Mat 14
14
Dwɔn Sɔnevolɛ ne ewule
(Mak 6.14-29; Luk 9.7-9)
1Mekɛ ne anu ala Hɛlɔdo mɔɔ ɛnee le amɛnlado mɔɔ sie Galeli maanle ne la dele Gyisɛse nganeɛ, 2na ɔzele ye sonvolɛma ne kɛ, “Dwɔn Sɔnevolɛ ne ala a ɛzia ɛra ngoane nu bieko la, yemɔti a ɔlɛdi tumi gyima mgbole ɛhye mɔ a.”
3 #
Luk 3.19-20
Na yemɔ a le kɛ, Hɛlɔdo manle bɛhyele Dwɔn, bɛguale ye nwɔnzɔnwɔnzɔ na bɛdole ye efiade. Ɔ diema Felepe aye Hɛlɔdease ati a ɔyɛle ɛhye a, 4#Sɛlɛ 20.21 ɔluakɛ Dwɔn hanle hilele ye fane dɔɔnwo kɛ, “Ɔnle amaamuo kpalɛ kɛ ɛkɛgya Hɛlɔdease.” 5Yemɔti Hɛlɔdo dwenlenle nwo kɛ ɔku Dwɔn, noko ɛnee ɔsulo Dwuuma ne, ɔluakɛ ɛnee bɛva Dwɔn kɛ ɔle Nyamenle kpɔmanvolɛ.
6Kenle ko Hɛlɔdo awolɛ kenle dwule na ɔdi ye ɛvoyia la, Hɛlɔdease ara raalɛ ne razile agole lieliele menli ne anye. Hɛlɔdo anye liele ye agolezilɛ ne anwo kpole, 7na ɔhanle ndane ɔbɔle ye ɛwɔkɛ kɛ debie biala mɔɔ ɔkɛbiza la ɔkɛva ɔkɛmaa ye.
8Kakula raalɛ ne hɔbizale ɔ nli Hɛlɔdease adwenle la, ɔzele ye kɛ ɔbiza ɔlie Dwɔn Sɔnevolɛ ne ati. Na kakula ne hɔhanle hilele Hɛlɔdo kɛ, “Medie Dwɔn Sɔnevolɛ ne ati wɔ apawa nu ɛke kɛkala.”
9Nyane hanle belemgbunli ne, noko kɛmɔ yeha ndane wɔ ye nyɛvolɛ ne mɔ anyunlu la ati, ɔhanle kɛ bɛyɛ mɔɔ kakula raalɛ ne kpondɛ la bɛmaa ye. 10Yemɔti Hɛlɔdo manle bɛhɔpɛle Dwɔn ati wɔ efiade ne. 11Bɛvale tile ne bɛdole apawa nu bɛrɛlɛle kakula raalɛ ne, na ɔdaye noko ɔvale ɔhɔmanle ɔ nli. 12Dwɔn ɛdoavolɛma ne raliele funli ne hɔziele ye, na bɛhɔbɔle Gyisɛse amaneɛ.
Gyisɛse maa menli apenle nnu aleɛ
(Mak 6.30-44; Luk 9.10-17; Dw 6.1-14)
13Mɔɔ Gyisɛse dele Dwɔn Sɔnevolɛ ne ewule amaneɛ la, ɔvole ɛlɛne nu ɔvile ɛkɛ ne, ɔ ngomekye ɔhɔle ɛleka bie mɔɔ ɛkɛ ne le sulokoko la. Menli ne dele la, bɛvi bɛ azua ne mɔ azo bɛvale aze bɛdoale ye. 14Gyisɛse tolole rale azule ne anloa na ɔnwunle menli dɔɔnwo ne la, ɔlile bɛ nwo nyane na ɔyɛle wuleravolɛma mɔɔ wɔ nu la ayile ɔmanle bɛdele kpɔkɛ.
15Ɔdwule nɔsolɛ nu la, ye ɛdoavolɛma ne rahanle hilele ye kɛ, “Aleɛ asɛɛ ɛdwo, yɛɛ ɛke noko ɛmbikye sua zo; yemɔti maa menli ne adenle maa bɛhɔ namunamu ne mɔ azo bɛhɔkpondɛ debie bɛli.”
16Gyisɛse zele bɛ kɛ, “Ɔngyia kɛ bɛkɛhɔ; bɛdabɛ bɛmaa bɛ debie bɛli.”
17Bɛbuale ye kɛ, “Yɛnlɛ debie biala wɔ ɛke kɛ kpanwo mumua nnu yɛɛ fɛlɛ nwiɔ ala.”
