ara nrenya ne kɛ, “Yɛlɛkɔ ɛleka ne mɔɔ Ɛdɛnkɛma hanle kɛ ɔbava yeamaa yɛ la; maa yɛhɔ, ɔluakɛ Ɛdɛnkɛma ɛbɔ ɛwɔkɛ kɛ ɔbamaa Yizilayɛma akpazi wɔ ɛbɛlabɔlɛ nu.”
30Hobabe buale ye kɛ “Kyɛkyɛ, menrɛhɔ, mesia meahɔ me maanle nu, meahɔ me mbusua avinli.”
31Mosisi hanle kɛ, “Mesɛlɛ wɔ, mmagyakyi yɛ adevinli, ɔluakɛ wɔmɔ yɛɛ ɛze ɛleka mɔɔ ɔwɔ kɛ yɛkyekye azokoɛleɛ wɔ fienemgbole ne anu a, na wɔayɛ yɛ nye. 32Saa ɛmaa yɛkɔ a, boɛ biala mɔɔ Ɛdɛnkɛma kɛyɛ kɛmaa yɛ la, zɔhane ala yɛɛ yɛdayɛ noko yɛbayɛ yɛamaa wɔ a.”
Menli ne gua adenle zo
33Mɔɔ menli ne vile boka nwuanzanwuanza Saenae la, bɛdiale kenle nsa adenle. Ɛdɛnkɛma Ngyekyeleɛ Ɛlɛka ne lumuale bɛ nyunlu kenle nsa kɛ ɔkakpondɛ ɛleka mɔɔ bɛbadɛnla la yeamaa bɛ. 34Saa bɛvi azokoɛleɛ ko bɛtu bɛ bo a, Ɛdɛnkɛma amungu ne keda bɛ nwo zo alehyenlɛ nu.
35 #
Edw 68.1
Mekɛ biala mɔɔ Ngyekyeleɛ Ɛlɛka ne kɛdu ɔ bo la, Mosisi ka kɛ, “O Ɛdɛnkɛma, dwazo bɔ wɔ kpɔvolɛma asande, na maa menli mɔɔ kyi wɔ la ɛgua ɛbɔ nu.” 36Mekɛ biala noko mɔɔ amungu ne kɛgyinla la, ɔka kɛ, “O Ɛdɛnkɛma, sia bɛla Yizilayɛma mgbe mgbe ne mɔ avinli.”
Currently Selected:
Ɛdi 10: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