18Gyisɛse zele bɛ kɛ, “Bɛva bɛrɛlɛ me.” 19Akee ɔmanle menli ne mɔ dɛnlanle aze wɔ ndile ne azo, ɔvale kpanwo mumua nnu ne nee fɛlɛ nwiɔ ne; ɔnleanle anwuma na ɔyɛle Nyamenle mo. Ɔbubule nuhua na ɔvale ɔmanle ye ɛdoavolɛma ne, na ɛdoavolɛma ne vale manle menli ne. 20Na bɛ muala bɛlile na bɛ ko yile. Nzinlii ɛdoavolɛma ne sesale ɔ bo zo ne ahɛndɛne bulu nee nwiɔ. 21Na bɛdabɛ mɔɔ bɛlile la, saa ɛye mraalɛ nee ngakula ne mɔ nu a, bɛlua mrenya kɛyɛ apenle nnu.
Gyisɛse tia azule nye
(Mak 6.45-52; Dw 6.15-21)
22Akee Gyisɛse manle ye ɛdoavolɛma ne vole ɛlɛne nu na bɛlumuale ɔ nyunlu wɔ tandane ne anzi lɔ, na yemɔ ɔnleanle ɔmanle menli ne zandele. 23Mɔɔ menli ne hɔle la, ɔdaye ɔ ngome ɔhɔle boka ne azo kɛ ɔkazɛlɛ. Aleɛ muanle nwo la, ɛnee yeha ɔdaye ɔ ngome ala wɔ ɛkɛ ne; 24zɛhae mekɛ ne anu ɛnee ɛlɛne ne ɛhɔ moa na azudulɛ ne bɔ ye mgbaka, ɔluakɛ ɛnee anwoma ne bɔ tia ye.
25Mɔɔ ɔdwule akɔlɛmɔleɛ la, Gyisɛse diale azule ne anye na ɔrale bɛ nwo ɛkɛ ne. 26Mɔɔ ɛdoavolɛma ne nwunle ye kɛ ɔlɛtia azule ne anye yeara la, ɛzulolɛ hanle bɛ na bɛdeɛdeanle nu bɛzele kɛ, “Nwomenle o, nwomenle o!”
27Na ɛkɛ ne ala Gyisɛse zele bɛ kɛ, “Bɛmmasulo, bɛha bɛ ahonle bɛdo azule nu na medame ɔ.”
28Pita hanle kɛ, “Awulae, saa ɛdawɔ amgba a, ɛnee maa adenle maa medame mendia azule ye anye membɛla ɛ nwo ɛkɛ.”
29Gyisɛse zele ye kɛ, “Bɛla!” Yemɔti Pita vi ɛlɛne ne anu dwule na ɔbɔle ɔ bo kɛ ɔtia azule ne anye yeahɔ Gyisɛse anwo lɔ. 30Na mɔɔ ɔnwunle kɛ anwoma ne anloa yɛ se la, ye ahonle dule, na ɔbɔle ɔ bo kɛ ɔnoma. Na ɔdeanle nu kɛ, “Awulae, die me!”
31Ɛkɛ ne ala Gyisɛse denrɛle ɔ sa zɔle ye na ɔzele ye kɛ, “O nrenyakpa, wɔ diedi le ekyi! Duzu ati a ɛ ti anu yɛle wɔ kesee ɛ?”
32Bɛ mu nwiɔ bɛvole ɛlɛne ne anu, na anwoma ne gyinlanle. 33Na ɛdoavolɛma ne mɔɔ wɔ ɛlɛne ne anu la rayeyɛle Gyisɛse zele kɛ, “Nɔhalɛ, wɔmɔ a ɛle Nyamenle Ara ne!”
Gyisɛse yɛ wuleravolɛma ayile wɔ Gɛnɛzalɛte
(Mak 6.53-56)
34Gyisɛse nee ye ɛdoavolɛma ne pɛle tandane ne hɔle Gɛnɛzalɛte, 35na menli mɔɔ wɔ ɛkɛ ne la nwunle ye. Yemɔti bɛmanle bɛhɔvale wuleravolɛma mɔɔ wɔ namunamu nee azua mɔɔ bikye ɛkɛ ne la azo la bɛrale na 36bɛzɛlɛle Gyisɛse kɛ ɔmaa wuleravolɛma ne adenle ɔmaa bɛva bɛ sa bɛha ye tɛladeɛ ne anloa bɔbɔ ala. Na bɛdabɛ mɔɔ bɛvale bɛ sa bɛhanle ye tɛladeɛ ne la amuala dele kpɔkɛ.
Bible in Nzema © Bible Society of Ghana, 1998.